తెలుగు

ఇరుకైన ద్వారం

ఆగస్టు 21, 2022
సామాన్య కాలంలోని ఇరవై ఒకటవ ఆదివారం, (సంవత్సరం C)
నేటి పఠనాలు

వీడియో

ఆంగ్లంలో వినండి

“ఇరుకు ద్వారం గుండా ప్రవేశించడానికి కృషి చేయండి. ఎందుకంటే, నేను మీతో చెబుతున్నాను, అనేకులు ప్రవేశించడానికి ప్రయత్నిస్తారు గాని, వారికి తగినంత శక్తి ఉండదు.”  లూకా 13:24

ఈ వాక్యం మనకు ఏమి చెబుతోంది? మన సొంత సంకల్పంతో గానీ, మన సొంత ప్రయత్నంతో గానీ మనం పరలోకంలో ప్రవేశించలేమని ఇది వెల్లడిస్తోంది. అంతేకాక, కొందరు తమ సొంత ప్రయత్నంతో పరలోకాన్ని చేరుకోవడానికి ప్రయత్నించినా, ఈ పద్ధతి ఫలించదని ఇది మనకు చెబుతోంది. మరణానంతరం మన ప్రభువును కలుసుకున్నప్పుడు, తాము ఆయన రాజ్యానికి చెందినవారు కాదని తెలిసి వారు ఆశ్చర్యపోతారు.

మన ప్రభువు చేసిన ఈ స్పష్టమైన, కొంత దిగ్భ్రాంతి కలిగించే ప్రకటన, మీరు కాస్త ఆగి మీ జీవితాన్ని పరిశీలించుకునేలా చేయాలి. తద్వారా మీరు నడుస్తున్న మార్గాన్ని చిత్తశుద్ధితో, వినయంతో పరీక్షించుకోవాలి. కొందరికి ఎదురుకానున్న ఈ వాస్తవ అనుభవం గురించి యేసు సూటిగా, స్పష్టంగా చెప్పిన మాటలు మీ కళ్లను తెరిపించి, ఆయన మీ గురించే మాట్లాడుతున్నారా అని నిజాయితీగా పరిశీలించుకోవడానికి మీకు తోడ్పడాలి.  

కొన్నిసార్లు సత్యాన్ని ఎదుర్కోవడానికి, క్రీస్తుపై కంటే మనపైనే ఎక్కువగా ఆధారపడేందుకు ప్రయత్నిస్తున్నామేమో అంగీకరించడానికి నిజమైన వినయం అవసరం. వినయవంతులు ప్రవేశించే ద్వారమే ఆ “ఇరుకు ద్వారం.” గర్వం, మనకు మనమే సరిపోతామనే భావన పరలోకానికి మన సొంత మార్గాన్ని ఏర్పరచుకునేందుకు ప్రయత్నించేలా మనల్ని నడిపిస్తాయి. కానీ ఈ మార్గం ఎన్నటికీ సరైనది కాదు.

“ఇరుకు ద్వారం” గుండా ప్రవేశించడమంటే దేవుని మాట వినడం కూడా. దివ్య కాపరి అయిన ఆయన ఎల్లప్పుడూ మనల్ని మృదువుగా పిలుస్తూనే ఉంటారు. ఆయన స్వరాన్ని శ్రద్ధగా విన్నప్పుడే ఆయన మనల్ని ఎటు నడిపిస్తున్నారో మనకు తెలుస్తుంది. అప్పుడే ఆ ఏకైక ఇరుకు ద్వారం గుండా వెళ్లే మార్గాన్ని మనం కనుగొంటాము.

మీరు మన ప్రభువును ముఖాముఖిగా కలుసుకునే ఆ క్షణం గురించి ఈ రోజు ధ్యానించండి. ఆ కలయిక ఎలా ఉంటుంది? “భళా! మంచి, నమ్మకమైన సేవకులారా, మీ ప్రతిఫలంలో ప్రవేశించండి” అని ఆయన చేతులు చాచి మిమ్మల్ని ఆహ్వానించే కలయికగా అది ఉంటుందా? లేక “మీరు నాకు తెలియదు” అని ఆయన చెప్పే కలయికగా ఉంటుందా? మన దివ్య ప్రభువు శక్తిపైనే ఆధారపడటానికి కృషి చేస్తూ, మీ విశ్వాస జీవితాన్ని నిజాయితీగా పరిశీలించుకోవలసిన సమయం ఇదే.

ప్రభువా, ఇరుకు ద్వారం గుండా ప్రవేశించాలని నేను నిజంగా కోరుకుంటున్నాను. నన్ను పరలోకానికి నడిపించే నీ మృదువైన స్వరాన్ని అనుసరించాలని నిర్ణయించుకుంటున్నాను. నాపై నేనే ఆధారపడేలా చేసే ప్రతిదాన్ని విడిచిపెట్టి, జీవితంలో వినయంతో ఉండేందుకు నాకు సహాయం చేయి. ప్రియ ప్రభువా, నేను నీపైనే ఆధారపడి, అన్ని విషయాల్లోనూ నీపై నమ్మకం ఉంచుదును గాక. యేసూ, నేను నీపై నమ్మకం ఉంచుతున్నాను.

పునీత మోనికాకు నవదిన ప్రార్థన
ఆగస్టు 18–26

మరిన్ని ఆదివారపు వీడియో ధ్యానాలు/ప్రసంగాలు

మరిన్ని సువార్త ధ్యానాలు

దైవకారుణ్య ధ్యానాలు

పునీతులందరూ/పండుగలు

నేటి పునీతులు – పునీత పదవ పయస్ పాపుగారు
ఈ సంవత్సరం ఆదివారం నాడు వస్తున్నందున, ప్రార్థనాక్రమంలో స్మరణ దినంగా జరుపుకోబడదు

దివ్యబలిపూజ పఠనాల ఎంపికలు

పైన ప్రదర్శించిన చిత్రం: అంతిమ తీర్పు చిత్రకారుడు జెహాన్ కజిన్ ది యంగర్, వికీమీడియా కామన్స్ ద్వారా