2024 സെപ്റ്റംബർ 12
ആണ്ടുവട്ടക്കാലം ഇരുപത്തിമൂന്നാം വാരത്തിലെ വ്യാഴാഴ്ച
ഇന്നത്തെ വായനകൾ
പരിശുദ്ധ കന്യകാമറിയത്തിന്റെ വിശുദ്ധനാമം—ഐച്ഛിക അനുസ്മരണം
നിന്റെ ഒരു കവിളിൽ അടിക്കുന്നവന് മറ്റേ കവിളും കാണിച്ചുകൊടുക്കുക. നിന്റെ മേലങ്കി എടുക്കുന്നവന് നിന്റെ അങ്കിപോലും നിഷേധിക്കരുത്. നിന്നോട് ചോദിക്കുന്ന എല്ലാവർക്കും കൊടുക്കുക; നിനക്കുള്ളത് എടുക്കുന്നവനോട് അത് തിരികെ ആവശ്യപ്പെടരുത്. ലൂക്കാ 6:29–30
ഈ വാക്കുകൾ യേശുവിന്റെ ആദ്യശിഷ്യരെ ഞെട്ടിച്ചിരിക്കണം. ഒന്നാമതായി, തുറന്ന ഹൃദയമുള്ളവരിൽ താൻ പഠിപ്പിച്ചത് സത്യമാണെന്ന ബോധ്യം ഉളവാക്കുന്ന ആത്മീയ അധികാരത്തോടെയാണ് യേശു ഈ വാക്കുകൾ പഠിപ്പിച്ചതെന്ന് ഓർക്കുക. അനേകം അത്ഭുതങ്ങൾ പ്രവർത്തിക്കുന്നതിനിടയിലാണ് യേശു ഈ ആഴമേറിയ ആത്മീയ പാഠങ്ങൾ പഠിപ്പിച്ചതെന്നും ഓർക്കുക. അതിനാൽ, യേശു പഠിപ്പിച്ചത് സത്യമാണെന്ന് അവിടുത്തെ പുതിയ അനുയായികൾക്ക് അറിയാമായിരുന്നിരിക്കണം. എന്നാൽ അത്തരം ഉപദേശങ്ങൾ അവർക്ക് എങ്ങനെ പൂർണ്ണമായി സ്വീകരിക്കാൻ കഴിയുമായിരുന്നു?
യേശു പഠിപ്പിച്ച ആഴമേറിയ ആത്മീയ തത്ത്വങ്ങളിലേക്ക് ശ്രദ്ധ ക്ഷണിക്കാൻ പല വ്യാഖ്യാതാക്കളും ശ്രമിക്കുമെങ്കിലും, ആദ്യം അവിടുത്തെ വാക്കുകൾ അവയുടെ നേരിട്ടുള്ള അർത്ഥത്തിൽ സ്വീകരിക്കാൻ ശ്രമിക്കുക. നിങ്ങളെ അടിക്കുന്നവന് മറ്റേ കവിൾ കാണിച്ചുകൊടുക്കണമെന്നും, നിങ്ങളുടെ മേലങ്കി മോഷ്ടിക്കുന്നവന് അങ്കിയും കൊടുക്കണമെന്നും, നിങ്ങളോട് ചോദിക്കുന്ന എല്ലാവർക്കും കൊടുക്കണമെന്നും, നിങ്ങളിൽനിന്ന് ആരെങ്കിലും എടുക്കുന്നത് ഒരിക്കലും തിരികെ ആവശ്യപ്പെടരുതെന്നും അവിടുന്ന് യഥാർത്ഥത്തിൽ പറഞ്ഞു. ഇവ സ്വീകരിക്കാൻ എളുപ്പമുള്ള പാഠങ്ങളല്ല!
ശക്തമായ ഈ പാഠങ്ങൾ നമ്മെ പഠിപ്പിക്കുന്ന ഒരു കാര്യമുണ്ട്: കവിളിൽ അടിയേൽക്കുന്നതിന്റെയും സ്വന്തമായുള്ളവ മോഷ്ടിക്കപ്പെടുന്നതിന്റെയും അപമാനത്തെക്കാൾ ഏറെ പ്രധാനപ്പെട്ട ഒന്നുണ്ട് ജീവിതത്തിൽ. എന്താണ് അതിനെക്കാൾ പ്രധാനപ്പെട്ട ആ കാര്യം? ആത്മാക്കളുടെ രക്ഷയാണത്.
