తెలుగు

ఒక్కో అడుగు ముందుకు

ఫిబ్రవరి 19, 2020
సామాన్యకాలం ఆరవ వారంలోని బుధవారం
నేటి పఠనాలు

ఆంగ్లంలో వినండి

యేసు ఆ అంధుని చేయి పట్టుకొని గ్రామం వెలుపలికి తీసుకువెళ్లాడు. అతని కళ్లపై ఉమ్మి పూసి, అతనిపై చేతులుంచి, “నీకు ఏమైనా కనిపిస్తున్నదా?” అని అడిగాడు.   ఆ వ్యక్తి తలెత్తి చూసి, “మనుషులు కనిపిస్తున్నారు; వారు చెట్లవలె ఉండి నడుస్తున్నట్లు కనిపిస్తున్నారు” అని జవాబిచ్చాడు.  అప్పుడు యేసు రెండవసారి అతని కళ్లపై చేతులుంచాడు. అతనికి స్పష్టంగా కనిపించింది; అతని చూపు తిరిగి వచ్చింది, అన్నిటినీ స్పష్టంగా చూడగలిగాడు.  మార్కు 8:23-25

ఒక కారణంవల్ల ఈ సంఘటన ఎంతో ప్రత్యేకమైనది.  యేసు ఆ అంధుని స్వస్థపరచడానికి మొదటిసారి ప్రయత్నించినప్పుడు, స్వస్థత పాక్షికంగానే కలిగింది కాబట్టి ఇది ప్రత్యేకమైనది.  అతని అంధత్వాన్ని నయం చేయడానికి యేసు చేసిన మొదటి ప్రయత్నం తరువాత అతనికి చూపు వచ్చింది; అయితే అతనికి కనిపించింది “చెట్లవలె ఉండి నడుస్తున్న మనుషులు.”  అతనికి సంపూర్ణ స్వస్థత కలగడానికి యేసు అతని కళ్లపై రెండవసారి చేతులుంచవలసి వచ్చింది.  అలా ఎందుకు జరిగింది?

సువార్తలన్నిటిలోనూ, యేసు ఎవరినైనా స్వస్థపరచినప్పుడు, అది వారు కలిగి ఉండి, వ్యక్తపరిచే విశ్వాసం ఫలితంగానే జరుగుతుంది.  విశ్వాసం లేని వ్యక్తిని యేసు స్వస్థపరచడం చేతకాదని కాదు; బదులుగా, ఈ విధంగానే చేయాలని ఆయన ఎంచుకున్నాడు.  ఆయన స్వస్థతను సంపూర్ణ విశ్వాసంపై ఆధారపడేలా చేశాడు.

ఈ అద్భుత సంఘటనలో, ఆ అంధునికి కొంత విశ్వాసం ఉన్నట్లు కనిపిస్తుంది, కానీ అది ఎక్కువగా లేదు.  అందువల్ల యేసు ఎంతో అర్థవంతమైన ఒక పని చేశాడు.  అతనిలోని విశ్వాస లోపాన్ని చూపించడానికి, అతనికి పాక్షికంగా మాత్రమే స్వస్థత కలగనిచ్చాడు.  అయితే కొద్దిపాటి విశ్వాసం మరింత విశ్వాసానికి దారితీయగలదని కూడా ఆయన మనకు వెల్లడిస్తున్నాడు.  ఆ వ్యక్తికి కొద్దిగా కనిపించగానే, అతడు మరింతగా విశ్వసించడం ప్రారంభించినట్లు స్పష్టమవుతుంది.  అతని విశ్వాసం పెరిగిన తరువాత, యేసు మళ్లీ అతనిపై చేతులుంచి, అతనికి సంపూర్ణ స్వస్థతను కలిగించాడు.

