ആണ്ടുവട്ടത്തിലെ ഇരുപത്തിനാലാം ആഴ്ചയിലെ ശനിയാഴ്ച
ഇന്നത്തെ വായനകൾ
പിയെത്രെൽചീനയിലെ വിശുദ്ധ പിയോ (പാദ്രെ പിയോ), വൈദികൻ—ഓർമ്മ
“കേൾക്കാൻ ചെവിയുള്ളവൻ കേൾക്കട്ടെ.” ലൂക്കാ 8:8
ഒരർഥത്തിൽ, ഈ ചെറിയ വാക്യം വിതക്കാരന്റെ ഉപമയുടെ സംഗ്രഹമാണ്. ദൈവവചനം സ്വീകരിക്കപ്പെടുന്ന വ്യത്യസ്തമായ നാലു രീതികൾ ഈ ഉപമ നമ്മുടെ മുമ്പിൽ അവതരിപ്പിക്കുന്നു. വിതയ്ക്കപ്പെടുന്ന വിത്ത് ദൈവവചനമാണ്. വ്യത്യസ്തമായ നാലു വിഭാഗം ആളുകളെ വഴിയരികിലും പാറനിലത്തും മുള്ളുകൾക്കിടയിലും നല്ല മണ്ണിലും വിതയ്ക്കപ്പെട്ട വിത്തുകളോട് ഉപമിക്കുന്നു.
വഴിയരികിൽ വിതയ്ക്കപ്പെട്ട വിത്തുകൾ “വചനം കേട്ടവരാണ്; എന്നാൽ പിശാച് വന്ന് അവരുടെ ഹൃദയങ്ങളിൽനിന്ന് വചനം എടുത്തുകളയുന്നു” എന്ന് യേശു വിശദീകരിക്കുന്നു. പാറനിലത്തു വിതയ്ക്കപ്പെട്ട വിത്തുകൾ “സന്തോഷത്തോടെ വചനം സ്വീകരിക്കുന്നു; എന്നാൽ അവർക്ക് വേരില്ല; കുറച്ചുകാലത്തേക്കു മാത്രം അവർ വിശ്വസിക്കുകയും പ്രലോഭനത്തിന്റെ സമയത്ത് വിട്ടുപോവുകയും ചെയ്യുന്നു.” മുള്ളുകൾക്കിടയിൽ വിതയ്ക്കപ്പെട്ട വിത്തുകൾ വചനം കേട്ട് സ്വീകരിച്ചവരാണ്; എന്നാൽ കാലക്രമേണ അവർ “ജീവിതത്തിലെ ഉത്കണ്ഠകളും സമ്പത്തും സുഖഭോഗങ്ങളും മൂലം ഞെരുക്കപ്പെടുകയും പാകമായ ഫലം പുറപ്പെടുവിക്കാതിരിക്കുകയും ചെയ്യുന്നു.” ഒടുവിൽ, ഫലഭൂയിഷ്ഠമായ മണ്ണുപോലുള്ളവർ വചനം കേട്ട് “ഉദാരവും നല്ലതുമായ ഹൃദയത്തോടെ അതിനെ മുറുകെപ്പിടിക്കുകയും സ്ഥിരോത്സാഹത്തോടെ ഫലം പുറപ്പെടുവിക്കുകയും ചെയ്യുന്നവരാണ്.”