നമുക്കെതിരെ നടന്ന അനീതികൾക്ക് ഇഹലോകത്തിലെ നീതിയും പ്രതികാരവും ആവശ്യപ്പെട്ടുകൊണ്ടാണ് നാം ജീവിതം നയിക്കുന്നതെങ്കിൽ, ഏറ്റവും പ്രധാനപ്പെട്ട കാര്യത്തിൽ ശ്രദ്ധ കേന്ദ്രീകരിക്കാൻ നമുക്കു കഴിയുകയില്ല. നമ്മോട് തെറ്റുചെയ്തവരുടെ രക്ഷയിൽ ശ്രദ്ധ കേന്ദ്രീകരിക്കാൻ നമുക്കു കഴിയുകയില്ല. നമ്മോടു ദയയോടെ പെരുമാറുന്നവരെ സ്നേഹിക്കാൻ എളുപ്പമാണ്. എന്നാൽ നമ്മുടെ സ്നേഹം എല്ലാവരിലേക്കും എത്തണം. ചിലപ്പോഴാകട്ടെ, മറ്റൊരാളോട് നാം കാണിക്കേണ്ട സ്നേഹത്തിന്റെ രൂപം, അവർ നമുക്കെതിരെ ചെയ്യുന്ന അനീതികൾ മനസ്സോടെ ഏറ്റെടുക്കുക എന്നതാണ്. ഈ സ്നേഹപ്രവൃത്തിക്ക് വലിയ ശക്തിയുണ്ട്. എന്നാൽ അവരുടെ നിത്യരക്ഷ നമ്മുടെ ആഴമേറിയ ആഗ്രഹമാണെങ്കിൽ മാത്രമേ മറ്റൊരാളെ ഇങ്ങനെ സ്നേഹിക്കാൻ നമുക്കു കഴിയൂ. ഇഹലോകത്തിലെ നീതിയും ചെയ്ത തെറ്റുകൾക്കുള്ള പരിഹാരവും മാത്രമാണ് നാം ആഗ്രഹിക്കുന്നതെങ്കിൽ, നമുക്ക് അവ ലഭിച്ചേക്കാം. എന്നാൽ അതിനു വിലയായി അവരുടെ രക്ഷ നഷ്ടപ്പെട്ടേക്കാം.
ഓരോ അനീതിയും ഇവിടെ, ഇപ്പോൾത്തന്നെ പരിഹരിക്കപ്പെടണം എന്ന ചിന്തയുടെ കെണിയിൽ ചിലപ്പോൾ നാം വീണുപോയേക്കാം. എന്നാൽ യേശു പഠിപ്പിച്ചത് അതല്ലെന്നു വ്യക്തമാണ്. അവിടുത്തെ ജ്ഞാനം അതിനെക്കാൾ എത്രയോ ആഴമുള്ളതാണ്. മറ്റൊരാളോട്, പ്രത്യേകിച്ച് നമ്മെ ആഴത്തിൽ വേദനിപ്പിച്ച ഒരാളോട്, ആഴമായ കരുണയും ക്ഷമയും കാണിക്കുന്നത് നമുക്കു നൽകാൻ കഴിയുന്ന ഏറ്റവും വലിയ ദാനങ്ങളിലൊന്നാണെന്ന് അവിടുത്തേക്ക് അറിയാമായിരുന്നു. നമ്മുടെ സ്വന്തം ആത്മാക്കളിലും ഏറ്റവും വലിയ പരിവർത്തനം വരുത്താൻ നമുക്കു ചെയ്യാവുന്ന പ്രവൃത്തികളിലൊന്നാണത്. സ്നേഹിക്കുന്നതു വേദനാജനകമാകുമ്പോൾ—അതായത്, പ്രത്യേകിച്ച് നമ്മോടു ചെയ്ത അനീതിയെക്കുറിച്ചുള്ള പിടിവാശി പൂർണ്ണമായി വിട്ടുകളയുന്നതിലൂടെ നമ്മുടെ ലൗകികമായ അഭിമാനം ത്യജിക്കേണ്ടിവരുമ്പോൾ—ആ വ്യക്തിയോടുള്ള നമ്മുടെ സ്നേഹപ്രവൃത്തിക്ക് അവരെ മാറ്റാനുള്ള വലിയ ശക്തിയുണ്ടാകുന്നു. ആ പ്രവൃത്തി അവരിൽ മാറ്റം വരുത്തുന്നെങ്കിൽ, അത് നിത്യതയോളം നിങ്ങളുടെ സന്തോഷത്തിനു കാരണമാകും.
