2024 ജനുവരി 18
സാധാരണകാലം രണ്ടാം വാരത്തിലെ വ്യാഴാഴ്ച
ഇന്നത്തെ വായനകൾ
ജനക്കൂട്ടം തന്നെ ഞെരുക്കാതിരിക്കേണ്ടതിന് തനിക്കായി ഒരു വഞ്ചി ഒരുക്കിനിർത്താൻ അവൻ ശിഷ്യന്മാരോടു പറഞ്ഞു. അവൻ അനേകരെ സുഖപ്പെടുത്തിയിരുന്നതിനാൽ, രോഗമുള്ളവർ അവനെ ഒന്നു സ്പർശിക്കാൻ അവന്റെ നേരെ തിക്കിത്തിരക്കി വന്നു. മർക്കോസ് 3:9–10
അനേകം ആളുകൾക്ക് യേശുവിനോടുണ്ടായിരുന്ന അതിയായ താത്പര്യത്തെക്കുറിച്ച് ചിന്തിക്കുന്നത് ഹൃദയത്തെ ആകർഷിക്കുന്നു. ജനക്കൂട്ടത്തെ പഠിപ്പിക്കുമ്പോൾ അവരുടെ തിക്കിലും തിരക്കിലും പെട്ട് ഞെരുങ്ങാതിരിക്കേണ്ടതിന് തനിക്കായി ഒരു വഞ്ചി ഒരുക്കിനിർത്താൻ യേശു ശിഷ്യന്മാരോട് ആവശ്യപ്പെടുന്നതാണ് മുകളിലെ വചനഭാഗത്തിൽ നാം കാണുന്നത്. രോഗികളായ അനേകരെ അവൻ സുഖപ്പെടുത്തിയിരുന്നു. അവനെ ഒന്നു സ്പർശിക്കാനായി ജനക്കൂട്ടം അവന്റെ നേരെ തിക്കിത്തിരക്കുകയായിരുന്നു.
നമ്മുടെ കർത്താവുമായുള്ള ബന്ധത്തിൽ നമ്മുടെ ആന്തരികജീവിതത്തിൽ എന്തു സംഭവിക്കണം എന്നതിന്റെ ഒരു ദൃഷ്ടാന്തമാണ് ഈ രംഗം നമുക്കു നൽകുന്നത്. യേശുവിനോടുള്ള ഭക്തിയിൽ ആ ജനങ്ങൾ ഏകാഗ്രരും അവനെ ലഭിക്കാനുള്ള ആഗ്രഹത്തിൽ തീക്ഷ്ണതയുള്ളവരുമായിരുന്നുവെന്നു പറയാം. തങ്ങളുടെയും പ്രിയപ്പെട്ടവരുടെയും ശാരീരികരോഗങ്ങൾ സൗഖ്യമാകണമെന്ന ആഗ്രഹം അൽപം സ്വാർഥമായ രീതിയിൽ അവരുടെ ആഗ്രഹത്തെ പ്രേരിപ്പിച്ചിരിക്കാം എന്നത് ശരിയാണ്. എങ്കിലും, അവനോടുള്ള അവരുടെ ആകർഷണം യഥാർഥവും ശക്തവുമായിരുന്നു; തങ്ങളുടെ ശ്രദ്ധ മുഴുവനും നമ്മുടെ കർത്താവിൽ കേന്ദ്രീകരിക്കാൻ അത് അവരെ പ്രേരിപ്പിച്ചു.
വഞ്ചിയിൽ കയറി ജനക്കൂട്ടത്തിൽനിന്ന് അൽപം അകന്നുനിൽക്കാനുള്ള യേശുവിന്റെ തീരുമാനവും സ്നേഹത്തിന്റെ ഒരു പ്രവൃത്തിയായിരുന്നു. എന്തുകൊണ്ട്? കാരണം, തന്റെ ദൗത്യത്തിന്റെ കൂടുതൽ ആഴമുള്ള അർഥത്തിലേക്ക് അവരുടെ ശ്രദ്ധ വീണ്ടും തിരിക്കാൻ ഈ പ്രവൃത്തി യേശുവിനെ സഹായിച്ചു. അനുകമ്പയാലും തന്റെ സർവശക്തി വെളിപ്പെടുത്താനുമായി അവൻ അത്ഭുതങ്ങൾ ചെയ്തിരുന്നെങ്കിലും, ജനങ്ങളെ പഠിപ്പിക്കുകയും താൻ പ്രസംഗിച്ചുകൊണ്ടിരുന്ന സന്ദേശത്തിന്റെ പൂർണസത്യത്തിലേക്ക് അവരെ നയിക്കുകയുമായിരുന്നു അവന്റെ മുഖ്യലക്ഷ്യം. അതിനാൽ, അവരിൽനിന്ന് അകന്നുനിന്നതിലൂടെ, ശാരീരികമായ ഒരു അത്ഭുതത്തിനുവേണ്ടി തന്നെ സ്പർശിക്കാൻ മാത്രം ശ്രമിക്കുന്നതിനു പകരം തന്റെ വാക്കുകൾ കേൾക്കാൻ അവൻ അവരെ ക്ഷണിച്ചു. യേശുവിനെ സംബന്ധിച്ചിടത്തോളം, ജനക്കൂട്ടത്തിനു നൽകാൻ അവൻ ആഗ്രഹിച്ച ആത്മീയപൂർണതയ്ക്ക്, അവൻ നൽകിയ ഏതൊരു ശാരീരികസൗഖ്യത്തേക്കാളും വളരെ വലിയ പ്രാധാന്യമുണ്ടായിരുന്നു.
