తెలుగు

అసాధారణమైనదానికి సాధారణ మార్గం

సోమవారం, మే 1, 2023

కార్మికుడైన పునీత యోసేపు ఐచ్ఛిక స్మరణ

నేటి పఠనాలు

వీడియో

ఆంగ్లంలో వినండి

యేసు తన స్వస్థలానికి వచ్చి, అక్కడి ప్రజలకు వారి ప్రార్థనా మందిరంలో బోధించాడు. వారు ఆశ్చర్యపడి, “ఈయనకు ఇంత జ్ఞానం, ఇలాంటి అద్భుత కార్యాలు చేసే శక్తి ఎక్కడి నుంచి వచ్చాయి? ఈయన వడ్రంగి కుమారుడు కాదా?” అని అన్నారు. మత్తయి 13:54–55

డిసెంబరు 8, 2020న, ఫ్రాన్సిస్ పాపుగారు “పునీత యోసేపు సంవత్సరం” విశ్వవ్యాప్త వేడుకల ప్రారంభాన్ని ప్రకటించారు. “తండ్రి హృదయంతో” అనే అపొస్తోలిక లేఖతో ఆయన ఈ సంవత్సరాన్ని ప్రారంభించారు. ఆ లేఖ ఉపోద్ఘాతంలో పరిశుద్ధ పిత ఇలా అన్నారు: “గుర్తింపుకు నోచుకోకుండా, ప్రతిరోజూ నిశ్శబ్దంగా, మరుగున ఉంటూ తోడుగా నిలిచే యోసేపులో మనలో ప్రతి ఒక్కరం కష్టకాలాల్లో మనకోసం మధ్యస్థ ప్రార్థన చేసేవారిని, ఒక ఆసరాను, ఒక మార్గదర్శిని కనుగొనవచ్చు.”

ఈ స్మరణ దినపు పఠనాల నుండి తీసుకున్న పై సువార్త, యేసు “వడ్రంగి కుమారుడు” అనే వాస్తవాన్ని సూచిస్తుంది. యోసేపు ఒక కార్మికుడు. ధన్య కన్య మరియకు, దేవుని కుమారునికి రోజువారీ అవసరాలను సమకూర్చేందుకు ఆయన తన చేతులతో వడ్రంగి పని చేశారు. వారికి ఒక ఇల్లు, ఆహారం, జీవితానికి అవసరమైన ఇతర దైనందిన వస్తువులను సమకూర్చారు. కలల్లో తనతో మాట్లాడిన దేవదూత ఇచ్చిన వివిధ సందేశాలను అనుసరించడం ద్వారా యోసేపు వారిద్దరినీ రక్షించారు కూడా. తండ్రిగా, భర్తగా, కార్మికునిగా సేవలందిస్తూ, యోసేపు తన జీవిత కర్తవ్యాలను నిశ్శబ్దంగా, మరుగున ఉండి నెరవేర్చారు.

ఈనాడు యోసేపు మన కతోలిక సభ అంతటా, అంతేకాక ప్రపంచ చరిత్రలో ఒక ప్రముఖ వ్యక్తిగా కూడా గుర్తింపు, గౌరవం పొందుతున్నప్పటికీ, ఆయన జీవించిన కాలంలో ఎక్కువగా ఎవరి దృష్టికీ రాని వ్యక్తిగా ఉండి ఉంటారు. తన సాధారణ కర్తవ్యాన్ని నిర్వర్తించే ఒక సాధారణ వ్యక్తిగానే ఆయనను చూసి ఉంటారు. అయితే, అనేక విధాలుగా, ఇదే పునీత యోసేపును అనుసరణకు ఆదర్శంగా, ప్రేరణకు మూలంగా నిలుపుతుంది. అందరి దృష్టిని ఆకర్షించే స్థానంలో ఉండి ఇతరులకు సేవ చేయడానికి చాలా కొద్దిమంది మాత్రమే పిలువబడతారు. తమ రోజువారీ బాధ్యతలను నిర్వర్తించినందుకు బహిరంగంగా ప్రశంసలు పొందేవారు చాలా కొద్దిమందే. ముఖ్యంగా తల్లిదండ్రుల సేవకు తరచుగా తగినంత గుర్తింపు లభించదు. అందుకే, నజరేతులో వినయంతో, మరుగున సాగిన పునీత యోసేపు జీవితం, ఎంతోమందికి తమ దైనందిన జీవితాలలో ప్రేరణనిస్తుంది.

