ஏப்ரல் 6, 2024
உயிர்ப்புப் பெருவிழா எண்கிழமையின் சனிக்கிழமை
இன்றைய வாசகங்கள்
இயேசு வாரத்தின் முதல் நாள் விடியற்காலையில் உயிர்த்தெழுந்தபின், முதலில் மகதலா மரியாவுக்குத் தோன்றினார். அவரிடமிருந்து ஏழு பேய்களை அவர் ஓட்டியிருந்தார். மாற்கு 16:9
இயேசு முதன்முதலில் தோன்றியதாக மறைநூலில் பதிவுசெய்யப்பட்டுள்ளவர் மகதலா மரியா. இயேசு ஏழு பேய்களை ஓட்டியது இவரிடமிருந்துதான் என்பது குறிப்பிடத்தக்கது. ஏழு பேய்கள் அவரைப் பிடித்திருந்தன என்பது, அவர் முற்றிலுமாகப் பேய்களின் பிடியில் இருந்தார் என்பதைக் குறிப்பதாக மரபுவழியாகப் புரிந்துகொள்ளப்பட்டுள்ளது. இயேசு அவரை விடுவிப்பதற்கு முன், அவர் தம் சொந்த விருப்பத்தால் தீமைக்குப் பணிந்ததால், சாத்தானும் அவனுடைய பேய்களும் அவரது விருப்பாற்றலை முற்றிலுமாகத் தங்கள் கட்டுப்பாட்டுக்குள் கொண்டுவந்திருந்தன. இருந்தும், இத்தகைய கொடுமையான கடந்தகாலத்தைக் கொண்டிருந்த அந்தப் பெண்ணுக்கே, தமது முதல் தோற்றத்தைக் காணும் பேற்றை அளிக்க இயேசு தேர்ந்தெடுத்தார். எவ்வளவு வியப்புக்குரிய உண்மை!
ஒவ்வொருவருக்கும் ஒரு கடந்தகாலம் உண்டு. சிலர் பெரும் பாவிகளாக இருந்திருக்கிறார்கள். லிசியே நகர்ப் புனித தெரேசாவைப் போன்ற வேறு சிலரோ, ஒருபோதும் சாவான பாவம் செய்ததில்லை. புனித தெரேசாவைப் போன்ற ஓர் ஆன்மாவின் அழகு ஆழ்ந்த போற்றுதலுக்குரியது என்பதும், அத்தகைய ஆன்மாவுக்கு விண்ணகத்தில் மிகுந்த கைம்மாறு கிடைக்கும் என்பதும் தெளிவு. ஆனால் பெரும் பாவியின் நிலை என்ன? மகதலா மரியாவைப் போல மிகக் கொடிய பாவ வாழ்வு வாழ்ந்தவர்களின் நிலை என்ன? நம் ஆண்டவர் அவர்களைப் பற்றி என்ன நினைக்கிறார்?
உயிர்த்தெழுந்த ஆண்டவரை முதன்முதலில் கண்டவராக மறைநூலில் பதிவுசெய்யப்பட்டுள்ளவர் மகதலா மரியா என்பது, கடுமையான பாவத்தோடு பெரிதும் போராடி, பின்னர் அந்தப் பாவத்தை வென்று முழு இதயத்தோடு நம் ஆண்டவரிடம் திரும்பிய ஒருவரை இயேசு எவ்வாறு பார்க்கிறார் என்பதைப் பற்றி நமக்கு நிறையச் சொல்ல வேண்டும். பாவம் மனத்தளர்ச்சியை ஏற்படுத்துகிறது. மனந்திரும்பாத நிலையில் அது ஒருவரின் மாண்பையும் நேர்மையையும் இழக்கச் செய்கிறது. இருப்பினும், ஒருவர் மனந்திரும்பிய பின்னரும், சிலர் நலமற்ற குற்றவுணர்வோடும் அவமான உணர்வோடும் தொடர்ந்து போராடுவார்கள். சிலருக்கு இந்தப் போராட்டங்களே, ஆர்வத்தோடும் ஆழ்ந்த ஈடுபாட்டோடும் நம் ஆண்டவருக்குப் பணிசெய்யத் தாங்கள் தகுதியுள்ளவர்கள் என்ற உணர்வை இழக்கச் செய்வதற்குத் தீயவன் பயன்படுத்த முயலும் ஆயுதமாகிவிடலாம்.