യേശുവിന്റെ കഠിനമായ ഈ ഉപദേശം ഏതെല്ലാം വിധത്തിൽ സ്വീകരിക്കാൻ നിങ്ങൾക്കു പ്രയാസമാകുന്നുവെന്ന് ഇന്ന് വിചിന്തനം ചെയ്യുക. ഈ ഉപദേശത്തെക്കുറിച്ച് ചിന്തിക്കുമ്പോൾ ആരാണ് മനസ്സിലേക്കു വരുന്നത്? യേശുവിന്റെ ഈ സ്നേഹകല്പനയ്ക്കെതിരെ നിങ്ങളുടെ വികാരങ്ങൾ കലഹിക്കുന്നുണ്ടോ? അങ്ങനെയെങ്കിൽ, നിങ്ങൾ വളരണമെന്ന് ദൈവം ആഗ്രഹിക്കുന്ന കൃത്യമായ മേഖല നിങ്ങൾ കണ്ടെത്തിയിരിക്കുന്നു. നിങ്ങൾക്കു പരിഭവമുള്ള ആരെയെങ്കിലും കുറിച്ച് ചിന്തിക്കുക; അവരുടെ നിത്യരക്ഷ നിങ്ങൾ ആഗ്രഹിക്കുന്നുണ്ടോ എന്നു വിചിന്തനം ചെയ്യുക. നമ്മുടെ കർത്താവ് കല്പിക്കുന്ന വിധത്തിൽ സ്നേഹിക്കാൻ നിങ്ങൾ തയ്യാറാണെങ്കിൽ, ഈ സ്നേഹദൗത്യത്തിനായി ദൈവത്തിന് നിങ്ങളെ ഉപയോഗിക്കാൻ കഴിയുമെന്ന് അറിയുക.
എന്റെ കരുണാമയനായ കർത്താവേ, അങ്ങയുടെ സ്നേഹം എന്റെ ഗ്രഹണശക്തിക്ക് അതീതമാണ്. അങ്ങയുടെ സ്നേഹം പരിപൂർണ്ണമാണ്; അത് എപ്പോഴും മറ്റുള്ളവരുടെ നന്മ തേടുന്നു. പ്രിയ കർത്താവേ, അങ്ങയുടെ ഹൃദയത്തോടെ സ്നേഹിക്കാനും അങ്ങ് ക്ഷമിച്ചതുപോലെ ക്ഷമിക്കാനും എനിക്ക് കൃപ നൽകണമേ. എന്റെ ജീവിതത്തിൽ രക്ഷയും കരുണയും ഏറ്റവും കൂടുതൽ ആവശ്യമുള്ളവർക്ക് അവയുടെ ഉപകരണമാകാൻ എന്നെ പ്രത്യേകമായി ഉപയോഗിക്കണമേ. ഈശോയെ, ഞാൻ അങ്ങയിൽ ശരണപ്പെടുന്നു.
വ്യാകുലമാതാവിനോടുള്ള നൊവേന
പരമ്പരാഗതമായി സെപ്റ്റംബർ 7–15 തീയതികളിൽ ചൊല്ലുന്നു
ദൈവകരുണയെക്കുറിച്ചുള്ള വിചിന്തനങ്ങൾ
ആണ്ടുവട്ടത്തിലേക്കുള്ള വിശുദ്ധലിഖിത ധ്യാനങ്ങൾ
ഇന്നത്തെ വിശുദ്ധൻ – പരിശുദ്ധ കന്യകാമറിയത്തിന്റെ വിശുദ്ധ നാമം—ഐച്ഛിക അനുസ്മരണം
തിരഞ്ഞെടുപ്പിനും രാജ്യത്തിനും വേണ്ടിയുള്ള പ്രാർഥനകൾ
സെപ്റ്റംബർ 3 – നവംബർ 4 വരെ ഒൻപത് ആഴ്ച നീളുന്ന നൊവേന
വിശുദ്ധ കുർബാനയിലെ വായനകൾക്കുള്ള തിരഞ്ഞെടുപ്പുകൾ
മുകളിൽ നൽകിയിരിക്കുന്ന പ്രധാന ചിത്രം: ഗിരിപ്രഭാഷണം — രചന: ഇവാൻ മകാരോവ്, വിക്കിമീഡിയ കോമൺസ് വഴി
