ఏప్రిల్ 28, 2021
పాస్కా కాలపు నాలుగవ వారంలోని బుధవారం
నేటి పఠనాలు
పునీత పీటర్ షనెల్, యాజకుడు, వేదసాక్షి—ఐచ్ఛిక స్మరణ
పునీత లూయీ గ్రిన్యోన్ ద మోంఫోర్, యాజకుడు—ఐచ్ఛిక స్మరణ

యేసు బిగ్గరగా ఇలా పలికారు: “నన్ను విశ్వసించేవారు నన్ను మాత్రమే కాక, నన్ను పంపినవారిని కూడా విశ్వసిస్తున్నారు; నన్ను చూసేవారు నన్ను పంపినవారిని చూస్తున్నారు.” యోహాను 12:44–45
పైన ఉటంకించిన భాగంలో యేసు మాటలు “యేసు బిగ్గరగా ఇలా పలికారు…” అనే వాక్యంతో ప్రారంభమవుతున్నాయని గమనించండి. సువార్త రచయిత ఉద్దేశపూర్వకంగా చేర్చిన ఈ మాటలు ఆ ప్రకటనకు మరింత ప్రాధాన్యాన్ని ఇస్తున్నాయి. యేసు ఈ మాటలను కేవలం “అనలేదు,” “బిగ్గరగా పలికారు.” అందువల్ల మనం ఈ మాటలను మరింత శ్రద్ధగా ఆలకించి, అవి మన హృదయాలతో మరింత లోతుగా మాట్లాడేందుకు అనుమతించాలి.
ఈ సువార్త భాగంలోని సంఘటన యేసు శ్రమలకు ముందున్న వారంలో జరుగుతుంది. ఆయన విజయోత్సాహంతో యెరూషలేములో ప్రవేశించారు. ఆ తరువాత ఆ వారమంతా, పరిసయ్యులు ఆయనకు వ్యతిరేకంగా కుట్రలు పన్నుతుండగా, ఆయన వివిధ ప్రజాసమూహాలతో మాట్లాడారు. భావోద్వేగాలు తీవ్రమయ్యాయి; యేసు మరింత ఉత్సాహంతో, మరింత స్పష్టతతో మాట్లాడారు. సమీపిస్తున్న తన మరణం గురించి, అనేకుల అవిశ్వాసం గురించి, పరలోకంలోని తండ్రితో తనకున్న ఏకత్వం గురించి ఆయన మాట్లాడారు. ఆ వారంలో ఒక సందర్భంలో, యేసు తండ్రితో తనకున్న ఏకత్వం గురించి మాట్లాడుతుండగా, అందరికీ వినిపించేలా తండ్రి స్వరం వినిపించింది. అంతకు ముందే యేసు, “తండ్రీ, నీ నామాన్ని మహిమపరచు” అని అన్నారు. అప్పుడు తండ్రి, “నేను దానిని మహిమపరచాను; మరల మహిమపరుస్తాను” అని పలికారు. కొందరు అది ఉరుము అనుకున్నారు; మరికొందరు దేవదూత అనుకున్నారు. కానీ పలికింది పరలోకంలోని తండ్రియే.
నేటి సువార్తను ధ్యానించేటప్పుడు ఈ నేపథ్యం ఉపయోగపడుతుంది. మనం తనపై విశ్వాసం ఉంచితే, తండ్రిపై కూడా విశ్వాసం ఉంచుతున్నామని మనం తెలుసుకోవాలని యేసు ఎంతో తపిస్తున్నారు; ఎందుకంటే తండ్రీ, ఆయనా ఒక్కటే. నిజానికి, దేవుని ఏకత్వం గురించిన ఈ బోధ నేడు మనకు కొత్తదేమీ కాదు—పరమ పవిత్ర త్రిత్వం గురించిన బోధ మనందరికీ బాగా తెలిసి ఉండాలి. అయినప్పటికీ, తండ్రి, కుమారుడు, పవిత్రాత్మల ఏకత్వం గురించిన ఈ బోధను అనేక విధాలుగా కొత్తదిగా చూస్తూ, ప్రతిరోజూ సరికొత్తగా ధ్యానించాలి.
