நவம்பர் 20, 2023
பொதுக்காலம் முப்பத்துமூன்றாம் வாரம் திங்கள்
இன்றைய வாசகங்கள்
இயேசு எரிகோவை நெருங்கியபோது, பார்வையற்ற ஒருவர் சாலையோரத்தில் அமர்ந்து பிச்சை கேட்டுக்கொண்டிருந்தார். மக்கள் கூட்டம் கடந்து செல்வதைக் கேட்டு, என்ன நடக்கிறது என்று அவர் விசாரித்தார். அவர்கள் அவரிடம், “நாசரேத்து இயேசு கடந்து செல்கிறார்” என்று கூறினார்கள். அவர், “இயேசுவே, தாவீதின் மகனே, என்மீது இரக்கமாயிரும்!” என்று கூக்குரலிட்டார். முன்னே சென்றுகொண்டிருந்த மக்கள் அவரை அமைதியாக இருக்கச் சொல்லி அதட்டினார்கள். ஆனால் அவர், “தாவீதின் மகனே, என்மீது இரக்கமாயிரும்!” என்று இன்னும் உரக்கக் கூக்குரலிட்டுக்கொண்டிருந்தார். லூக்கா 18:35–39
லூக்கா நற்செய்தியில் பர்த்திமேயு என்று பெயரிடப்பட்டுள்ள இந்தப் பார்வையற்ற மனிதர் குணமடைந்த அழகிய நிகழ்வு, நாம் எவ்வாறு செபத்தில் இயேசுவிடம் வர வேண்டும் என்பதற்கு ஒரு முன்மாதிரியை நமக்கு அளிக்கிறது. பர்த்திமேயுவின் பலவீனம், மனத்திறந்த நிலை, நம்பிக்கை, விடாமுயற்சி ஆகியவற்றில் நாம் அவரைப் பின்பற்றும் பொருட்டு, அவரையும் கிறிஸ்துவுடனான அவரது சந்திப்பையும் ஓர் அடையாளச் சித்திரமாகக் கொண்டு தியானிக்க வேண்டும்.
முதலில், இந்தப் “பார்வையற்றவர் சாலையோரத்தில் அமர்ந்து பிச்சை கேட்டுக்கொண்டிருந்தார்.” நமது செபத்தை எவ்வாறு தொடங்க வேண்டும் என்பதற்கான மிகச் சிறந்த எடுத்துக்காட்டாக இதை நாம் காண வேண்டும். செபிக்கத் தொடங்கும்போது, நமது ஆன்மிக வாழ்வில் உள்ள சிறுமையையும் வலுவின்மையையும் மிகுந்த வறுமையையும் நாம் உணர வேண்டும். நாம் எதுவுமின்றிக் கடவுளிடம் வருகிறோம். பார்க்க இயலாதவர்களாக. பிச்சை கேட்பவர்களாக. நமது சொந்த ஆன்மிகத் தேவைகளை நாமே நிறைவுசெய்துகொள்ள இயலாதவர்களாக. பர்த்திமேயு இவ்வாறுதான் இருந்தார்; நாமும் இவ்வாறுதான் செபத்தில் நம் ஆண்டவரிடம் வர வேண்டும். சில வேளைகளில், நமது செபங்கள் மிகவும் உயர்ந்தவையாகவும் பக்திநிறைந்தவையாகவும் இருப்பதால், கடவுள் நம்மைக் கண்டு மிகவும் வியந்துபோவார் என்ற மாயையில் நாம் விழக்கூடும். இதுவே உங்கள் போராட்டமாக இருந்தால், நீங்கள் பரிசேயர்களைப் போலவே இருக்கிறீர்கள். ஆனால், பார்வையற்ற இந்த மனிதர்தான் நாம் பின்பற்ற வேண்டிய சிறந்த முன்மாதிரி. ஆகவே, உங்கள் செபத்தைத் தொடங்கும்போது, ஆன்மிக வறுமையும் தேவைகளும் நிறைந்த ஒரு பிச்சைக்காரரைப் போல நம் ஆண்டவரிடம் வாருங்கள்.
இந்தத் தாழ்ச்சியான நிலையில், இந்த நற்செய்தி நிகழ்வில் நடந்ததுபோலவே, “நாசரேத்து இயேசு கடந்து செல்கிறார்” என்பதை நீங்கள் உறுதியாக நம்பலாம். ஆகவே, தாழ்ச்சியுடனும் தேவைகளுடனும் நீங்கள் அமர்ந்திருக்கும்போது, கடந்து செல்லும் இயேசுவுக்காகக் காத்திருந்து, அவர்மீது கவனமாயிருங்கள். அவரது மென்மையான குரலுக்காகவும், அமைதியான உள்தூண்டுதலுக்காகவும், அமைதியளிப்பதும் ஐயத்திற்கு இடமில்லாததுமான அவரது பிரசன்னத்திற்காகவும் காத்திருங்கள்.
