അഹങ്കാരം വരുത്തുന്ന നാണക്കേട്

2022 ഒക്ടോബർ 29
ആണ്ടുവട്ടക്കാലത്തിലെ മുപ്പതാം ആഴ്ചയിലെ ശനിയാഴ്ച
ഇന്നത്തെ വായനകൾ

“ആരെങ്കിലും നിന്നെ ഒരു വിവാഹവിരുന്നിനു ക്ഷണിക്കുമ്പോൾ ബഹുമാന്യസ്ഥാനത്ത് ഇരിക്കരുത്. നിന്നെക്കാൾ വിശിഷ്ടനായ ഒരു അതിഥിയെ അയാൾ ക്ഷണിച്ചിട്ടുണ്ടാകാം. നിങ്ങളിരുവരെയും ക്ഷണിച്ച ആതിഥേയൻ നിന്റെ അടുത്തുവന്ന്, ‘ഈ മനുഷ്യന് നിന്റെ സ്ഥലം കൊടുക്കുക’ എന്നു പറഞ്ഞേക്കാം. അപ്പോൾ നാണക്കേടോടെ നീ ഏറ്റവും താഴ്ന്ന സ്ഥാനത്തേക്ക് പോകേണ്ടിവരും.” ലൂക്കാ 14:8-9

ഫരിസേയന്റെ വീട്ടിൽ തന്നോടൊപ്പം ഭക്ഷണം കഴിച്ചുകൊണ്ടിരുന്നവരോട് ഈ ഉപമ പറഞ്ഞുകൊണ്ട് യേശു അവരുടെ ഹൃദയങ്ങളെ സ്പർശിക്കുന്നു. മറ്റുള്ളവരുടെ മതിപ്പ് തേടുകയും സമൂഹത്തിലെ തങ്ങളുടെ സൽപ്പേരിനെക്കുറിച്ച് ഏറെ ഉത്കണ്ഠപ്പെടുകയും ചെയ്തവരാണ് അവന്റെ ശ്രോതാക്കളിൽ നിറഞ്ഞിരുന്നതെന്ന് വ്യക്തമാണ്. വിരുന്നിൽ ബഹുമാന്യസ്ഥാനത്ത് ഇരുന്നശേഷം, താഴ്ന്ന സ്ഥാനത്തേക്ക് മാറാൻ ആതിഥേയൻ ആവശ്യപ്പെടുമ്പോൾ നാണംകെടേണ്ടിവരുന്നത് അവരെ സംബന്ധിച്ചിടത്തോളം ഭയപ്പെടുത്തുന്ന ഒരു ചിന്തയായിരുന്നിരിക്കണം. സാമൂഹിക അന്തസ്സിന്റെ ലോകത്തിൽ മുഴുകിയിരുന്നവർക്ക് ഈ അപമാനം വ്യക്തമായി മനസ്സിലാകുമായിരുന്നു.

അവരുടെ അഹങ്കാരവും അത്തരത്തിൽ അഹങ്കാരത്തോടെ ജീവിക്കുന്നതിന്റെ അപകടവും എടുത്തുകാണിക്കാനാണ് യേശു നാണക്കേടുണ്ടാക്കുന്ന ഈ ഉദാഹരണം ഉപയോഗിക്കുന്നത്. അവൻ തുടർന്ന് പറയുന്നു: “തന്നെത്തന്നെ ഉയർത്തുന്ന ഏവനും താഴ്ത്തപ്പെടും; തന്നെത്തന്നെ താഴ്ത്തുന്നവൻ ഉയർത്തപ്പെടും.”

അഹങ്കാരത്തെക്കുറിച്ച് എത്ര തവണ മനസ്സാക്ഷി പരിശോധിച്ചാലും അത് അധികമാകില്ല. അഹങ്കാരത്തെ “എല്ലാ പാപങ്ങളുടെയും മാതാവ്” എന്നു വിളിക്കുന്നതിന് കാരണമുണ്ട്. അഹങ്കാരം മറ്റെല്ലാ പാപങ്ങളിലേക്കും നയിക്കുന്നു; പല വിധത്തിലും അത് എല്ലാ പാപങ്ങളുടെയും ഉറവിടമാണ്. അതിനാൽ, ജീവിതത്തിൽ പരിപൂർണ്ണതയ്ക്കായി പരിശ്രമിക്കാൻ നാം ആഗ്രഹിക്കുന്നുവെങ്കിൽ, ഓരോ ദിവസവും യഥാർത്ഥ എളിമ തേടണം.

