मराठी

पुनरुत्थान सणाच्या हार्दिक शुभेच्छा!

१७ एप्रिल २०२२
पुनरुत्थान रविवार (वर्ष क)

आजची वाचने

व्हिडिओ

आलेलुया!  प्रभू उठला आहे!

दिवसभर वाळवंटात घालवल्यावर मोठा पेलाभर थंड पाणी प्यायल्याने जसा दिलासा मिळतो, तसाच दिलासा हे शब्द उच्चारताना मिळतो.  प्रायश्चित्तकाळ संपला आहे आणि आता पुनरुत्थानाचा महान आनंद साजरा करण्याची वेळ आली आहे!

पुनरुत्थानाच्या पूर्वसंध्येच्या जागरणविधीत मिस्साची सुरुवात अंधारात होते. त्या वेळी चर्चमध्ये सर्वत्र फक्त मेणबत्त्यांचा प्रकाश असतो आणि ‘एक्सुल्टेट’ हे स्तोत्र गायले जाते.  पाप आणि मृत्यू यांवर ख्रिस्ताने मिळवलेल्या विजयाचा आनंद व्यक्त करणारे हे एक सुंदर स्तोत्र आहे.  त्यातील एक भाग असा आहे:

हे आदामाच्या खरोखरच आवश्यक ठरलेल्या पापा, ख्रिस्ताच्या मृत्यूने तुझा संपूर्ण नाश केला!  हे धन्य अपराधा, तुझ्यामुळे आम्हाला एवढा महान आणि गौरवशाली मुक्तिदाता लाभला!

ही ओळ विशेष लक्ष वेधून घेते, कारण ती आदामाच्या पापाला ‘आवश्यक’ म्हणते आणि ‘हे धन्य अपराधा’ असे संबोधते.  प्रथम हे विचित्र वाटू शकते.  आदामाच्या पापाला, म्हणजेच मूळ पापाला, आपण ‘आवश्यक’ आणि ‘धन्य’ का म्हणतो?  याचे उत्तर पुनरुत्थानात आहे.  कारण देवाने आपल्या परिपूर्ण ज्ञानाने आणि प्रेमाने पाप आणि पापाचा परिणाम म्हणजे मृत्यू, या दोन्हींचा उपयोग जगाच्या तारणाचे साधन म्हणून केला.  हाच पुनरुत्थानाच्या सणाचा खरा अर्थ आहे!

हे समजून घेणे कठीण वाटू शकते, म्हणून यावर अधिक खोलवर विचार करायला हवा.  आदामाने पाप केले नसते, तर येशू आपल्यामध्ये आला नसता.  देवाला आपल्यापैकी एक व्हावे लागले नसते.  आदामाचे मूळ पाप आणि त्यानंतरची सर्व पापे वाईट आणि अयोग्य असली, तरी देवाने आपल्या परिपूर्ण सामर्थ्याने आणि प्रेमाने पापाचाच उपयोग जगाच्या तारणाचे साधन म्हणून करण्याचे ठरवले.  कसे?  जगाच्या पापांमुळे स्वतःचा छळ होऊ दिला आणि स्वतःला क्रुसावर खिळू दिले; मग त्याच यातना आणि त्याच मृत्यूचे रूपांतर तारणाच्या साधनात केले.  पापाचा परिणाम म्हणजे मृत्यू; तो नाहीसा करून येशूने पापाचा नाश केला.  पुनरुत्थानात मृत्यूचा पराभव होतो!  जे येशूला घट्ट धरून राहतात, त्यांच्यासाठी त्याचे पुनरुत्थान सर्व पापांचे परिणाम दूर करते.

पुनरुत्थानाच्या सणात आपण नेमके हेच केले पाहिजे.  आपल्या पुनरुत्थित प्रभूला आपण ‘घट्ट धरून’ राहिले पाहिजे!  जिवंत असलेल्या येशूला आपण घट्ट धरून राहिले पाहिजे.  त्याच्या पुनरुत्थानावर आपली आशा दृढ ठेवून त्यात सहभागी होण्याचा आपण प्रयत्न केला पाहिजे.  आपल्या पुनरुत्थित प्रभूला आपण कसे धरून राहू शकतो?  त्यासाठी अनेक मार्ग आहेत.  त्यांपैकी एक असा आहे.