ഈ വിഭാഗങ്ങളിൽപ്പെട്ട ആളുകളെ നോക്കുമ്പോൾ, നിങ്ങൾ ഏതു വിഭാഗത്തിലാണ് ഉൾപ്പെടുന്നത്? ദിവസവും പ്രാർഥിക്കുകയും നമ്മുടെ കർത്താവിനെ അനുഗമിക്കാൻ ശ്രമിക്കുകയും ചെയ്യുന്നവർ മിക്കവാറും അവസാനത്തെ രണ്ടു വിഭാഗങ്ങളിൽ ഒന്നിലായിരിക്കും ഉൾപ്പെടുക. മുള്ളുകൾക്കിടയിൽ വിതയ്ക്കപ്പെട്ട വിത്തുപോലുള്ളവരിലും ഫലഭൂയിഷ്ഠമായ മണ്ണിൽ വിതയ്ക്കപ്പെട്ട വിത്തുപോലുള്ളവരിലും ദൈവവചനത്തിൽനിന്ന് ഫലം ഉണ്ടാകുന്നു എന്നത് ശ്രദ്ധിക്കുക. മറ്റൊരു വിധത്തിൽ പറഞ്ഞാൽ, അവരുടെ ജീവിതത്തിലുള്ള ദൈവത്തിന്റെ വിശുദ്ധ വചനവും സാന്നിധ്യവും നിമിത്തം അവരുടെ ജീവിതം മാറുകയും അവർ ലോകത്തിൽ മാറ്റം വരുത്തുകയും ചെയ്യുന്നു. എന്നാൽ, “ജീവിതത്തിലെ ഉത്കണ്ഠകളും സമ്പത്തും സുഖഭോഗങ്ങളും” മൂലം ക്ലേശിക്കുന്നവർക്ക് “പാകമായ ഫലം” പുറപ്പെടുവിക്കാൻ കഴിയുകയില്ല എന്നതാണ് വ്യത്യാസം. വിശ്വാസികളായ ക്രൈസ്തവർ ചിന്തിക്കേണ്ട നല്ലൊരു പ്രബോധനമാണിത്.
സ്വന്തം ജീവിതത്തിലേക്കു നോക്കുമ്പോൾ, എങ്ങനെയുള്ള ഫലമാണ് നിങ്ങൾ കാണുന്നത്? നമ്മുടെ കർത്താവ് പറയുന്ന “ഫലം” പരിശുദ്ധാത്മാവിന്റെ ഫലങ്ങളുമായി ബന്ധപ്പെടുത്തി മനസ്സിലാക്കാം: ഉപവി, ആനന്ദം, സമാധാനം, ക്ഷമ, ദയ, നന്മ, ദീർഘക്ഷമ, സൗമ്യത, വിശ്വാസം, എളിമ, ആത്മസംയമനം, ശുദ്ധത. അതിനാൽ, പാകമാകാത്ത ഫലം പുറപ്പെടുവിക്കുന്ന ഒരാളെക്കാൾ പാകമായ ഫലം പുറപ്പെടുവിക്കുന്ന ഒരാളോടാണോ നിങ്ങൾക്ക് കൂടുതൽ സാദൃശ്യമുള്ളതെന്ന് വിവേചിച്ചറിയാൻ ആഗ്രഹിക്കുന്നെങ്കിൽ, ഈ വിശുദ്ധ ഗുണങ്ങളെ ശ്രദ്ധാപൂർവം പരിശോധിക്കുക. നിങ്ങളുടെ ജീവിതത്തിൽ സജീവമായിരിക്കുന്ന പരിശുദ്ധാത്മാവിന്റെ ഈ ഫലങ്ങളിൽ ഓരോന്നും എത്രത്തോളം “പാകമായതാണ്”? പത്തു കൽപനകളോ ഏഴു മുഖ്യപാപങ്ങളോ മാത്രം പരിഗണിക്കുന്നതിനെക്കാൾ ആഴത്തിലേക്കു പോകാൻ ആഗ്രഹിക്കുന്നവർക്ക് ഇവ ആത്മശോധനയ്ക്കുള്ള ഉത്തമമായ അടിസ്ഥാനമാണ്. നിങ്ങളുടെ ജീവിതത്തിൽ ഈ നല്ല ഫലങ്ങൾ യഥാർഥത്തിൽ പാകമായ രീതിയിൽ ഉണ്ടാകുന്നുവെങ്കിൽ, നിങ്ങളിലൂടെ അവ മറ്റുള്ളവരെ എങ്ങനെ സ്വാധീനിക്കുന്നുവെന്ന് നിങ്ങൾക്കു കാണാൻ കഴിയണം. ഉദാഹരണത്തിന്, നിങ്ങളുടെ ദയയും ക്ഷമയും വിശ്വാസവും ആത്മസംയമനവും മറ്റുള്ളവരുടെ ക്രൈസ്തവ ജീവിതയാത്രയിൽ അവരെ എങ്ങനെയാണ് സഹായിച്ചിട്ടുള്ളത്?