తండ్రితో తనకున్న ఏకత్వం గురించి యేసు మీతో వ్యక్తిగతంగా, ఎంతో ఉత్సాహంతో మాట్లాడుతున్నట్లు ఊహించుకోండి. వారి ఏకత్వమనే ఈ దైవిక రహస్యాన్ని మీరు అర్థం చేసుకోవాలని ఆయన ఎంత గాఢంగా కోరుకుంటున్నారో జాగ్రత్తగా ఆలోచించండి. తన తండ్రితో ఉన్న సంబంధంలో తాను ఎవరో మీరు అర్థం చేసుకోవాలని యేసు ఎంతగా కోరుకుంటున్నారో మీ హృదయంలో గ్రహించడానికి అవకాశం ఇవ్వండి.
ప్రార్థనాపూర్వకంగా త్రిత్వాన్ని అర్థం చేసుకోవడం వల్ల దేవుడు ఎవరో మాత్రమే కాక, మనం ఎవరమో కూడా ఎంతో నేర్చుకుంటాము. ప్రేమ ద్వారా వారితో ఐక్యమై, దేవుని ఏకత్వంలో పాలుపంచుకోవడానికి మనం పిలువబడ్డాము. తొలి శతాబ్దాల సభా పితరులు మనం “దైవీకరించబడటానికి,” అంటే దేవుని దైవిక జీవంలో పాలుపంచుకోవడానికి పిలువబడ్డామని తరచూ చెప్పేవారు. ఇది సంపూర్ణంగా అర్థం చేసుకోలేని రహస్యమే అయినప్పటికీ, మనం ప్రార్థనాపూర్వకంగా ధ్యానించాలని యేసు ఎంతో గాఢంగా కోరుకునే రహస్యం.
తండ్రితో ఉన్న సంబంధంలో తాను ఎవరో మీకు వెల్లడించాలనే యేసు హృదయ తపనను నేడు ధ్యానించండి. ఈ దైవిక సత్యాన్ని మరింత లోతుగా అర్థం చేసుకోవడానికి మీ హృదయాన్ని తెరవండి. ఈ ప్రత్యక్షీకరణకు మీరు మీ హృదయాన్ని తెరుస్తున్నప్పుడు, వారి పవిత్రమైన ఐక్యజీవితంలోకి మిమ్మల్ని ఆకర్షించాలనే తన కోరికను కూడా దేవుడు మీకు వెల్లడించేందుకు అనుమతించండి. ఇదే మీ పిలుపు. యేసు భూమిపైకి రావడానికి కారణం ఇదే. దేవుని జీవంలోకే మనలను ఆకర్షించడానికి ఆయన వచ్చారు. దీనిని ఎంతో తపనతో, దృఢనిశ్చయంతో విశ్వసించండి.
ప్రేమతపనగల నా ప్రభువా, పరలోకంలోని తండ్రితో నీకున్న ఏకత్వం గురించి నీవు ఎంతోకాలం క్రితమే పలికావు. ఈ మహిమాన్విత సత్యం గురించి నేడు మళ్లీ నాతో మాట్లాడుతున్నావు. ప్రియమైన ప్రభువా, తండ్రితో నీకున్న ఏకత్వమనే గొప్ప రహస్యంలోకి మాత్రమే కాక, నీ జీవంలో పాలుపంచుకోమని నీవు నన్ను పిలుస్తున్న రహస్యంలోకి కూడా నన్ను ఆకర్షించు. ఈ ఆహ్వానాన్ని నేను అంగీకరిస్తున్నాను. నీతోనూ, తండ్రితోనూ, పవిత్రాత్మతోనూ నేను మరింత సంపూర్ణంగా ఏకమవ్వాలని ప్రార్థిస్తున్నాను. పరమ పవిత్ర త్రిత్వమా, నేను నీపై నమ్మకం ఉంచుతున్నాను.
నేటి పునీతులు –
పునీత పీటర్ షనెల్, యాజకుడు, వేదసాక్షి
పునీత లూయీ గ్రిన్యోన్ ద మోంఫోర్, యాజకుడు
పైన ప్రదర్శించిన చిత్రం: దేవాలయంలో బోధిస్తున్న యేసు — చిత్రకారుడు యాన్ వాన్ ఓర్లీ