ఇది మనకు ఎంత గొప్ప నిదర్శనం!  కొందరికి అన్ని విషయాలలోనూ దేవునిపై సంపూర్ణ విశ్వాసం ఉండవచ్చు.  మీ విషయంలో అలా ఉంటే, మీరు నిజంగా ధన్యులు.  అయితే విశ్వాసం ఉన్నప్పటికీ ఇంకా పోరాడుతున్నవారి కోసం ఈ వాక్యభాగం ప్రత్యేకంగా ఉద్దేశించబడింది.  అలాంటివారికి యేసు ఎంతో ఆశను అందిస్తున్నాడు.  ఆ వ్యక్తిని వరుసగా రెండుసార్లు స్వస్థపరచిన చర్య, యేసు సహనవంతుడు, కరుణామయుడు అనీ, మన దగ్గర ఉన్న కొద్దిపాటిదాన్ని, మనం సమర్పించే కొద్దిపాటిదాన్ని స్వీకరించి, తనకు సాధ్యమైనంత ఉత్తమంగా ఉపయోగిస్తాడనీ మనకు తెలియజేస్తుంది.  మనం దేవునికి మరొక అడుగు దగ్గరగా వచ్చి, విశ్వాసంలో ఎదిగేలా, మన కొద్దిపాటి విశ్వాసాన్ని రూపాంతరం చేయడానికి ఆయన కృషి చేస్తాడు.

పాపం విషయంలోనూ ఇదే చెప్పవచ్చు.  కొన్నిసార్లు పాపం చేసినందుకు మనలో అసంపూర్ణమైన పశ్చాత్తాప వేదన ఉంటుంది; మరికొన్నిసార్లు మనం పాపం చేస్తాం, అది తప్పని తెలిసినా దాని గురించి ఏ విచారమూ ఉండదు.  మీ పరిస్థితి అలా ఉంటే, క్షమాపణ ద్వారా కలిగే స్వస్థత వైపు కనీసం ఒక చిన్న అడుగైనా ముందుకు వేయడానికి ప్రయత్నించండి.  కనీసం, పాపం పట్ల పశ్చాత్తాప వేదన కలిగి ఉండాలనే కోరిక మీలో పెరగాలని కోరుకోవడానికి ప్రయత్నించండి.  అది అతి కనిష్ఠమైనదే కావచ్చు, అయినా యేసు దానిని ఉపయోగించుకుంటాడు.

ఈ రోజు ఈ అంధుని గురించి ధ్యానించండి.  అతనికి రెండుసార్లుగా కలిగిన స్వస్థతను, రెండుసార్లుగా జరిగిన హృదయ పరివర్తనను గురించి ఆలోచించండి.  ఈ వ్యక్తి మీకు ప్రతిరూపమని, మీ విశ్వాసంలోనూ, పాపం నుండి మరలే మీ పశ్చాత్తాపంలోనూ మిమ్మల్ని మరో అడుగు ముందుకు నడిపించాలని యేసు కోరుతున్నాడని తెలుసుకోండి.

ప్రభువా, నా పట్ల నీకున్న అపారమైన సహనానికి నీకు కృతజ్ఞతలు తెలుపుతున్నాను.  నీపై నా విశ్వాసం బలహీనంగా ఉందనీ, అది పెరగాలనీ నాకు తెలుసు.  నా పాపాల పట్ల నాకున్న పశ్చాత్తాప వేదన కూడా పెరగాలని నాకు తెలుసు.  దయచేసి నాకున్న కొద్దిపాటి విశ్వాసాన్ని, నా పాపాల పట్ల నాకున్న కొద్దిపాటి పశ్చాత్తాప వేదనను స్వీకరించి, వాటి ద్వారా నన్ను నీకూ, నీ కరుణామయ హృదయానికీ మరో అడుగు దగ్గరగా చేర్చు.  యేసూ, నేను నీపై నమ్మకం ఉంచుతున్నాను.

మరిన్ని సువార్త ధ్యానాలు

దైవకారుణ్య ధ్యానాలు

నేటి పునీతులు/పండుగలు


తపస్సుకాలం కోసం మూడు గొప్ప పుస్తకాలు
ఆన్‌లైన్‌లో ఉచితంగా చదవవచ్చు. ఈ-పుస్తక రూపంలోనూ & కాగితపు అట్టతో ముద్రిత రూపంలోనూ లభిస్తాయి.

తపస్సుకాల, పాస్కా ధ్యానాలు
దైనందిన కతోలిక ధ్యానాలు ధారావాహిక

సిలువ పాదాల చెంత 40 రోజులు
మన ధన్యమాత హృదయం నుండి ప్రేమపూర్వక దృష్టి

దైవకారుణ్యంపై దైనందిన ధ్యానాలు
పవిత్ర ఫౌస్టీనాతో 365 రోజులు

తపస్సుకాలం కోసం మరిన్ని పుస్తకాలను చూడండి