प्रत्येक गोष्टीत आनंद शोधा.  ज्या गोष्टीचे ओझे तुम्हाला सर्वांत जास्त जाणवते, तिथून सुरुवात करा.  ज्या गोष्टीमुळे तुम्हाला राग येतो, दुःख होते किंवा तुम्ही खचून जाता, ती कोणतीही असो.  तीच तुमच्यासाठी कृपेचा आणि आनंदाचा एक मोठा स्रोत बनू शकते.  हो, हे खरोखर शक्य आहे.  देवाचा पुत्र येशू याला क्रुसावर खिळण्याची क्रूर घटना जर संपूर्ण मानवजातीच्या इतिहासातील सर्वांत महान घटना ठरू शकते, तर तुमचे वैयक्तिक दुःख, तुमचे ओझे किंवा अगदी तुमचे पापही मोठ्या आनंदाचा स्रोत बनू शकते. त्यासाठी देवाला त्या गोष्टीचे रूपांतर त्याच्या पुनरुत्थानातील सहभागात करू द्या!

हाच पुनरुत्थानाच्या सणाचा अर्थ आहे!  देव आपल्याला जो आनंद देऊ इच्छितो, त्यापासून कोणतीही गोष्ट आपल्याला दूर ठेवू शकत नाही, हीच या सणाची घोषणा आहे.  तो आनंद कोणीही हिरावून घेऊ शकत नाही.  गेथसेमनीच्या बागेत येशूने यातना सोसल्या आणि व्हिया दोलोरोसा (क्रुसाचा मार्ग) चालताना त्याला दुःख सहन करावे लागले. तसेच आपल्यालाही कधी कधी संघर्ष करावा लागेल, पण त्या दुःखांचा विजय होणार नाही.  ख्रिस्ताच्या पुनरुत्थानात विजय मिळाला आणि आपण त्याला घट्ट धरून राहिलो, तर त्याच्या पुनरुत्थानाचा विजय आपल्या जीवनातही दिसून येईल.  येशू शेवटपर्यंत खंबीर राहिला आणि अखेरीस विजयी होऊन उठला.  हाच पुनरुत्थानाचा सण!

पुनरुत्थानाचा आनंद तुम्ही आपल्या जीवनात अनुभवावा, अशी देवाची इच्छा आहे, हे लक्षात ठेवा.  केवळ पुनरुत्थानातून मिळणाऱ्या आशेने आणि आनंदाने देवाला तुमचे अंतःकरण भरू द्या.  पुनरुत्थानाचा सण आपल्या जीवनात आत्ताच सुरू व्हावा, अशी देवाची इच्छा आहे!  पुनरुत्थान सणाच्या हार्दिक शुभेच्छा!

हे माझ्या जीवनाचे रूपांतर करणाऱ्या प्रभू, तुझ्या पुनरुत्थानात मला तुझ्याशी घट्ट जोडून राहण्यास मदत कर.  माझ्या जीवनातील प्रत्येक क्रूस आणि प्रत्येक ओझे यांचे रूपांतर तुला आनंदात करू देता यावे, म्हणून मला मदत कर.  प्रभू, तुझ्या आनंदाने माझे जीवन भरून जाऊ दे आणि प्रत्येक गोष्टीत तोच माझे बळ ठरो.  हे येशू, माझा तुझ्यावर विश्वास आहे.

तिसरा दिवस: दैवी दयेच्या रविवारच्या तयारीची नोव्हेना

ईस्टरसाठी आणखी साहित्य

ईस्टरसाठी प्रार्थनामय चिंतन

जपमाळ – गौरवाची रहस्ये (पवित्र शास्त्रातील उताऱ्यांसह)

शुभवर्तमानावरील आणखी चिंतने

दैवी दयेवरील दैनंदिन चिंतन

संत फॉस्टिनाची दैवी दयेची विनवणीमाला

दैवी दयेवर भरवसा

दयेच्या वर्षासाठी प्रार्थना

दैवी दयेची जपमाळ

मिस्साच्या वाचनांचे पर्याय

आजचे संत आणि सण

वरील निवडक चित्र: ‘ख्रिस्ताचे पुनरुत्थान’ — चित्रकार नोएल कॉयपेल, विकिमीडिया कॉमन्सच्या सौजन्याने