తెలుగు

పాపిపై కనికరం

జూలై 1, 2022
సామాన్య కాలపు పదమూడవ వారంలోని శుక్రవారం
నేటి పఠనాలు

పునీత జునిపెరో సెర్రా, యాజకుడు—అమెరికా సంయుక్త రాష్ట్రాలలో ఐచ్ఛిక స్మరణ

వీడియో

ఆంగ్లంలో వినండి

“ఆరోగ్యంగా ఉన్నవారికి వైద్యుడు అవసరం లేదు, రోగులకే అవసరం. వెళ్లి, నేను కోరేది కనికరమే గాని బలి కాదు. అనే మాటల అర్థం నేర్చుకోండి. నేను నీతిమంతులను పిలవడానికి రాలేదు, పాపులను పిలవడానికే వచ్చాను.” మత్తయి 9:12-13

యేసు “నీతిమంతుల” కోసం రాలేదు, “పాపుల” కోసం వచ్చారు. మొదట ఇది ఆశ్చర్యంగా అనిపించవచ్చు. ఎందుకంటే, తాను నీతిమంతులు, పాపులు అనే తేడా లేకుండా అందరి కోసం వచ్చానని యేసు చెప్పి ఉండాల్సిందని అనిపిస్తుంది. అయితే, నిజంగా నీతిమంతులైనవారు ఎవరూ లేరని మనం అర్థం చేసుకోవాలి. మరో మాటలో చెప్పాలంటే, ప్రతి ఒక్కరూ రక్షకుని అవసరమున్న పాపులే.

ఈ విధంగా మాట్లాడుతూ, యేసు పరిసయ్యులలో ఉన్న తమను తాము నీతిమంతులుగా భావించుకునే వైఖరిని ఉద్దేశిస్తున్నారు. యేసు పాపం లేనివారితో మాత్రమే మెలగాలని వారు భావించినట్లు కనిపిస్తుంది. పరిసయ్యులు తాము “నీతిమంతులమన్నట్లు,” యేసు తమతోనూ, పాపులని బహిరంగంగా తెలియని ఇతరులతోనూ మాత్రమే మెలగాలన్నట్లు ప్రవర్తించారు.

విచారకరంగా, పరిసయ్యుల పాపం, యేసు దగ్గరకు వచ్చిన సుంకరుల, ఇతర పాపుల పాపాలకంటే ఎంతో తీవ్రమైనది. పరిసయ్యులు ఆధ్యాత్మిక గర్వమనే పాపానికి దోషులయ్యారు; తాము నీతిమంతులమని అహంకారంతో భావిస్తూ పాపం చేస్తున్నారు. ఎవరైనా తమ పాపాన్ని గుర్తించకపోతే, వారు పశ్చాత్తాపపడరు కాబట్టి దేవుడు వారిని క్షమించలేరు.

ఇది తమను తాము నీతిమంతులుగా భావించుకునే పరిసయ్యులను, ఇతరులను తీవ్రంగా ఖండించే మాట అయినప్పటికీ, తమ పాపాన్ని సంకోచం లేకుండా అంగీకరించే వారందరికీ యేసు ఇస్తున్న ఆహ్వానం కూడా. దేవుని పరిపూర్ణత ఎదుట మనల్ని మనం తగ్గించుకొని, ఆయన మహిమ వెలుగులో మన పాపాలను చూడగలిగినప్పుడు, నిరాశకు లోనయ్యే ప్రలోభం మనకు కలుగుతుంది; మన పాపాలను బట్టి సిగ్గుపడతాం. అయితే మన జీవితాల్లో దివ్య వైద్యునిగా పనిచేయడానికి మన ప్రభువును అనుమతించినప్పుడు, ఆ సిగ్గు ఆనందంగానూ స్వేచ్ఛగానూ మారుతుంది. మన పాపపు గాయాలకు స్వస్థత చేకూర్చడమే ఆయన భూలోక జీవిత ఉద్దేశం. ఆయన పరిపూర్ణ కనికరం మనల్ని ఎంత సంపూర్ణంగా స్వస్థపరుస్తుందో గ్రహించినప్పుడు, మనం సంకోచించకుండా ఆయన వద్దకు పరుగెత్తుతాం.

మీ పాపాలను యేసుకు ఒప్పుకోవడానికి మీరు ఎంత సిద్ధంగా, ఎంత సుముఖంగా ఉన్నారో ఈ రోజు ధ్యానించండి. మీపట్ల ఆయనకున్న పరిపూర్ణ ప్రేమపై నమ్మకం ఉంచడానికి, ఆయన దైవకారుణ్యానికి మిమ్మల్ని మీరు పూర్తిగా తెరచుకోవడానికి వెనుకాడకండి.

పరిపూర్ణ కనికరంగల ప్రభువా, నా అవసరంలో నీ వైపు తిరుగుతున్నాను; నా పాపాన్ని, నా దోషాన్ని అంగీకరిస్తున్నాను. నిన్ను నొప్పించినందుకు పశ్చాత్తాపపడుతున్నాను. నా పాపానికి ఏకైక పరిష్కారం నీవేనని నాకు తెలుసు. ప్రియ ప్రభువా, దయచేసి నాపై కనికరం చూపి, నా పాపాలన్నిటినీ క్షమించు. యేసూ, నేను నీపై నమ్మకం ఉంచుతున్నాను.

మరిన్ని సువార్త ధ్యానాలు

దైవకారుణ్య ధ్యానాలు

సామాన్య కాలానికి పవిత్ర గ్రంథ ధ్యానాలు

పునీతులందరూ/పండుగలు

నేటి పునీతులు – పునీత జునిపెరో సెర్రా, యాజకుడు—అమెరికా సంయుక్త రాష్ట్రాలలో ఐచ్ఛిక స్మరణ

దివ్యబలిపూజ పఠనాల ఎంపికలు

ప్రధాన చిత్రం: జాన్ బ్రిడ్జెస్, ప్రజా వినియోగ పరిధిలోనిది, వికీమీడియా కామన్స్ ద్వారా