తెలుగు

భూమిపై అత్యంత గొప్ప కార్యాన్ని చేయడం

ఏప్రిల్ 27, 2024
పాస్కా నాలుగవ వారంలోని శనివారం
నేటి పఠనాలు

వీడియో

ఆంగ్లంలో వినండి

“నేను మీతో నిశ్చయముగా, నిశ్చయముగా చెప్పుచున్నాను: నన్ను విశ్వసించేవారు నేను చేసే కార్యాలను చేస్తారు; వీటికన్నా గొప్ప కార్యాలను కూడా చేస్తారు, ఎందుకంటే నేను తండ్రి వద్దకు వెళ్తున్నాను. కుమారునిలో తండ్రి మహిమపరచబడేలా, మీరు నా నామమున ఏది అడిగినా నేను చేస్తాను. మీరు నా నామమున నన్ను ఏది అడిగినా నేను చేస్తాను.” యోహాను 14:12–14

యేసు స్వయంగా చేసిన కార్యాలకన్నా గొప్ప కార్యాలను చేయడానికి మనం ఎలా పిలువబడ్డాము? అవును, ఇది నిజమే. ఇదే మన పిలుపు. మన ప్రభువు మనకు వాగ్దానం చేసింది ఇదే కనుక, ఇది మనకు తెలుసు. దేవుడు మనలను ఇంత శక్తివంతంగా ఉపయోగించుకుంటున్నందుకు ఈ సత్యం మనలను కృతజ్ఞతతో నింపాలి.

యేసు చెప్పే “గొప్ప” కార్యాలలో మొట్టమొదటిది, ప్రధానమైనది భూదిగంతాల వరకు సువార్తను పంచడం. యేసు భూమిపై సంచరించినప్పుడు, ఆయన పరిచర్య ప్రధానంగా ఇశ్రాయేలు ప్రజల కోసమే ఉండేది. అయితే ఆయన పరలోకానికి ఆరోహణమై, సభపై పవిత్రాత్మను పంపినప్పుడు, పవిత్రాత్మను స్వీకరించే వారందరికీ భూదిగంతాల వరకు సువార్తను పంచే శక్తిని కూడా ప్రసాదించారు. అందువల్ల, హృదయ పరివర్తన అనే అత్యంత గొప్ప కార్యంలో మనం సహకరించవచ్చు.

మీరు గొప్ప కార్యాలు చేయాలనుకుంటున్నారా? చాలామంది పిల్లలు అలాంటి కలలు కంటారు, ఎందుకంటే ఈ కోరిక మన మానవ స్వభావంలోనే లిఖించబడి ఉంది. మనం మార్పు తీసుకురావాలనుకుంటాము. గొప్పవారిగా ఉండాలనుకుంటాము. కానీ నిజమైన గొప్పతనం గురించి మనం తరచూ గందరగోళానికి లోనవుతాము. లోకసంబంధమైన, తాత్కాలిక గొప్పతనాన్ని చాటే పనుల ద్వారా ఆ సహజమైన కోరికను తీర్చుకోవడానికి ప్రయత్నిస్తాము. స్వార్థపూరిత ఆశయాల నుండి పుట్టే గుర్తింపు, సంపద, ఇతర తాత్కాలిక ప్రతిఫలాలను కోరుకుంటాము. వాటిని ఎంతటి అత్యున్నత స్థాయిలో సాధించినా, చివరికి అవేవీ మనకు సంపూర్ణ తృప్తిని ఇవ్వవు. ఉదాహరణకు, మీకు నోబెల్ శాంతి బహుమతి లభించిందని, లేదా మీరు ఒక దేశానికి నాయకత్వం వహిస్తున్నారని, లేదా ప్రపంచంలో జీవించి ఉన్న వారందరికన్నా అత్యంత ధనవంతులయ్యారని ఊహించుకోండి. ఈ లక్ష్యాలలో ఏదైనా సాధించడం మీకు సంపూర్ణ తృప్తిని ఇస్తుందా? అది దేవుని చిత్తమైతేనే ఇస్తుంది. అలా కాకపోతే, అది శూన్యమైన, అర్థరహితమైన కార్యంగానే మిగిలిపోతుంది.