ஆனால் கடவுளின் உள்ளத்தில் உள்ள உண்மை என்னவென்றால், மனந்திரும்பிய பாவிகள் உண்மையான மணிக்கற்கள்; நம் ஆண்டவரின் பார்வையில் அவர்கள் அழகானவர்கள். அவர்கள் மிக உயர்ந்த மதிப்புக்கும் மரியாதைக்கும் உரியவர்கள். கடவுள் நமது கடந்தகாலப் பாவத்தையே நினைத்துக்கொண்டிருப்பதில்லை. மாறாக, நாம் நமது கடந்தகாலப் பாவத்திலிருந்து மனந்திரும்பி, அது மன்னிக்கப்பட்டபின், அது கடவுளின் அன்புக்கும் இரக்கத்துக்கும் என்றென்றும் ஓர் அடையாளமாக இருக்கும்.
உங்கள் கடந்தகாலப் பாவத்தை நீங்கள் எவ்வாறு எதிர்கொள்கிறீர்கள்? முதலில், அதை முழுமையாக ஒப்புக்கொண்டு, அதிலிருந்து மனந்திரும்பி, நம் ஆண்டவரிடம் மன்னிப்புக் கேட்டிருக்கிறீர்களா? அப்படியானால், அது இன்னும் உங்களை வாட்டுகிறதா? உங்கள் கடந்தகாலத்தை நினைவூட்டி, கடவுளின் இரக்கத்தில் நீங்கள் கொண்டுள்ள நம்பிக்கையைப் பறிக்கத் தீயவன் இன்னும் முயல்கிறானா?
உங்கள் கடந்தகாலப் பாவங்களில் மிகவும் கொடியவற்றைப் பற்றி இன்று சிந்தியுங்கள். அவற்றை நீங்கள் இன்னும் பாவசங்கீர்த்தனம் செய்யவில்லை என்றால், உங்களால் இயன்ற விரைவில் அதைச் செய்யுங்கள். ஏற்கெனவே செய்திருந்தால், கடவுளின் பார்வையில் உங்கள் ஆன்மாவைக் காண முயலுங்கள். கடவுள் உங்கள் கடந்தகாலப் பாவங்களைக் கோபத்தோடும் வெறுப்போடும் பார்ப்பதில்லை. மாறாக, உங்கள் மனமாற்றம், மனவருத்தம், மனந்திரும்புதல் ஆகியவற்றின் ஆழத்தை மட்டுமே அவர் காண்கிறார். அவரது பார்வையில் இது புனிதமானதும் அழகானதும் ஆகும். மனந்திரும்பிய உங்கள் இதயத்தின் அழகை ஆழ்ந்து சிந்தியுங்கள். அவ்வாறு செய்யும்போது, கடவுளின் பார்வையில் உங்கள் சொந்த இதயத்தையே நீங்கள் காண்கிறீர்கள் என்பதை அறிந்துகொள்ளுங்கள்.
மிகுந்த இரக்கமுள்ள என் கடவுளே, நீர் பாவியை அன்புசெய்து பாவத்தை வெறுக்கிறீர். என் புரிதலுக்கு அப்பாற்பட்ட வழிகளில் நீர் என்னை அன்புசெய்கிறீர். நான் முழுமையாக மனந்திரும்பும்போது, என் இதயத்தை நீர் எவ்வளவு ஆழமாக அன்புசெய்கிறீர் என்பதைப் புரிந்துகொள்ள எனக்கு உதவியருளும். உமது பார்வையில் மட்டுமே என் இதயத்தைக் காணவும் எனக்கு உதவியருளும். அன்பு ஆண்டவரே, உமது அன்புக்கும் இரக்கத்துக்கும் நன்றி கூறுகிறேன். உம்மை இன்னும் அதிகமாக அன்புசெய்ய எனக்கு உதவியருளும். இயேசுவே, உம்மில் நம்பிக்கை வைக்கிறேன்.
ஒன்பதாம் நாள்: இறை இரக்க ஞாயிறுக்குத் தயாரிக்கும் நவநாள் செபம்
இன்றைய புனிதர்கள்/திருவிழாக்கள்
திருப்பலி வாசிப்புகளுக்கான தெரிவுகள்
