നവംബർ 15, 2024
ആണ്ടുവട്ടകാലത്തിലെ മുപ്പത്തിരണ്ടാം വാരത്തിലെ വെള്ളിയാഴ്ച
ഇന്നത്തെ വായനകൾ
മെത്രാനും വേദപാരംഗതനുമായ മഹാനായ വിശുദ്ധ ആൽബർട്ട്—ഐച്ഛിക അനുസ്മരണം
ചാൾസ് വിൽസൺ പീൽ, പൊതുസഞ്ചയത്തിലുള്ള ചിത്രം, വിക്കിമീഡിയ കോമൺസ് വഴി
യേശു ശിഷ്യന്മാരോടു പറഞ്ഞു: “നോഹയുടെ ദിവസങ്ങളിൽ സംഭവിച്ചതുപോലെതന്നെ മനുഷ്യപുത്രന്റെ ദിവസങ്ങളിലും സംഭവിക്കും; നോഹ പെട്ടകത്തിൽ പ്രവേശിച്ച ദിവസംവരെ അവർ തിന്നും കുടിച്ചും വിവാഹം കഴിച്ചും വിവാഹം ചെയ്തുകൊടുത്തും കഴിഞ്ഞു. അപ്പോൾ പ്രളയം വന്ന് അവരെയെല്ലാം നശിപ്പിച്ചു.” ലൂക്കാ 17:26–27
ആരാധനാക്രമവർഷത്തിന്റെ അവസാന ആഴ്ചകളിലേക്കു പ്രവേശിക്കുമ്പോൾ, ക്രിസ്തുവിന്റെ അന്തിമാഗമനത്തിലേക്കു നാം ശ്രദ്ധ തിരിക്കാൻ തുടങ്ങുന്നു. ഇന്നത്തെ സുവിശേഷത്തിൽ യേശു നോഹയുടെയും ലോത്തിന്റെയും ഉദാഹരണം നമുക്കു നൽകുന്നു. നോഹയുടെ കാലത്ത് ഭൂമിയെ നശിപ്പിക്കാൻ പ്രളയം വന്ന ദിവസവും ലോത്തിന്റെ കാലത്ത് ആകാശത്തുനിന്ന് തീ പെയ്തിറങ്ങിയ ദിവസവുംവരെ, ഈ രണ്ടു സംഭവങ്ങളിലെയും ജനങ്ങൾ തിന്നും കുടിച്ചും വിവാഹം കഴിച്ചും വാങ്ങിയും വിറ്റും നട്ടുപിടിപ്പിച്ചും പണിതുയർത്തിയും കഴിഞ്ഞിരുന്നു. നോഹയും ലോത്തും രക്ഷപ്പെട്ടു. എന്നാൽ അക്കാലത്തു ജീവിച്ചിരുന്ന മറ്റു പലരും പെട്ടെന്നുള്ളതും അപ്രതീക്ഷിതവുമായ നാശത്തെ നേരിട്ടു.
“മനുഷ്യപുത്രന്റെ ദിവസങ്ങൾ” മുമ്പു നടന്ന ഈ രണ്ടു സംഭവങ്ങൾക്കു സമാനമായിരിക്കുമെന്ന് യേശു പറയുന്നു. പ്രതീക്ഷിക്കാത്ത ഒരു സമയത്ത് യേശു ഭൂമിയിലേക്കു മടങ്ങിവരും; തുടർന്ന് അന്ത്യവിധി നടക്കും. അതിനാൽ അവിടുത്തെ സന്ദേശം വ്യക്തമാണ്: എല്ലായ്പ്പോഴും ഒരുങ്ങിയിരിക്കുക.