ഇന്ന് പരിശുദ്ധാത്മാവിന്റെ ഫലങ്ങളെക്കുറിച്ച് വിചിന്തനം ചെയ്യുക. സ്വന്തം ജീവിതം പരിശോധിക്കുമ്പോൾ, ശ്രദ്ധാപൂർവവും പ്രാർഥനാപൂർവവും അവയെ വിലയിരുത്തുക. അവ സമൃദ്ധമായി കാണുന്നിടത്ത് സന്തോഷിക്കുകയും നന്ദി പറയുകയും അവയുടെ വളർച്ചയ്ക്കായി പരിശ്രമിക്കുകയും ചെയ്യുക. അവയുടെ കുറവ് കാണുന്നിടത്ത്, ആ തിരിച്ചറിവിലും സന്തോഷിക്കുകയും അവ കുറവായിരിക്കുന്നതിന്റെ കാരണം പരിചിന്തനം ചെയ്യുകയും ചെയ്യുക. അവയുടെ വളർച്ചയെ തടസ്സപ്പെടുത്തുന്ന ലൗകിക ഉത്കണ്ഠകളോ സമ്പത്തിനോടോ സുഖഭോഗങ്ങളോടോ ഉള്ള ആഗ്രഹങ്ങളോ ഉണ്ടോ? യഥാർഥത്തിൽ ഫലഭൂയിഷ്ഠമായ ആ മണ്ണായിത്തീരാൻ പരിശ്രമിക്കുക; അപ്പോൾ നമ്മുടെ കർത്താവ് തീർച്ചയായും നിങ്ങളിലും നിങ്ങളിലൂടെയും ധാരാളം നല്ല ഫലം പുറപ്പെടുവിക്കും.
എന്റെ ദിവ്യ വിതക്കാരനായ കർത്താവേ, അങ്ങയുടെ വചനമാകുന്ന പൂർണതയുള്ള വിത്തുകൾ അങ്ങ് സമൃദ്ധമായി വിതയ്ക്കുന്നു. ധാരാളം നല്ല ഫലം ഉണ്ടാകേണ്ടതിന്, ആ വചനം സ്വീകരിക്കാൻ എന്റെ ഹൃദയം തുറക്കാൻ എന്നെ സഹായിക്കണമേ. അങ്ങയുടെ വിശുദ്ധ വചനം വ്യക്തമായി കേൾക്കാനും ആ വചനം എന്റെ ഹൃദയത്തിൽ പരിപോഷിപ്പിക്കാനും കഴിയേണ്ടതിന്, ജീവിതത്തിലെ ഉത്കണ്ഠകളിൽനിന്നും വഞ്ചനകളിൽനിന്നും എന്നെ മോചിപ്പിക്കണമേ. പ്രിയ കർത്താവേ, എന്നിലും എന്നിലൂടെയും അങ്ങ് ചെയ്തിട്ടുള്ളതും തുടർന്നും ചെയ്തുകൊണ്ടിരിക്കുന്നതുമായ എല്ലാ കാര്യങ്ങളിലും ഞാൻ സന്തോഷിക്കുന്നു. ഈശോയേ, ഞാൻ അങ്ങയിൽ ശരണപ്പെടുന്നു.
ലിസ്യുവിലെ വിശുദ്ധ കൊച്ചുത്രേസ്യയോടുള്ള നൊവേന: സെപ്റ്റംബർ 22-30
രണ്ടാം ദിവസം – സെപ്റ്റംബർ 23
ദൈവകരുണയെക്കുറിച്ചുള്ള വിചിന്തനങ്ങൾ
ആണ്ടുവട്ടത്തിലേക്കുള്ള വിശുദ്ധലിഖിത ധ്യാനങ്ങൾ
വിശുദ്ധ കുർബാനയിലെ വായനകൾക്കുള്ള തിരഞ്ഞെടുപ്പുകൾ
മുകളിൽ നൽകിയിരിക്കുന്ന ചിത്രം: വിതക്കാരന്റെ ഉപമ, flickr മുഖേന