നമ്മുടെ ജീവിതത്തിലും, തന്റെ ജീവിതത്തിന്റെ കൂടുതൽ ആഴമുള്ളതും നമ്മെ കൂടുതൽ രൂപാന്തരപ്പെടുത്തുന്നതുമായ ലക്ഷ്യത്തെ സ്വീകരിക്കാൻ നാം കൂടുതൽ തുറവുള്ളവരാകേണ്ടതിന്, യേശു ബാഹ്യമായ ചില തലങ്ങളിൽ നമ്മിൽനിന്ന് സ്വയം “അകന്നുനിന്നേക്കാം”. ഉദാഹരണത്തിന്, ആശ്വാസം നൽകുന്ന ചില അനുഭവങ്ങൾ അവൻ എടുത്തുമാറ്റിയേക്കാം; അല്ലെങ്കിൽ, അവന്റെ സാന്നിധ്യം നമുക്ക് അത്ര അനുഭവപ്പെടുന്നില്ലെന്നു തോന്നിക്കുന്ന ഒരു പരീക്ഷണത്തിലൂടെ കടന്നുപോകാൻ അവൻ അനുവദിച്ചേക്കാം. എന്നാൽ ഇങ്ങനെ സംഭവിക്കുമ്പോഴെല്ലാം, കൂടുതൽ ആഴമുള്ള വിശ്വാസത്തോടും തുറവോടുംകൂടെ നാം അവനിലേക്കു തിരിയാനും അങ്ങനെ സ്നേഹബന്ധത്തിലേക്ക് കൂടുതൽ ആഴമായി ആകർഷിക്കപ്പെടാനും വേണ്ടിയാണ് അത്.
നമ്മുടെ കർത്താവിനോടുള്ള നിങ്ങളുടെ ഭക്തി എത്രമാത്രം ഏകാഗ്രമാണെന്ന് ഇന്ന് വിചിന്തനം ചെയ്യുക. അതോടൊപ്പം, നിങ്ങൾ അന്വേഷിക്കുന്ന സുഖകരമായ അനുഭവങ്ങളോടും ആശ്വാസങ്ങളോടുമാണോ നിങ്ങൾ കൂടുതൽ ചേർന്നുനിൽക്കുന്നത്, അതോ നമ്മുടെ കർത്താവ് നിങ്ങളോടു പ്രസംഗിക്കാൻ ആഗ്രഹിക്കുന്ന, നിങ്ങളെ രൂപാന്തരപ്പെടുത്തുന്ന സന്ദേശത്തിൽ കൂടുതൽ ശ്രദ്ധ കേന്ദ്രീകരിക്കുന്ന ആഴമേറിയ ഭക്തിയാണോ നിങ്ങളുടേത് എന്നും ചിന്തിക്കുക. യേശുവിന്റെ വാക്കുകൾ കേട്ടുകൊണ്ട് ആ തീരത്തു നിൽക്കുന്ന നിങ്ങളെത്തന്നെ മനസ്സിൽ കാണുക. അവന്റെ വിശുദ്ധവചനങ്ങൾ നിങ്ങളുടെ ജീവിതത്തെ കൂടുതൽ ആഴത്തിൽ രൂപാന്തരപ്പെടുത്താൻ അനുവദിക്കുക.
എന്റെ രക്ഷകനായ ദൈവമേ, ഇന്ന് ഞാൻ അങ്ങയിലേക്കു തിരിയുന്നു; അങ്ങയോടുള്ള സ്നേഹത്തിലും ഭക്തിയിലും ഏകമനസ്സുള്ളവനായിരിക്കാൻ ഞാൻ ആഗ്രഹിക്കുന്നു. എല്ലാറ്റിനുമുപരിയായി, എന്നെ രൂപാന്തരപ്പെടുത്തുന്ന അങ്ങയുടെ വചനം ശ്രവിക്കാനും ആ വചനം എന്റെ ജീവിതത്തിന്റെ കേന്ദ്രമാകാൻ അനുവദിക്കാനും എന്നെ സഹായിക്കണമേ. ഈശോയേ, ഞാൻ അങ്ങയിൽ ശരണപ്പെടുന്നു.
2024-ലെ നോമ്പുകാലത്തിനായി പുതിയത്!
മരുഭൂമിയിൽ 40 ദിനങ്ങൾ:
നമ്മുടെ കർത്താവിനോടൊപ്പം ഒരു നോമ്പുകാലയാത്ര
ദൈവകരുണയെക്കുറിച്ചുള്ള വിചിന്തനങ്ങൾ
വിശുദ്ധ കുർബാനയിലെ വായനകൾക്കുള്ള തിരഞ്ഞെടുപ്പുകൾ