സുവിശേഷങ്ങളിൽ പലവട്ടം പലവിധത്തിൽ പറഞ്ഞിരിക്കുന്ന നമ്മുടെ കർത്താവിന്റെ ഈ പ്രബോധനം നമുക്കു പരിചിതമാണെങ്കിലും, പലരും ആ സന്ദേശം ചെവിക്കൊള്ളുന്നില്ല. മാറ്റം വരുത്താൻ നാളെ എപ്പോഴും ഉണ്ടാകുമെന്ന് വിശ്വസിക്കാൻ എളുപ്പമാണ്; അതുകൊണ്ട് ഇന്ന് നിങ്ങൾ പ്രലോഭനത്തിനു വഴങ്ങുന്നു. നാളെ എത്തുമ്പോൾ, അതിനടുത്ത ദിവസം ഇതിനു പരിഹാരം കാണാമെന്ന ചിന്തയോടെ വീണ്ടും പ്രലോഭനത്തിനു വഴങ്ങുന്നു; ഇങ്ങനെ അതു തുടർന്നുകൊണ്ടേയിരിക്കുന്നു. നാളെ മാറാമെന്ന നല്ല ഉദ്ദേശ്യം നിരന്തരം മനസ്സിൽ സൂക്ഷിച്ചുകൊണ്ടുതന്നെ, നമ്മുടെ പാപങ്ങൾ തുടരാനും പ്രലോഭനങ്ങളെ സ്വീകരിക്കാനും നമുക്ക് എളുപ്പം കഴിയും. രണ്ടു കാരണങ്ങളാൽ ഇതു തെറ്റാണ്.
ഒന്നാമതായി, നമ്മുടെ കർത്താവ് ഇന്നു തന്നെ വരാനും, ഇന്ന് യഥാർഥത്തിൽ ലോകാവസാനമാകാനുമുള്ള സാധ്യത എപ്പോഴും നിലനിൽക്കുന്നു. അല്ലെങ്കിൽ, നിങ്ങളുടെ ജീവിതം ഇന്നു പെട്ടെന്നും അപ്രതീക്ഷിതമായും അവസാനിക്കാനുള്ള സാധ്യതയും എപ്പോഴും നിലനിൽക്കുന്നു. അങ്ങനെ സംഭവിച്ചാൽ, ക്രിസ്തുവിന്റെ ന്യായാസനത്തിനു മുമ്പിൽ നിൽക്കാൻ നിങ്ങൾ പൂർണമായി ഒരുങ്ങിയിരിക്കുമോ? മിക്കവരും അങ്ങനെയായിരിക്കില്ല; കുറഞ്ഞപക്ഷം, പൂർണമായി ഒരുങ്ങിയിരിക്കുകയില്ല. അതിനാൽ, ഇപ്പോഴും ഇനിയുള്ള ഓരോ നിമിഷവും ഒരുങ്ങിയിരിക്കാനായി ഇന്ന് അക്ഷീണം പരിശ്രമിക്കാൻ ഇതുതന്നെ മതിയായ പ്രചോദനമാകണം.
എന്നാൽ നമ്മുടെ കർത്താവിന്റെ ഈ പ്രവചനം ഓരോ ദിവസത്തെയും ഓരോ വർത്തമാന നിമിഷത്തിനും ബാധകമാണെന്നും നാം കാണണം. കൃപയാൽ അവിടുത്തെ സേവിക്കാൻ നമ്മെ ക്ഷണിച്ചുകൊണ്ട്, പെട്ടെന്നും മുന്നറിയിപ്പില്ലാതെയും യേശു എപ്പോഴും നമ്മുടെ അടുത്തേക്ക് വന്നുകൊണ്ടിരിക്കുന്നു. ഈ സുവിശേഷഭാഗം ഇപ്രകാരം പറയുന്നു: “തന്റെ ജീവൻ സംരക്ഷിക്കാൻ ശ്രമിക്കുന്നവൻ അതു നഷ്ടപ്പെടുത്തും; എന്നാൽ അതു നഷ്ടപ്പെടുത്തുന്നവൻ അതു രക്ഷിക്കും.” ഇത് നമ്മുടെ ജീവിതാന്ത്യത്തിനും ലോകാവസാനത്തിനും ബാധകമാണ്; എന്നാൽ ഓരോ ദിവസത്തെയും ഓരോ വർത്തമാന നിമിഷത്തിനും ഇതു ബാധകമാണ്. നമ്മുടെ ജീവൻ നഷ്ടപ്പെടുത്താൻ നാം നിരന്തരം ശ്രമിക്കുന്നുവെങ്കിൽ, അതായത്, അനുദിനം നമ്മെ പ്രലോഭിപ്പിക്കുന്ന താൽക്കാലികമായ ലൗകികസുഖങ്ങൾക്കുപകരം സ്വർഗീയ യാഥാർഥ്യങ്ങളെ നാം തിരഞ്ഞെടുക്കുന്നുവെങ്കിൽ, നമ്മുടെ ജീവിതത്തിലെ ഓരോ വർത്തമാന നിമിഷത്തിലും, ഇവിടെ ഇപ്പോൾത്തന്നെ, രക്ഷയുടെ കൃപ നാമും അനുദിനം അനുഭവിക്കും.
