தீயோனை எதிர்கொள்ளுதல்

ஜனவரி 9, 2024
பொதுக்காலத்தின் முதல் வாரச் செவ்வாய்க்கிழமை
இன்றைய வாசகங்கள்

அவர்களுடைய தொழுகைக்கூடத்தில் தீய ஆவி பிடித்த ஒருவர் இருந்தார். அவர், “நாசரேத்து இயேசுவே, எங்களுக்கும் உமக்கும் என்ன தொடர்பு? எங்களை அழிக்கவா வந்தீர்? நீர் யார் என்று எனக்குத் தெரியும்—நீர் கடவுளின் தூயவர்!” என்று கத்தினார். இயேசு அவரை அதட்டி, “பேசாதே! இவரை விட்டு வெளியே போ!” என்றார். மாற்கு 1:23–25

இயேசு பேய்களை நேரடியாக எதிர்கொண்ட பல நிகழ்வுகள் திருவிவிலியத்தில் உள்ளன. ஒவ்வொரு முறையும் அவர் அவற்றை அதட்டி, அவற்றின்மேல் தமது அதிகாரத்தைச் செலுத்தினார். மேலே உள்ள பகுதி அத்தகைய ஒரு நிகழ்வை எடுத்துக்காட்டுகிறது.

நற்செய்திகளில் அலகை மீண்டும் மீண்டும் தன்னை வெளிப்படுத்துவது, தீயோன் உண்மையிலேயே இருக்கிறான் என்பதையும், அவனைத் தகுந்த முறையில் எதிர்கொள்ள வேண்டும் என்பதையும் நமக்குச் சொல்கிறது. தீயோனையும் அவனுடன் சேர்ந்த பேய்களையும் எதிர்கொள்வதற்கான தகுந்த வழி, கிறிஸ்து இயேசுவின் அதிகாரத்தாலேயே, அமைதியாகவும் அதே வேளையில் உறுதியாகவும் அதிகாரத்துடனும் அவற்றை அதட்டுவதாகும்.

மேலே உள்ள பகுதியில் இயேசுவுக்கு முன்பாகத் தன்னை வெளிப்படுத்தியதுபோல், தீயோன் நமக்குத் தன்னை முழுமையாக வெளிப்படுத்துவது மிகவும் அரிது. அந்தப் பேய் இந்த மனிதர் வழியாக நேரடியாகப் பேசுகிறது; அந்த மனிதரைப் பேய் முழுமையாகப் பிடித்திருந்ததை இது காட்டுகிறது. இத்தகைய வெளிப்பாட்டை நாம் அடிக்கடி காணவில்லை என்பதற்காக, தீயோனின் செயல்பாடு இன்று ஏதேனும் குறைந்துவிட்டது என்று பொருளல்ல. மாறாக, தீயோனை எதிர்த்துப் போராடுவதற்குத் தேவையான அளவுக்குக் கிறிஸ்துவின் அதிகாரத்தைக் கிறிஸ்தவ நம்பிக்கையாளர்கள் பயன்படுத்துவதில்லை என்பதையே இது காட்டுகிறது. அதற்குப் பதிலாக, நாம் பெரும்பாலும் தீமைக்கு முன் அஞ்சி ஒடுங்குகிறோம்; கிறிஸ்துவோடு இணைந்து நம்பிக்கையுடனும் அன்புடனும் உறுதியாக நிற்கத் தவறுகிறோம்.

இந்தப் பேய் ஏன் இவ்வளவு வெளிப்படையாகத் தன்னை வெளிப்படுத்தியது? ஏனெனில், அது இயேசுவின் அதிகாரத்தை நேரடியாக எதிர்கொள்ள நேர்ந்தது. அலகை பொதுவாக மறைந்திருந்து வஞ்சகமாகச் செயல்படவே விரும்புகிறான்; தனது தீய வழிகள் தெளிவாக அறியப்படாதபடி, ஒளியின் தூதனாகத் தன்னைக் காட்டிக்கொள்கிறான். அவனது கட்டுப்பாட்டில் இருப்பவர்கள், தீயோன் தங்கள்மீது எவ்வளவு தாக்கம் செலுத்துகிறான் என்பதைக்கூட பெரும்பாலும் அறிவதில்லை. ஆனால் கிறிஸ்துவின் மாசற்ற பிரசன்னத்தையும், நம்மை விடுவிக்கும் நற்செய்தியின் உண்மையையும், இயேசுவின் அதிகாரத்தையும் தீயோன் எதிர்கொள்ளும்போது, இந்த மோதல் பெரும்பாலும் அவன் தன் தீமையை வெளிப்படுத்தி எதிர்வினையாற்றும்படி அவனை நிர்ப்பந்திக்கிறது.

நம்மைச் சுற்றிலும் தீயோன் இடைவிடாமல் செயல்பட்டுக்கொண்டிருக்கிறான் என்ற உண்மையை இன்று சிந்தித்துப் பாருங்கள். உங்கள் வாழ்வில் கடவுளின் மாசற்ற, தூய உண்மை தாக்கப்பட்டு நிராகரிக்கப்படும் மனித உறவுகளையும் சூழ்நிலைகளையும் எண்ணிப் பாருங்கள். மற்ற எல்லாச் சூழ்நிலைகளையும்விட, இத்தகைய சூழ்நிலைகளில்தான் தீமையை எதிர்கொள்ளவும், அதை அதட்டவும், அதன்மேல் அதிகாரம் செலுத்தவும் இயேசு தமது தெய்வீக அதிகாரத்தை உங்களுக்கு வழங்க விரும்புகிறார். இது முதன்மையாக இறைவேண்டல் வழியாகவும் கடவுளின் வல்லமையில் ஆழ்ந்த நம்பிக்கை கொள்வதன் வழியாகவும் செய்யப்படுகிறது. இவ்வுலகில் தீயோனின் செயல்பாட்டை எதிர்கொள்ள, கடவுள் உங்களைப் பயன்படுத்த அனுமதிப்பதற்கு அஞ்சாதீர்கள்.

ஆண்டவரே, இவ்வுலகில் தீயோனின் செயல்பாட்டை நான் எதிர்கொள்ளும்போது எனக்குத் துணிவையும் ஞானத்தையும் தாரும். அவன் எவ்வாறு செயல்படுகிறான் என்பதைப் பகுத்தறிய எனக்கு ஞானத்தைத் தாரும்; உமது அன்போடும் அதிகாரத்தோடும் அவனை எதிர்த்துக் கடிந்துகொள்ள எனக்குத் துணிவைத் தாரும். ஆண்டவராகிய இயேசுவே, உமது அதிகாரம் என் வாழ்வில் உயிர்ப்புடன் விளங்கட்டும். இவ்வுலகில் நிலவும் தீமையை நான் எதிர்கொள்ளும்போது, உமது அரசு வருவதற்கான இன்னும் சிறந்த கருவியாக நான் நாள்தோறும் மாறுவேனாக. இயேசுவே, உம்மில் நம்பிக்கை வைக்கிறேன்.

சிறப்புப் பரிந்துரை நூல்: