Machi 26, 2020
Alhamisi ya Juma la Nne la Kwaresima
Masomo ya Leo
Sikiliza kwa Kiingereza
“Matendo ambayo Baba alinipa niyatimize, matendo haya ninayofanya yananishuhudia kwamba Baba amenituma.” Yohane 5:36
Yale matendo aliyofanya Yesu yanatoa ushuhuda kuhusu utume Wake aliopewa na Baba wa Mbinguni. Kuelewa hili kutatusaidia kuukubali kwa moyo wote utume wetu wenyewe maishani.
Kwanza kabisa, tuangalie ukweli kwamba matendo ya Yesu yalitoa ushuhuda. Kwa maneno mengine, matendo Yake yaliwapa wengine ujumbe kuhusu Yeye alikuwa nani. Ushuhuda wa matendo Yake ulifunua kiini cha nafsi Yake na umoja Wake na mapenzi ya Baba.
Basi hili linazua swali, “Ni matendo gani yaliyotoa ushuhuda huu?” Mtu anaweza kuhitimisha mara moja kwamba matendo ambayo Yesu alikuwa akiyazungumzia yalikuwa miujiza Yake. Watu walipoishuhudia miujiza aliyofanya, bila shaka wangesadiki kwamba alikuwa ametumwa na Baba wa Mbinguni. Sivyo? Si hasa. Ukweli ni kwamba kulikuwa na watu wengi waliomwona Yesu akifanya miujiza lakini wakaendelea kuwa na mioyo migumu, wakikataa kuikubali miujiza Yake kuwa uthibitisho wa umungu Wake.
Ingawa miujiza Yake ilikuwa ya ajabu na ilikuwa ishara kwa wale waliokuwa tayari kuamini, “tendo” lenye kina zaidi alilofanya lilikuwa lile la upendo Wake mnyenyekevu na wa kweli. Yesu alikuwa wa kweli, mwaminifu na mwenye moyo safi. Kila fadhila ambayo mtu angeweza kuwa nayo ilidhihirika ndani Yake. Kwa hiyo, ushuhuda uliotolewa na matendo Yake ya kawaida ya upendo, utunzaji, kujali na kufundisha ndio ambao ungevutia mioyo mingi kwanza kabisa. Kwa hakika, kwa wale waliokuwa na mioyo iliyo wazi, miujiza Yake ilikuwa, kwa namna fulani, kama mapambo tu juu ya keki. “Keki” yenyewe ilikuwa uwepo Wake wa kweli uliofunua huruma ya Baba.
Huwezi kufanya miujiza kwa nguvu za Mungu (isipokuwa umepewa karama ya pekee ya kufanya hivyo), lakini unaweza kuwa shahidi wa Ukweli na kuwashirikisha wengine yaliyo katika Moyo wa Baba wa Mbinguni ikiwa kwa unyenyekevu unajitahidi kuwa na moyo safi na kuuruhusu Moyo wa Baba wa Mbinguni uangaze kupitia wewe katika matendo yako ya kila siku. Hata tendo dogo kabisa la upendo wa kweli linawaambia wengine mengi sana.
Tafakari leo juu ya wito wako wa kumshuhudia Baba wa Mbinguni. Umeitwa kuwashirikisha upendo wa Baba wote unaokutana nao. Ukiukubali utume huu kwa moyo wote, kwa njia kubwa na ndogo, Injili itadhihirishwa kwa wengine kupitia wewe, na mapenzi ya Baba yatatimizwa kwa ukamilifu zaidi katika ulimwengu wetu.
Bwana, ninaomba niwe shahidi wa upendo unaotiririka kutoka Moyoni Mwako. Nipe neema ya kuwa mtu halisi, wa kweli na mnyofu. Nisaidie kuwa chombo safi cha Moyo Wako wenye huruma ili matendo yangu yote yatoe ushuhuda wa huruma Yako. Yesu, nakutumainia.
Siku 40 Chini ya Msalaba – Tafakari ya Ishirini na Tisa – Yesu Anainuliwa Msalabani
Tafakari juu ya Huruma ya Mungu
Machaguo ya Masomo ya Misa Takatifu
_-_DSC01566.JPG){kind=link}