ముందుగా మీ అంతరంగంలోకి చూడండి. గొప్ప కార్యాలు చేయాలనే కోరిక మీలో కనిపిస్తోందా? కనిపిస్తోందనే ఆశిస్తున్నాము. ఆ తరువాత, మీలోని కోరికను తీర్చుకోవడానికి మీరు చేయగల అత్యంత గొప్ప పని, మీ జీవితానికి దేవుని చిత్తమైనదాన్ని చేయడమేనని మీకు మీరు గుర్తుచేసుకోండి. “మీరు నా నామమున నన్ను ఏది అడిగినా నేను చేస్తాను” అని యేసు అంటున్నారు. యేసు నామమున అడగడం అంటే ఆయన చిత్తం నెరవేరాలని అడగడం. తన రక్షణానుగ్రహాన్ని ఇతరులకు అందించడానికి, తాను ఎంచుకున్న ఏ విధంగానైనా దేవుడు మిమ్మల్ని ఉపయోగించుకోవాలని అడగడమే దాని అర్థం. ఈ అనుగ్రహం కోసం మీరు మన ప్రభువును అడిగితే, ఆయన దానిని ప్రసాదిస్తారు.

ఈ విధమైన ప్రార్థనకు వినయం, మన సొంత చిత్తంపై పట్టును పూర్తిగా విడిచిపెట్టడం అవసరం. కుమారుడు మన కోసం తండ్రిని కోరేదానినే మనమూ తండ్రిని అడగాలి. అయితే అలాంటి వినయపూర్వకమైన ప్రార్థనకు లభించే ప్రతిఫలం ఏమిటంటే, దేవుడు మన ద్వారా ఇతరులపై తన అనుగ్రహాన్ని, కారుణ్యాన్ని కురిపిస్తారు. ఇదే ఆయన పరిపూర్ణ చిత్తం.

ఈ ఉన్నతమైన పిలుపును గురించి నేడు ధ్యానించండి. గొప్పతనం కోసం మీ ఆత్మలో ఉన్న కోరికను పరిశీలిస్తూ అలా చేయండి. ఆ తరువాత, మీకు సంపూర్ణ తృప్తిని ఇవ్వగలది దేవుని చిత్తం ఒక్కటే అని గ్రహించి, ఆ కోరికను ఆయన చిత్తంతో ఏకం చేయండి. ఈ వరం కోసం ప్రతిరోజూ వినయంతో, మీ సొంత చిత్తంపై పట్టును విడిచిపెట్టి ప్రార్థించండి. అప్పుడు దేవునికి నిత్యమహిమను చేకూర్చే కార్యాలకు మీరు సాధనమవుతారు. పరలోకంలో ఇదే మీకు నిత్యానందంగా ఉంటుంది.

సమస్తాన్నీ సంరక్షించి నడిపించే ప్రభువా, నీ చిత్తం పరిపూర్ణమైనది, మహిమాన్వితమైనది. నా జీవితానికి నీ చిత్తమేమిటో గ్రహించి, దానినే ఎల్లప్పుడూ ఎంచుకునేలా, ప్రతిరోజూ నీ ఎదుట నన్ను నేను తగ్గించుకోవడానికి దయచేసి నాకు సహాయం చేయుము. నా ద్వారా ఎవరినైతే నీవు స్పృశించాలని కోరుకుంటున్నావో, వారందరికీ నీ రక్షణానుగ్రహాన్ని అందించే సాధనంగా నన్ను ఉపయోగించుకొనుము. యేసూ, నేను నీపై నమ్మకం ఉంచుతున్నాను.

మరిన్ని సువార్త ధ్యానాలు

దైవకారుణ్య ధ్యానాలు

పాస్కా కాలపు ప్రార్థనలు

పాస్కా కాలం కొరకు పవిత్ర గ్రంథ ధ్యానాలు

నేటి పునీతులు/పండుగలు

దివ్యబలిపూజ పఠనాల ఎంపికలు

పైన చూపిన ప్రధాన చిత్రాలు: కుంటి వ్యక్తిని స్వస్థపరుస్తున్న పునీత పేతురు, యోహాను. చిత్రకారుడు: నికోలాస్ పూస్సిన్, వికీమీడియా కామన్స్ ద్వారా