Mwaliko Kutoka kwa Baba

Agosti 19, 2021
Alhamisi ya Juma la Ishirini la Kipindi cha Mwaka
Masomo ya Leo

Mtakatifu Yohane Eudes, Padri—Kumbukumbu ya Hiari

Sikiliza kwa Kiingereza

“Ufalme wa mbinguni unaweza kufananishwa na mfalme aliyemwandalia mwanawe karamu ya arusi. Aliwatuma watumishi wake kuwaita wageni walioalikwa karamuni, lakini walikataa kuja.” Mathayo 22:2–3

Mfalme katika mfano huu ni Mungu Baba, na arusi ni ndoa kati ya Kristo na Kanisa. Baba anamwalika kila mmoja wetu kuwa mshiriki wa Kanisa na kuingia katika muungano wa kimungu na Mwanawe Yesu, na hivyo kuingia katika uzima wa Utatu Mtakatifu. Lakini tunaona mara moja katika mfano huu kwamba wageni walioalikwa “walikataa kuja.” Mfano unapoendelea, mfalme alijitahidi hata zaidi kuwaalika wageni, lakini wote waliitikia kwa mojawapo ya njia mbili. “Wengine waliupuuza mwaliko wakaenda zao…” na “Waliobaki waliwakamata watumishi wake, wakawatendea vibaya, na kuwaua.” Kwa wazi, hili halikuwa jibu ambalo mfalme huyo mkarimu alilitumainia.

Katika majibu haya mawili tunaona viwango viwili vya kuikataa Injili vilivyopo katika ulimwengu wetu leo, kama ilivyokuwa wakati wa Yesu. Kiwango cha kwanza cha kuikataa ni kutojali. Watu wengi wana shughuli nyingi sana leo. Kwa urahisi tunajishughulisha na mambo mengi ambayo hatimaye yana umuhimu mdogo. Wengi wamemezwa na simu zao janja, kompyuta na vishikwambi. Wengi hutumia saa zisizohesabika kutazama televisheni. Wengine huwa waraibu wa kazi, wakitumia muda wao mwingi katika shughuli zao za kazi na kuacha muda mchache kwa yale yaliyo muhimu zaidi, kama vile familia, sala na huduma. Kwa hiyo, ni rahisi sana kutojali mambo ya imani na kushindwa kusali kila siku ili kutafuta na kutimiza mapenzi ya Mungu. Kutojali huku ni jambo zito sana.

Pia kuna kuikataa imani katika ulimwengu wetu kupitia uadui unaozidi kuongezeka dhidi ya Kanisa na maadili. Kuna njia nyingi ambazo ulimwengu wa kilimwengu unaendelea kutumia kuendeleza utamaduni ulio kinyume na Injili. Na Wakristo wanapotoa sauti zao na kupinga mielekeo hii mipya ya kitamaduni, wanashutumiwa na mara nyingi wanatajwa kuwa watu wenye chuki za upendeleo au wenye kuwahukumu wengine. Uovu wa namna hiyo ulidhihirishwa na wageni katika mfano huu ambao “waliwakamata watumishi wake, wakawatendea vibaya, na kuwaua.” Uadui dhidi ya Kanisa, imani na kanuni wazi za maadili zilizowekwa na Mungu unaonekana kuongezeka kila mwaka. Namna hii ya kuikataa Injili ina madhara makubwa hata kuliko kutojali tu kulikotajwa hapo juu. Katika mfano huu wa leo, Yesu anasema kwamba, katika kuwajibu wale waliokuwa hawajali na wenye uadui, mfalme “alituma askari wake, akawaangamiza wauaji hao, na kuuteketeza mji wao.”

Mfano huu haupaswi kusomwa kwa namna inayotufanya tuwatazame wengine na kuwahukumu kana kwamba sisi ndio mfalme na tuna haki ya kufanya hivyo. Hatuna haki hiyo. Mungu pekee ndiye mwenye haki hiyo. Badala yake, mfano huu unapaswa kusomwa kwa kuutazama katika mwanga wa maisha yako mwenyewe. Tunatumaini kwamba wewe si mmoja wa wale wenye uadui dhidi ya Injili. Lakini huenda wewe na Wakristo wengine wengi mnapambana na namna ya kwanza ya kuikataa: kutojali. Tunaweza kwa urahisi kuingia katika hali ya kutojali kwa njia nyingi na katika viwango mbalimbali. Kinyume cha kutojali ni kujali, tena kujali sana kuhusu kwenda kwenye karamu ya arusi unapoalikwa.

Tafakari leo kuhusu Karamu ya Arusi unayoalikwa kuhudhuria. Unaalikwa kuingia katika sherehe tukufu ya kuwa mmoja na Mwokozi wa Ulimwengu. Unaalikwa kuyakabidhi maisha yako Kwake bila kujibakizia chochote. Unaalikwa kuishi katika utakatifu, uadilifu, uaminifu thabiti kwa Mungu, kuwatumikia wengine, mapendo yasiyo na mipaka na mengine mengi zaidi. Kuingia katika Karamu ya Arusi ya Mwanakondoo ni jambo linalopaswa kutokea kila siku na kila dakika ya siku yako kwa maisha yako yote yaliyobaki. Mungu anakualika. Je, utasema “Ndiyo” kwa nafsi yako yote?

Bwana wangu unayenialika, unatamani watu wote waukubali kikamilifu mwaliko uliowapa wa kuwa mmoja Nawe kwa njia ya ndoa ya kiroho. Unatuita kwenye Karamu tukufu ya Arusi na furaha ya milele. Nisije kamwe nikaupuuza mwaliko Wako, bali niitikie daima kwa moyo wangu wote. Ninakupenda, Bwana mpendwa. Unisaidie nikupende zaidi na zaidi. Yesu, nakutumainia.

Tafakari Zaidi za Injili

Tafakari juu ya Huruma ya Mungu

Tafakari za Maandiko Matakatifu kwa Kipindi cha Mwaka

Watakatifu/Sikukuu Zote

Mtakatifu wa Siku – Mtakatifu Yohane Eudes, Padri

Machaguo ya Masomo ya Misa Takatifu

Picha iliyoangaziwa hapo juu: Mfano wa Karamu Kuu uliochorwa na Brunswick Monogrammist, kupitia Wikimedia Commons

MPYA!
Tafakari za Septemba–Novemba sasa zinapatikana katika muundo wa kitabu cha kielektroniki & kitabu chenye jalada laini.