మీ జీవితం కొంతవరకు ఒకే తీరుగా సాగుతూ, మరుగున ఉండి, ప్రజల గుర్తింపుకు నోచుకోకుండా, విసుగ్గా, కొన్నిసార్లు బోరుగా కూడా అనిపిస్తుంటే, ప్రేరణ కోసం పునీత యోసేపు వైపు చూడండి. ఈనాటి స్మరణ ముఖ్యంగా శ్రమించి పనిచేసిన వ్యక్తిగా యోసేపును గౌరవిస్తుంది. ఆయన చేసిన పని ఎంతో సాధారణమైనది. అయితే మన దైనందిన జీవితంలోని సాధారణ అంశాలలోనే పవిత్రత ప్రత్యేకంగా కనిపిస్తుంది. లోకసంబంధమైన ప్రశంసలు కొద్దిగానే లభించినా లేదా అసలేమీ లభించకపోయినా, రోజురోజూ సేవ చేయాలని ఎంచుకోవడం ప్రేమతో కూడిన సేవ, పునీత యోసేపు జీవితాన్ని అనుసరించడం, మీ జీవితంలో పవిత్రతకు మూలం. ఇటువంటి సాధారణమైన, మరుగున ఉన్న మార్గాల్లోనూ, ఇతర మార్గాల్లోనూ సేవ చేయడానికున్న ప్రాముఖ్యాన్ని తక్కువగా అంచనా వేయకండి.

పునీత యోసేపు గడిపిన సాధారణమైన, “ప్రత్యేకత ఏమీ కనిపించని” దైనందిన జీవితాన్ని గురించి ఈరోజు ధ్యానించండి. కార్మికునిగా, భర్తగా, తండ్రిగా ఆయన అనుభవించి ఉండే జీవితాన్ని మీ జీవితం పోలి ఉందని మీకు అనిపిస్తే, ఆ విషయమై ఆనందించండి. దైనందిన జీవితంలోని సాధారణ కర్తవ్యాల ద్వారా అసాధారణమైన పవిత్ర జీవితం గడపడానికి మీరు కూడా పిలువబడ్డారనే విషయమై ఆనందించండి. ఆ కర్తవ్యాలను చక్కగా నిర్వర్తించండి. వాటిని ప్రేమతో చేయండి. ఈ సాధారణ దైనందిన జీవితాన్ని పంచుకొని ఉండే పునీత యోసేపు, ఆయన సతీమణి ధన్య కన్య మరియల ప్రేరణతో వాటిని చేయండి. మీరు ప్రతిరోజూ చేసేదాన్ని ఇతరుల పట్ల ప్రేమతో, సేవాభావంతో చేసినప్పుడు, అదే మీ జీవిత పవిత్రతకు అత్యంత నిశ్చయమైన మార్గమని తెలుసుకోండి.

వడ్రంగి కుమారుడవైన నా యేసూ, నీ భూలోక తండ్రియైన పునీత యోసేపును వరంగా, ప్రేరణగా ఇచ్చినందుకు నీకు కృతజ్ఞతలు. ఎంతో ప్రేమతో, బాధ్యతతో ఆయన గడిపిన సాధారణ జీవితాన్ని బట్టి నీకు కృతజ్ఞతలు. పనిలోనూ, సేవలోనూ నా రోజువారీ కర్తవ్యాలను చక్కగా నెరవేర్చడం ద్వారా ఆయన జీవితాన్ని అనుసరించడానికి నాకు సహాయం చేయుము. నా జీవిత పవిత్రతకు పునీత యోసేపు జీవితంలో ఒక ఆదర్శవంతమైన నమూనాను నేను గుర్తించుదును గాక. కార్మికుడైన పునీత యోసేపూ, మా కొరకు ప్రార్థించుము. యేసూ, నేను నీపై నమ్మకం ఉంచుతున్నాను.

మరిన్ని సువార్త ధ్యానాలు

దైవకారుణ్య ధ్యానాలు

పునీతులందరూ/పండుగలు

నేటి పునీతులు – కార్మికుడైన పునీత యోసేపు

పాస్కా కాలపు ప్రార్థనలు

పాస్కా కాలం కొరకు పవిత్ర గ్రంథ ధ్యానాలు

దివ్యబలిపూజ పఠనాల ఎంపికలు

పైన చూపిన ప్రధాన చిత్రాలు: కార్మికుడైన పునీత యోసేపు, ఫ్లికర్ ద్వారా