കാര്യങ്ങളെ അവ ആയിരിക്കുന്നതുപോലെ കാണുന്നതല്ലാതെ മറ്റൊന്നുമല്ല എളിമ. എളിമയുള്ള വ്യക്തി ദൈവത്തിന്റെ സത്യത്തിന്റെ വെളിച്ചത്തിൽ തന്നെത്തന്നെ കാണുന്നു. ഇത് പ്രയാസകരമായേക്കാം; കാരണം, നാം ബലഹീനരും ദൈവത്തെ ആശ്രയിക്കുന്നവരുമാണെന്ന് സ്വയം തിരിച്ചറിയേണ്ടതുണ്ട്. സ്വന്തം ശക്തിയും കഠിനാധ്വാനവുംകൊണ്ട് ലൗകികമായ പല കാര്യങ്ങളും നേടിയെടുക്കാൻ നമുക്ക് കഴിഞ്ഞേക്കാം. എന്നാൽ നമ്മുടെ ബലഹീനതകളുടെയും എല്ലാക്കാര്യങ്ങളിലും ദൈവത്തെ ആശ്രയിക്കേണ്ടതിന്റെയും സത്യത്തോട് നാം തുറവുള്ളവരാകാതെ സന്തോഷവും നന്മയും കൈവരിക്കാൻ നമുക്കാവില്ല.

വിട്ടുകളയാൻ ഏറെ പ്രയാസമുള്ള ഒരു കാര്യത്തിൽനിന്ന് നമ്മുടെ ഹൃദയങ്ങളെ ശുദ്ധീകരിക്കാനും എളിമ സഹായിക്കുന്നു. മറ്റുള്ളവരുടെ മതിപ്പ് തീവ്രമായി തേടാനും നമ്മുടെ സന്തോഷത്തിനായി ആ മതിപ്പിനെ ആശ്രയിക്കാനും അഹങ്കാരം നമ്മെ പ്രേരിപ്പിക്കുന്നു. അത് അപകടകരമായ ഒരു വഴിയാണ്; കാരണം, അത് നമ്മെ നിരന്തരം മറ്റുള്ളവരുടെ അഭിപ്രായങ്ങളെ ആശ്രയിക്കുന്നവരാക്കുന്നു. പലപ്പോഴും മറ്റുള്ളവരുടെ അഭിപ്രായങ്ങളാകട്ടെ തെറ്റായതും ഉപരിപ്ലവവുമായ മാനദണ്ഡങ്ങളെ അടിസ്ഥാനമാക്കിയുള്ളവയാണ്.

മറ്റുള്ളവരുടെ തെറ്റിദ്ധരിപ്പിക്കുന്നതും സത്യവിരുദ്ധവുമായ അഭിപ്രായങ്ങളിൽനിന്ന് നിങ്ങൾ എത്രത്തോളം സ്വതന്ത്രരാണെന്ന് ഇന്ന് ചിന്തിക്കുക. തീർച്ചയായും, നിങ്ങൾക്ക് പരിചയവും സ്നേഹവുമുള്ളവരിൽനിന്ന് പതിവായി ഉപദേശം തേടേണ്ടതുണ്ട്. എന്നാൽ ദൈവത്തെയും അവിടുത്തെ സത്യത്തെയും മാത്രം ആശ്രയിക്കുന്നവരായിരിക്കാൻ നിങ്ങൾ ശ്രദ്ധിക്കണം. അങ്ങനെ ചെയ്യുമ്പോൾ, യഥാർത്ഥ എളിമയുടെ പാതയിൽ നിങ്ങൾ ഏറെ മുന്നേറിയിട്ടുണ്ടാകും.

സത്യത്തിന്റെ നാഥാ, എന്നെ വിനീതനാക്കണമേ. അങ്ങയിലേക്കും അങ്ങയുടെ തിരുഹിതത്തിലേക്കും മാത്രം തിരിയാൻ കഴിയേണ്ടതിന് എന്റെ ജീവിതത്തിലെ എല്ലാ അഹങ്കാരവും നീക്കിക്കളയണമേ. അങ്ങ് സ്ഥാപിക്കുന്ന സത്യത്തിൽ മാത്രം ശ്രദ്ധവയ്ക്കാനും എന്റെ ആത്മാവിനെ വിലയിരുത്താനുള്ള ഏക മാനദണ്ഡമായി അതിനെ സ്വീകരിക്കാനും എന്നെ സഹായിക്കണമേ. ഈശോയേ, ഞാൻ അങ്ങയിൽ ശരണപ്പെടുന്നു.

ആഗമനകാലത്തിനും ക്രിസ്മസിനുമായി പുതിയത്!