ஆகஸ்ட் 8, 2021
பொதுக்காலம் பத்தொன்பதாம் ஞாயிறு (ஆண்டு B)
இன்றைய வாசகங்கள்
யூதர்கள் இயேசுவைப் பற்றி முணுமுணுத்தார்கள்…இயேசு அவர்களிடம் மறுமொழியாக, “உங்களுக்குள் முணுமுணுப்பதை நிறுத்துங்கள்” என்றார். யோவான் 6:41&43
இயேசுவைப் பற்றிப் புறணி பேசினார்கள்; அவரை ஏளனம் செய்தார்கள், இகழ்ந்தார்கள், இன்னும் பலவாறு நடத்தினார்கள். அவரைப் பற்றி “முணுமுணுத்தார்கள்.” மக்கள் இப்படிச் செய்தது எவ்வளவு அறிவீனமான செயல்!
மேலே உள்ள பகுதியில், இயேசு தமது மிக மாட்சிமைமிக்க, ஆழமான போதனைகளுள் ஒன்றை வழங்கிக்கொண்டிருந்தார். வாழ்வளிக்கும் அப்பமாகத் தமது உடலையும் இரத்தத்தையும் கொடையாக அளிக்கும் மகா பரிசுத்த நற்கருணையைப் பற்றிய தமது போதனையை அவர் தொடர்ந்துகொண்டிருந்தார். “விண்ணகத்திலிருந்து இறங்கிவந்த வாழ்வளிக்கும் அப்பம் நானே; இந்த அப்பத்தை உண்பவர் என்றென்றும் வாழ்வார்; உலகு வாழ்வதற்காக நான் கொடுக்கும் அப்பம் எனது சதையே” என்று அவர் கூறினார். இந்தப் போதனையைக் கேட்டதும், அவர்கள் அவரைப் பற்றி முணுமுணுத்தார்கள்.
அக்காலத்தில் பலர் இப்படிச் செய்தது எவ்வளவு அறிவீனமான செயல் என்பதை மீண்டும் எண்ணிப் பாருங்கள். ஆனால் வருத்தத்திற்குரிய வகையில், இதே செயல் இன்றும் பல்வேறு விதங்களில் தொடர்கிறது. ஒவ்வொரு ஞாயிற்றுக்கிழமையும், நம்மால் இயலுமென்றால் ஒவ்வொரு நாளும், மெசியாவும் அரசர்களுக்கெல்லாம் அரசரும் உலகின் மீட்பரும் படைப்பாளரும் எல்லாம் வல்லவரும் மாட்சிமை நிறைந்த கடவுளுமானவரின் உடலையும் இரத்தத்தையும் ஆன்மாவையும் இறைத்தன்மையையும் உட்கொள்ளும் வாய்ப்பு நமக்கு அளிக்கப்படுகிறது! இருந்தும், நம்மில் பலர் என்ன செய்கிறோம்? ஆர்வமின்றியும் கவனச்சிதறலோடும் திருப்பலிக்கு வருகிறோம்; திருப்பலியில் நாம் செய்துகொண்டிருப்பதைவிட, அன்றைய நாளில் பின்னர் என்ன செய்யப்போகிறோம் என்பதிலேயே அதிக அக்கறை கொண்டிருக்கிறோம்.
இது மாற்றப்பட வேண்டிய வருத்தத்திற்குரிய ஓர் உண்மை. “திருப்பலி என்னும் கொடையை நாம் புரிந்துகொண்டால், அன்பின் மிகுதியால் அக்கணமே இறந்துவிடுவோம்” என்று புனித ஜான் வியான்னி கூறினார். நீங்கள் திருப்பலியைப் புரிந்துகொள்கிறீர்களா?
நற்கருணையைப் பற்றிய இயேசுவின் போதனையைக் குறித்து முணுமுணுப்பது என்பது, நாம் வாய்விட்டுச் சொல்வதாக மட்டுமே இருக்க வேண்டியதில்லை. மாட்சிமைமிக்க இக்கொடையைப் புரிந்துகொள்ளவும் ஏற்றுக்கொள்ளவும் அதில் ஆழ்ந்து ஈடுபடவும் தவறும்போது, நம் உள்ளத்தில் இயேசுவைப் பற்றி “முணுமுணுக்கிறோம்.” இக்கொடையைக் குறித்த முழுமையான நம்பிக்கையும், அதை முழுமனதோடு ஏற்றுக்கொள்ளும் மனநிலையும் இல்லாதிருப்பதே முணுமுணுத்தலுக்கு ஒப்பானது. ஒருவேளை நாம் வெளிப்படையாக வார்த்தைகளால் முணுமுணுக்காமல் இருக்கலாம். ஆனால் விலைமதிப்பற்ற இக்கொடையில் ஆர்வமின்றி இருப்பதன் வழியாக, உள்ளத்தில் முணுமுணுப்பதை நாம் கண்டுகொள்ளலாம்.
உங்கள் இதயம் நற்கருணையில் முழுமையாக ஈடுபட்டிருக்கிறதா இல்லையா என்பதை இன்று சிந்தித்துப் பாருங்கள். திருப்பலிக்குச் செல்வதைப் பற்றி நினைக்கும்போது, மகிழ்ச்சியும் ஆழ்ந்த ஆன்மிக ஏக்கமும் உங்களை ஆட்கொள்கின்றனவா? அல்லது, அதை நீங்கள் நிறைவேற்ற வேண்டிய ஒரு கடமையாகப் பார்க்கிறீர்களா? அதை நிறைவேற்ற வேண்டிய கடமையாகவே பெரும்பாலும் கருதுகிறீர்கள் என்றால், நீங்கள் உணர்ந்திருப்பதைவிட அதிகமான “முணுமுணுப்பு” உங்கள் உள்ளத்தில் இருக்கக்கூடும்.
ஆண்டவரே, திருப்பலியில் உம்மைக் காண எனக்கு உதவியருளும். மகா பரிசுத்த நற்கருணையில் உமக்காக ஏங்க எனக்கு உதவியருளும். தகுந்த நம்பிக்கையும் பக்தியும் எனக்கு ஒருபோதும் குறையாதிருப்பதாக. இந்தப் புனிதக் கொடையில் பிரசன்னமாயிருக்கும் உம்மீது ஆழ்ந்த அன்பால் நான் எப்போதும் நிறைந்திருப்பேனாக! இயேசுவே, உம்மில் நம்பிக்கை வைக்கிறேன்.
பொதுக்காலத்திற்கான இறைவார்த்தைத் தியானங்கள்
அனைத்துப் புனிதர்கள்/திருவிழாக்கள்
இன்றைய புனிதர் – புனித தொமினிக், அருள்பணியாளர்
இந்த ஆண்டு ஞாயிற்றுக்கிழமையில் வருவதால், வழிபாட்டு நினைவுநாளாகக் கொண்டாடப்படுவதில்லை
திருப்பலி வாசிப்புகளுக்கான தெரிவுகள்
