తెలుగు

నిజమైన నాయకత్వం వహించే వ్యక్తి

ఆదివారం, అక్టోబర్ 21, 2018

సామాన్య కాలంలోని ఇరవై తొమ్మిదవ ఆదివారం, బి సంవత్సరం

నేటి పఠనాలు

నేటి పునీతులందరూ

ఆంగ్లంలో వినండి

యేసు [పన్నెండుగురిని] పిలిచి వారితో ఇలా అన్నారు: “అన్యజనులపై పాలకులుగా గుర్తింపు పొందినవారు వారిపై పెత్తనం చెలాయిస్తారని, వారి ప్రముఖులు తమ అధికారాన్ని వారిపై ప్రదర్శిస్తారని మీకు తెలుసు. కానీ మీ మధ్య అలా ఉండకూడదు. మీలో గొప్పవారు కావాలని కోరుకునేవారు మీకు సేవకులుగా ఉండాలి; మీలో మొదటివారుగా ఉండాలని కోరుకునేవారు అందరికీ దాసులుగా ఉండాలి.”  మార్కు 10:42-44

ఇది చెప్పడం సులభమే గాని ఆచరించడం కష్టమన్నది నిశ్చయం. “పాలకులుగా గుర్తింపు పొందినవారు” లోనయ్యే ఒక తీవ్రమైన శోధనను ఈ వాక్యభాగం వెల్లడిస్తుంది. అది అధికార దుర్వినియోగం చేయాలనే శోధన, వినయపూర్వక నాయకత్వం లోపించడం.

ఉదాహరణకు, లూసిఫరు, దయ్యాల పతనానికి మూలం అధికార కాంక్ష అని సంప్రదాయం చెబుతుంది. “నేను సేవ చేయను” అనే మాటలు లూసిఫరు పలికినవిగా చెబుతారు. మరో మాటలో చెప్పాలంటే, అధికారం పొందాలనీ, ఇతరులతో సేవ చేయించుకోవాలనీ ఈ పతనమైన దేవదూతలకు ఉన్న కోరిక వాస్తవమైనది, ఎంతో బలమైనది. మనలో ప్రతి ఒక్కరి విషయంలోనూ ఇలాగే ఉంటుంది.

ఇతరులపై గొప్ప అధికారం చెలాయించే స్థానంలో మనం లేకపోవచ్చు. అయినప్పటికీ, దాదాపు మనమందరం అధికార కాంక్షతో పోరాడుతుంటాం. ఇది దాదాపు ఏ సందర్భంలోనైనా జరగవచ్చు. ఉదాహరణకు, ఒక స్నేహబంధాన్ని తీసుకోండి. ఏదైనా విషయంలో అతి స్వల్పమైన అభిప్రాయభేదం వచ్చినా, చాలా తరచుగా మన మాటే నెగ్గాలని కోరుకుంటాం. పెత్తనం మన చేతిలోనే ఉండాలని కోరుకుంటాం. లేదా కుటుంబ జీవితాన్నే ఉదాహరణగా తీసుకోండి. ఇతరులకు సేవ చేయాలనీ, వారి ఇష్టాలకు వినయంతో లోబడాలనీ కోరుకుంటూ కుటుంబ జీవితంలోకి అడుగుపెట్టేవారు ఎంతమంది? అలా చేయడం కష్టం. పెత్తనం చెలాయించాలనీ, ఏయే పరిస్థితుల్లో ఏమి జరగాలో ఇతరులకు ఆదేశించాలనీ కోరుకోవడం ఎంతో సులభం.

పై వాక్యభాగంలో, తమ అపొస్తలులు ఇతరులపై తమ “అధికారాన్ని” వినియోగించేటప్పుడు, ఆ అధికారం ఇతరులపై భారంగా “అనిపించేలా” చేయకూడదని యేసు స్పష్టం చేస్తున్నారు. మరో మాటలో చెప్పాలంటే, దౌర్జన్యం, బెదిరింపు, మోసపూరితంగా ఇతరులను తమ అదుపులోకి తెచ్చుకోవడం లేదా మరే ఇతర కఠిన పద్ధతిలోనైనా అధికారం చెలాయించడం ద్వారా నాయకులుగా ఉండమని యేసు తన అపొస్తలులను పిలవలేదు. యేసు కోరుకున్న అధికారం ఎంతో భిన్నమైనది.

క్రైస్తవ అధికారానికి ప్రేమ, వినయం కేంద్రబిందువులు.  అది నిజమైన వినయంతో జీవించే “నాయకత్వం”.  ఈ నాయకత్వం ఇతరుల హృదయాలను, మనస్సులను, సంకల్పాలను గెలుచుకొని, నిస్వార్థ ప్రేమతోను అనురాగంతోను అనుసరించమని వారిని ఆహ్వానిస్తుంది.  కుటుంబంలోను, స్నేహితుల మధ్యను, సభలోను, సమాజంలోను ఇలాగే జరగాలి. 

మీరు ఇతరులకు ఏ విధంగా నాయకత్వం వహిస్తున్నారో ఈ రోజు ధ్యానించండి. “పెత్తనం చెలాయించే వ్యక్తిగా” ఉండాలనీ, మీకు అధికారం ఉంది కాబట్టి ఇతరులు మిమ్మల్ని అనుసరించాలనీ ఆశిస్తున్నారా? లేక వినయంతో, ప్రేమతో ఇతరులకు నాయకత్వం వహిస్తూ, మీ మంచితనం ద్వారా వారిని క్రీస్తువైపు ఆకర్షిస్తున్నారా? యేసు ఉద్దేశించినట్లుగా క్రైస్తవ నాయకత్వానికి మిమ్మల్ని మీరు అంకితం చేసుకోండి. మీ కుటుంబంలో, స్నేహితుల మధ్య, విశాల సమాజంలో అది చూపే ప్రభావాన్ని చూసి మీరు ఆశ్చర్యపోతారు.

ప్రభూ, వినయంతో నాయకత్వం వహించేందుకు నాకు సహాయం చేయుము.  ప్రేమకారుణ్యాలతో నిండిన నీ హృదయం నా ద్వారా ప్రకాశించేలా, నీ కరుణామయ హృదయపు మంచితనం, దయలతో ఇతరులను నడిపించేలా నాకు సహాయం చేయుము.  గర్వాన్ని, అహంభావాన్ని పూర్తిగా విడిచిపెట్టి, అందరికీ సేవ చేసేలా నాకు సహాయం చేయుము.  యేసూ, నేను నీపై నమ్మకం ఉంచుతున్నాను.

మరిన్ని>>>