ദൈവരാജ്യത്തിനുവേണ്ടി നിങ്ങളുടെ ജീവൻ നഷ്ടപ്പെടുത്താൻ നിങ്ങൾ പതിവായി ശ്രമിക്കുന്നുണ്ടോ എന്ന് ഇന്ന് ചിന്തിക്കുക. ജീവിതത്തിലെ ഓരോ ദിവസവും ഓരോ നിമിഷവും കൃപ, കരുണ, സ്വർഗം, അനുസരണം, സ്നേഹം, ആത്മത്യാഗം, അനുകമ്പ, ക്ഷമ തുടങ്ങിയവ നിങ്ങൾ നിരന്തരം തിരഞ്ഞെടുക്കുന്നുണ്ടോ? അങ്ങനെയെങ്കിൽ, നമ്മുടെ കർത്താവ് ഇവിടെ ഇപ്പോൾത്തന്നെ തന്റെ രക്ഷാകരകൃപയുടെ ദാനം നിങ്ങൾക്കു നിരന്തരം നൽകി, വിധിയുടെ അന്തിമനിമിഷത്തിനായി നിങ്ങളെ ഒരുക്കും. അല്ലെങ്കിൽ, ഒട്ടും പ്രതീക്ഷിക്കാത്ത സമയത്ത് പെട്ടെന്നുള്ള നാശത്തെ നേരിട്ട നോഹയുടെയും ലോത്തിന്റെയും കാലത്തെ ജനങ്ങളെപ്പോലെയാകും നിങ്ങൾ. ഇപ്പോൾ, ഇന്ന്, ഈ നിമിഷത്തിൽ ദൈവത്തിനായി ജീവിക്കുക; അങ്ങനെ ചെയ്തതിൽ നിങ്ങൾ നിത്യവും നന്ദിയുള്ളവരായിരിക്കും.
എപ്പോഴും സന്നിഹിതനായ എന്റെ കർത്താവേ, അങ്ങ് എല്ലായ്പ്പോഴും പെട്ടെന്നും അപ്രതീക്ഷിതമായും എന്റെ അടുത്തേക്കു വരുന്നു. എന്നിട്ടും പലപ്പോഴും ഞാൻ അങ്ങയെ കേൾക്കുകയോ അങ്ങയുടെ സാന്നിധ്യം തിരിച്ചറിയുകയോ ചെയ്യുന്നില്ല. താൽക്കാലിക സുഖഭോഗങ്ങളെക്കാൾ സ്വർഗീയ യാഥാർഥ്യങ്ങളെ തിരഞ്ഞെടുത്തുകൊണ്ട്, അങ്ങേക്കുവേണ്ടിയും അങ്ങയുടെ കൃപയാലും നിരന്തരം ജീവിക്കാൻ എന്നെ സഹായിക്കണമേ. എന്റെ ജീവിതത്തിലെ ഓരോ നിമിഷവും അങ്ങയെ കണ്ടുമുട്ടിക്കൊണ്ടും, വിധിയുടെ സമയത്ത് അങ്ങയുമായുണ്ടാകുന്ന മഹത്വപൂർണമായ ആ അന്തിമസമാഗമം പ്രതീക്ഷിച്ചുകൊണ്ടും എപ്പോഴും ഇങ്ങനെ ജീവിക്കാൻ എനിക്കു കഴിയട്ടെ. ഈശോയേ, ഞാൻ അങ്ങയിൽ ശരണപ്പെടുന്നു.
ക്രിസ്തുരാജനോടുള്ള നൊവേന
പരമ്പരാഗതമായി ക്രിസ്തുരാജന്റെ മഹോത്സവത്തിനു മുമ്പുള്ള ഒൻപതു ദിവസങ്ങളിൽ
നവംബർ 15–23, 2024 ദിവസങ്ങളിൽ അനുദിനം ചൊല്ലുന്ന നൊവേന
ദൈവകരുണയെക്കുറിച്ചുള്ള വിചിന്തനങ്ങൾ
ഇന്നത്തെ വിശുദ്ധൻ – മെത്രാനും വേദപാരംഗതനുമായ മഹാനായ വിശുദ്ധ ആൽബർട്ട്
വിശുദ്ധ കുർബാനയിലെ വായനകൾക്കുള്ള വിവിധ തിരഞ്ഞെടുപ്പുകൾ
