Enero 15, 2022
Sabado ng Unang Linggo sa Karaniwang Panahon
Mga Pagbasa para sa Araw na Ito
“Bakit Siya kumakaing kasalo ng mga maniningil ng buwis at mga makasalanan?” Narinig ito ni Jesus at sinabi Niya sa kanila, “Hindi nangangailangan ng manggagamot ang mga malulusog, kundi ang mga maysakit. Hindi Ako naparito upang tawagin ang mga matuwid kundi ang mga makasalanan.” Mark 2:16-17
Ginawa ito ni Jesus, ikaw kaya? Handa ka bang makitang kasama ang mga “makasalanan?” Kapansin-pansin sa talatang ito ng Kasulatan na ang LAHAT ay makasalanan. Kaya ang totoo, makasalanan ang bawat taong nakasalamuha ni Jesus.
Ngunit ang talatang ito at ang pagpuna kay Jesus ay hindi gaanong tungkol sa pakikisalamuha Niya sa mga taong nagkasala; sa halip, higit itong tungkol sa pakikisalamuha Niya sa mga taong minamaliit ng mga nasa mataas na antas ng lipunan. Kusang naglaan si Jesus ng panahon para sa mga “hindi katanggap-tanggap.” Hindi Siya natakot na makitang kasama ang mga hinahamak ng iba. Agad na napansin ng mga eskriba at mga Pariseo na malugod na tinatanggap ni Jesus at ng Kanyang mga alagad ang mga taong ito. Kumain at uminom silang kasalo ng mga maniningil ng buwis, mga nagkakasala sa larangan ng seksuwalidad, mga magnanakaw, at iba pang katulad nila. Higit pa rito, maliwanag na tinanggap nila nang malugod ang mga taong ito nang hindi hinuhusgahan.
Kaya balikan natin ang unang tanong…Handa ka bang makitang kasama at makisalamuha sa mga hindi gusto ng nakararami, mga nahihirapang mamuhay nang maayos, mga nasasaktan, mga nalilito, at iba pang katulad nila? Handa ka bang masira ang iyong reputasyon dahil minamahal at inaalagaan mo ang mga nangangailangan? Handa ka pa nga bang makipagkaibigan sa isang taong makasisira sa iyong pangalan sa lipunan?
Pagnilayan mo ngayon ang isang tao sa iyong buhay na tila nais mong iwasan. Bakit kaya? Sino ang ayaw mong makitang kasama o ang hindi mo agad nanaising makasalamuha? Maaaring ang taong ito, higit kaninuman, ang nais ni Jesus na paglaanan mo ng panahon.
Mapagmahal kong Panginoon, minamahal Mo ang lahat ng tao nang may malalim at ganap na pag-ibig. Naparito Ka lalo na para sa mga taong wasak at makasalanan ang buhay. Tulungan Mo akong laging hanapin ang mga nangangailangan at mahalin ang lahat ng tao nang may pag-ibig na hindi nagmamaliw at hindi mapanghusga. Jesus, nagtitiwala ako sa Iyo.
Higit pang mga Pagninilay sa Ebanghelyo
Mga Pagninilay sa Inaawit na Awa ng Diyos
Mga Meditasyon sa Banal na Kasulatan para sa Karaniwang Panahon
Mga Pagpipilian sa mga Pagbasa sa Misa
Tampok na larawan sa itaas: Piging sa Bahay ni Simon, ni Paolo Veronese, mula sa Wikimedia Commons
Tampok na Aklat:
Daily Reflections for Ordinary Time:
Weeks 1-17
Ang Daily Reflections for Ordinary Time: Weeks 1–17 mula sa Catholic Daily Reflections Series ay isang aklat para sa pang-araw-araw na debosyon na nag-aalok ng mga pagninilay sa Ebanghelyo ng araw sa paraang praktikal, tapat sa pananampalataya, at malapit sa pang-araw-araw na buhay. Ang mga bersiyong eBook at paperback ay nakaayos upang magamit ang aklat na ito taon-taon. Ang mga pagninilay ay hindi nakatalaga sa mga tiyak na petsa ng Karaniwang Panahon 2022, kundi sumasaklaw sa bawat pagpipilian para rito at sa mga susunod na taong liturhiko, kaya magagamit ang aklat na ito sa pagdedebosyon taon-taon.