உங்களால் இவ்வாறு உங்களைத் தாழ்த்திக்கொண்டு, நம் ஆண்டவரின் தெய்வீகப் பிரசன்னம் ஏதோ ஒரு விதத்தில் உங்களைத் தொடுவதை உணர முடிந்தால், பர்த்திமேயுவை மேலும் பின்பற்றி, “இயேசுவே, தாவீதின் மகனே, என்மீது இரக்கமாயிரும்!” என்று உங்கள் உள்ளத்தில் கூக்குரலிடுங்கள். செபத்தில் உங்கள் இதயத்தின் ஆழத்திலிருந்து எழும் கூக்குரல், இயேசு “கடந்து செல்வதன்” விளைவாக எழ வேண்டும். அவரே தாமாக உங்களிடம் வருவதற்கு அது உங்கள் பதிலாக இருக்க வேண்டும். ஆன்மிகப் பொருளில், இயேசு கடந்து செல்லும்போது, நீங்கள் அவரை அழைப்பதற்காகக் காத்திருக்கிறார். நீங்கள் அவரை அழைக்க வேண்டும் என்று அவர் விரும்புகிறார். உறுதியான நம்பிக்கையுடனும் விடாமுயற்சியுடனும் நீங்கள் அவ்வாறு செய்ய வேண்டும் என்றும் அவர் விரும்புகிறார்.
பார்வையற்ற இந்தப் பிச்சைக்காரர் கூக்குரலிட்டபோது, அவரது வழியில் தடைகள் வைக்கப்பட்டன என்பதைக் கவனியுங்கள். மக்கள் “அவரை அமைதியாக இருக்கச் சொல்லி அதட்டினார்கள்.” ஆனால் இதுவும்கூட ஒரு கொடையாக இருந்தது; ஏனெனில், இது பர்த்திமேயுவை இன்னும் உரக்கக் கூக்குரலிடச் செய்தது. நமக்கும் அவ்வாறே: கவனச்சிதறல்கள், சோதனைகள், ஆறுதலின்மை அல்லது செபத்திற்கு எதிரான வேறு ஏதேனும் சவால்கள் போன்ற தடைகள் நமது செபத்தில் எழும்போது, அவற்றைக் கடந்து செல்ல வேண்டிய முட்டுக்கட்டைகளாகவே நாம் பார்க்க வேண்டும். இவ்வாறு செய்வது, இயேசுவுடனான நமது ஒன்றிப்பை ஆழப்படுத்தி, தடையாகத் தோன்றியதையே ஆசீர்வாதத்தின் ஊற்றாக மாற்றும்.
பார்வையற்ற இந்தப் பிச்சைக்காரரின் சாட்சியத்தின் வழியாக நமக்கு முன்வைக்கப்படும் ஆழ்ந்த செப வாழ்வின் இந்த நான்கு அம்சங்களையும் இன்று சிந்தித்துப் பாருங்கள். முதலாவதாக, செபத்தில் கடவுளை நோக்கித் திரும்பும்போது, உங்கள் வலுவின்மையையும் வறுமையையும் எண்ணிப் பாருங்கள். இரண்டாவதாக, நீங்கள் அவரை அழைப்பதற்காகக் காத்திருந்தபடி கடந்து செல்லும் கடவுளின் பிரசன்னத்தைக் கவனியுங்கள். மூன்றாவதாக, அவரை நோக்கிக் கூக்குரலிட்டு, இன்னும் அருகில் வருமாறு அவரை மன்றாடுங்கள். நான்காவதாக, செபத்திற்கு இடையூறாக இருக்கும் ஒவ்வொரு தடையையும் கடக்க முயலுங்கள்; கடவுளை நோக்கி இன்னும் அதிகமாகக் கூக்குரலிடுவதற்கான வாய்ப்புகளாக அந்தத் தடைகளைக் காணுங்கள்.
பரிவுமிக்க என் ஆண்டவரே, எனது வலுவின்மையிலும் வறுமையிலும் உம்மிடம் வருகிறேன்; உமது தெய்வீகத் தொடுதலும் குணமளித்தலும் தேவைப்படுபவனாக வருகிறேன். நீர் கடந்து செல்லும்போது, உமது பிரசன்னத்தை உணர்ந்து உம்மை அழைக்கிறேன். இயேசுவே, தயவுசெய்து என்னிடம் வாரும்; என்மீது இரக்கமாயிரும். உமது அன்புக்கு இடையூறாக இருக்கும் ஒவ்வொரு தடையையும் கடக்கவும், உம்மிடம் நான் கொண்டுள்ள அர்ப்பணிப்பிலிருந்து ஒருபோதும் தளராமல் எப்போதும் உம்மை நம்பவும் எனக்கு உதவியருளும். இயேசுவே, உம்மில் நம்பிக்கை வைக்கிறேன்.
கிறிஸ்து அரசருக்கு நவநாள் செபம்
நவம்பர் 17–25, 2023
பொதுக்காலத்திற்கான இறைவார்த்தைத் தியானங்கள்
இன்றைய புனிதர்கள்/திருவிழாக்கள்
திருப்பலி வாசிப்புகளுக்கான தெரிவுகள்
