Mama wa Yesu ni Mama wa Mungu

Ijumaa, Januari 1, 2021
Sherehe ya Maria, Mama wa Mungu
Siku ya Oktava ya Noeli, Januari 1

Masomo ya Leo

Naye Maria akayahifadhi mambo haya yote, akiyatafakari moyoni mwake.  Luka 2:19

Leo, Januari 1, tunakamilisha adhimisho letu la oktava ya Siku ya Noeli. Jambo la kiliturujia ambalo mara nyingi halizingatiwi ni kwamba tunasherehekea Siku ya Noeli kwa siku nane mfululizo. Tunafanya hivyo pia kwa Siku ya Pasaka, ambayo oktava yake inahitimishwa kwa adhimisho kuu la Jumapili ya Huruma ya Mungu.

Katika siku hii ya nane ya Oktava ya Noeli, tunaelekeza mawazo yetu kwenye ukweli wa pekee na mzuri kwamba Mungu alichagua kuingia katika ulimwengu wetu kupitia mama wa kibinadamu. Maria anaitwa “Mama wa Mungu” kwa sababu iliyo wazi kwamba Mwana wake ni Mungu. Hakuwa mama wa mwili wa Mwana wake pekee, wala mama wa asili Yake ya kibinadamu tu. Hii ni kwa sababu Nafsi ya Yesu, Mwana wa Mungu, ni Nafsi moja. Na Nafsi hiyo moja ilitwaa mwili katika tumbo la Bikira Maria Mwenye Heri.

Ingawa kuwa Mama wa Mungu kulikuwa zawadi tupu kutoka Mbinguni, wala si jambo ambalo Mama Maria alilistahili kwa uwezo wake mwenyewe, alikuwa na sifa moja maalumu iliyomfanya afae kwa namna ya pekee kutimiza jukumu hilo. Sifa hiyo ilikuwa asili yake isiyo na doa.

Kwanza, Mama Maria alikingwa na kila dhambi alipotungwa mimba katika tumbo la mama yake, Mtakatifu Anna. Neema hii ya pekee alipewa kutokana na maisha, kifo na ufufuko wa Mwana wake, ambayo yangetokea baadaye. Ilikuwa neema ya wokovu, lakini Mungu alichagua kuichukua zawadi hiyo ya neema na kuvuka mipaka ya wakati ili ampe wakati uleule alipotungwa mimba, na hivyo kumfanya awe chombo kikamilifu na safi kilichohitajika ili kumleta Mungu ulimwenguni.

Pili, Mama Maria alibaki mwaminifu kwa zawadi hii ya neema katika maisha yake yote, bila kamwe kuchagua kutenda dhambi, bila kamwe kuyumba, wala kumwacha Mungu. Alibaki bila doa katika maisha yake yote. Jambo la kuvutia ni kwamba uchaguzi wake huu wa kubaki daima mtiifu kwa mapenzi ya Mungu katika kila hali ndio unaomfanya awe Mama wa Mungu kwa ukamilifu zaidi kuliko tendo tu la kumbeba tumboni mwake. Tendo lake la kuungana kikamilifu na mapenzi ya Mungu katika maisha yake yote linamfanya pia awe mama mkamilifu wa neema na huruma ya Mungu, na daima Mama wa Mungu kwa namna ya kiroho, akimleta katika ulimwengu wetu daima na kwa ukamilifu.

Tafakari leo mafumbo haya matukufu sana ya imani yetu. Siku hii ya nane ya Oktava ya Noeli ni adhimisho kuu, adhimisho linalostahili kutafakariwa nasi kwa kina. Maandiko Matakatifu yaliyo hapo juu yanafunua si tu jinsi Mama yetu mwenye heri alivyolipokea fumbo hili, bali pia jinsi sisi tunavyopaswa kulipokea. Yeye “aliyahifadhi mambo haya yote, akiyatafakari moyoni mwake.” Nawe yatafakari mafumbo haya moyoni mwako, na uruhusu neema ya adhimisho hili takatifu ikujaze furaha na shukrani.

Mama Maria mpendwa sana, ulijaliwa neema ipitayo nyingine zote. Ulikingwa na kila dhambi na ukabaki mtiifu kikamilifu kwa mapenzi ya Mungu katika maisha yako yote. Kwa hiyo, ukawa chombo kikamilifu cha Mwokozi wa Ulimwengu kwa kuwa mama Yake, Mama wa Mungu. Uniombee ili niweze kutafakari fumbo hili kuu la imani yetu leo na kuzidi daima kufurahia kwa kina zaidi uzuri usioweza kufahamika wa roho yako ya kimama. Mama Maria, Mama wa Mungu, utuombee.  Yesu, nakutumainia.

Tazama nyenzo zetu za Krismasi!

Tafakari za Maandiko Matakatifu

Tafakari Zaidi za Injili

Tafakari juu ya Huruma ya Mungu

Watakatifu/Sikukuu Zote

Sherehe ya Bikira Maria Mwenye Heri, Mama wa Mungu 

Machaguo ya Masomo ya Misa Takatifu

Kristo, Mshumaa wa Matumaini

Sala ya Krismasi

Picha iliyoangaziwa hapo juu: Maria akiwa na Mtoto, iliyochorwa na William-Adolphe Bouguereau

Tazama pia:

Upendo wa Mama