Nobyembre 5, 2022
Sabado ng Ika-31 Linggo sa Karaniwang Panahon
Mga Pagbasa para sa Araw na Ito
Narinig ng mga Pariseo, na mga maibigin sa salapi, ang lahat ng ito at nilibak nila Siya. At sinabi sa kanila ni Jesus, “Ipinapakita ninyong matuwid kayo sa paningin ng iba, ngunit alam ng Diyos ang inyong mga puso; sapagkat ang pinahahalagahan ng tao ay kasuklam-suklam sa paningin ng Diyos.” Lucas 16:14-15
“Alam ng Diyos ang nilalaman ng puso!” Napakadakilang katotohanan nito na dapat nating lubos na mabatid. Madalas sa buhay, may mga maling akala tayo tungkol sa iba, at may mga maling akala rin ang iba tungkol sa atin. Tinutukoy ng talatang ito ang pinakaugat ng pagkahilig na ito ng mga Pariseo na lumikha ng isang maling larawan ng kanilang sarili upang makita ng iba, habang halos hindi nila pinahahalagahan ang katotohanan sa kanilang kalooban na tanging Diyos lamang ang nakaaalam.
Kaya ano ang mas mahalaga sa iyo? Ano ang mas pipiliin mo? Mas nababahala ka ba sa mga opinyon ng iba o sa katotohanan ng iyong buhay ayon sa pagkakakilala ng Diyos?
Maaaring magkaroon ng dalawang anyo ang pakikibakang ito. Sa isang banda, tulad ng mga Pariseo, maaari tayong magsikap na magpakita sa iba ng isang huwad na pagkatao, samantalang lubos na alam ng Diyos ang katotohanan at ang maling larawang sinisikap nating ipakita. Sa kabilang banda, maaari nating matuklasan na mali ang pagkakakilala ng iba sa atin, at maaari itong magdulot sa atin ng matinding sakit ng loob. Kapag nangyari ito, maaari tayong magalit sa iba at magkaroon ng pagkahilig na ipagtanggol ang ating sarili nang hindi makatuwiran at labis-labis.
Ngunit ano ba ang mahalaga? Ano ang dapat nating pagtuunan ng pansin? Ang katotohanan ang mahalaga, at hindi natin dapat gaanong alalahanin ang mga bagay na hindi naman mahalaga sa Diyos. Ang dapat lamang nating pagtuunan ng pansin ay kung ano ang nasa isip ng Diyos at kung ano ang Kanyang iniisip tungkol sa atin at sa ating buhay.
Pagnilayan mo ngayon ang iyong pagkahilig na mag-alala sa iniisip ng iba tungkol sa iyo. Alamin mong nais ng Diyos na mamuhay ka nang tapat, na ipinapakita mo kung sino ka talaga. Huwag kang tumulad sa mga Pariseong labis na nahumaling sa magaganda ngunit maling larawang nabuo ng iba tungkol sa kanila. Ang pagtuunan mo lamang ng pansin ay ang pamumuhay sa katotohanan at ang nasa puso ng Diyos, at ipaubaya mo sa Kanya ang lahat ng iba pa. Sa huli, iyon lamang ang mahalaga.
Panginoon, tulungan Mo akong makita kung ano ang nasa Iyong puso, at tulungan Mo akong pagtuunan lamang ng pansin kung paano Mo ako nakikita. Alam kong mahal Mo ako, at alam kong nais Mong mamuhay ako nang lubusan sa katotohanan. Nawa’y ang Iyong pag-ibig ang maging gabay ng aking buhay sa lahat ng bagay. Jesus, nagtitiwala ako sa Iyo.
Bago para sa Adbiyento at Pasko!
Mga Pagninilay para sa Adbiyento at Pasko
Higit pang mga Pagninilay sa Ebanghelyo
Mga Pagninilay sa Inaawit na Awa ng Diyos
Mga Pagpipilian sa mga Pagbasa sa Misa
