Cebuano

Ayaw Kabalaka Bahin sa Kuwarta

Domingo, Pebrero 26, 2017

Ikawalong Domingo sa Ordinaryong Panahon, Tuig A

Mga Santos Karong Adlawa

luke_banks_2

Ayaw kamo kabalaka bahin sa ugma; ang ugma maoy moatiman sa kaugalingon niini. Igo na sa matag adlaw ang kaugalingon niining kadaotan.  Mateo 6:34

Kon tumanon lang unta nato kining mga pulonga!  Ayaw kabalaka bahin sa…  Ikaw ang mopuno sa tulo ka tulbok human nianang mga pulonga.  Unsa man ang imong gikabalak-an?

Sa tibuok bahin sa Ebanghelyo karon, gilista ang mga butang nga atong gikabalak-an apan dili unta angay natong kabalak-an.  Gipunting niini ilabina ang mga kabalaka bahin sa atong materyal nga kahimtang.  Prangka kaayo si Hesus sa pag-ingon nga dili kita angay mabalaka bahin sa kuwarta ug sa tanang butang nga mapalit niini.  Mas gimahal ug giatiman Niya kita kaysa mga langgam sa kalangitan o mga bulak sa kaumahan, apan hingpit ang Iyang pag-atiman kanila.  Dili ba kaha kita Niya atimanon usab?  Sa pagkatinuod, atimanon gayod kita Niya.

Niining Ebanghelyo, diretsong giingon ni Hesus nga dili ka makaalagad sa Diyos ug sa kuwarta sa samang higayon.  Sa laing pagkasulti, dili mahimong silang duha ang imong pangandoy ug gitinguha pag-ayo.

Kon himoon natong sentro sa kinabuhi ang kuwarta, malisod alang kanato ang pagsalig sa probidensiya sa Diyos.  Siyempre, dili pasabot niini nga magpasagad lang kita sa pagsangkap sa mga panginahanglan sa atong kaugalingon ug sa atong mga minahal.  Katungdanan nato ang pagtrabaho ug pagpanginabuhi aron matubag ang mga panginahanglan sa atong kaugalingon ug sa atong pamilya.  Apan lahi ang pagkugi ug pagtuman sa atong katungdanan sumala sa kabubut-on sa Diyos.  Lahi usab ang sobrang pagkabalaka o ang paghimo sa kuwarta nga sentro sa atong kinabuhi.

Ang yano nga tubag aron mahigawas ka sa kabalaka bahin sa kuwarta mao ang pagsalig.  Salig sa Diyos nga Siya ang moatiman kanimo.  Pag-ampo, pamati Kaniya, ug tugoti Siya nga ipakita kanimo ang Iyang kabubut-on bahin sa paagi sa imong pagpanginabuhi. Unya, uban sa pagsalig, buhata ang imong nadungog nga Iyang gipabuhat kanimo.  Usahay, tingali maglisod ka sa kuwarta.  Kining mga higayona mahimong hinungdan sa kabalaka ug kasamok sa hunahuna, o mahimong kahigayonan sa mas dakong pagsalig ug pagtugyan sa kaugalingon ngadto sa Diyos.

Ang Diyos wala gayod mosaad nga padato-on ka sa materyal nga mga butang.  Mahimong mahitabo kini o dili, ug sa pagkatinuod, dili kini kaayo mahinungdanon sa Diyos.  Ang labing importante mao nga adunahan ka man o kabos, mosalig ka sa Diyos ug itugyan mo Kaniya ang imong panalapi.  Kon daghan ka og kabtangan, siguroha nga itugyan mo kini sa Diyos matag adlaw ug hangyoon mo Siya matag adlaw nga giyahan ka sa paggamit sa imong bahandi.  Kon diyutay ra ang anaa kanimo, ayaw padala sa kahadlok, kondili salig nga nasayod ang Ginoo sa imong mga panginahanglan ug ipakita Niya kanimo kon unsaon kini pagtagbaw.

Pamalandongi karon kon unsa ka kanunay nimong itugyan sa Diyos ang imong panalapi.  Andam ka bang itugyan Kaniya sa hingpit ang pagdumala niining bahina sa imong kinabuhi?  Kon oo, mahigawas ka sa daghang kabalaka.

Ginoo, gitugyan ko Kanimo ang akong panalapi ug ang akong materyal nga mga kabtangan. Gitugyan ko kini sa Imong pag-atiman ug sa Imong probidensiya.  Palihog luwasa ako gikan sa walay pulos nga kabalaka ug kasamok sa hunahuna, ug tabangi ako nga Ikaw kanunay ang sentro sa akong kinabuhi.  Hesus, misalig ako Kanimo.

Pag-ampo alang sa Mabungahong Kwaresma

Dugang pa>>>