Cebuano

Ang Kamatuoran Bahin sa Daotang Tuyo

Domingo, Oktubre 8, 2017

Mga Pagbasa alang sa Ika-27 nga Domingo sa Ordinaryong Panahon, Tuig A

Tanang Santos alang sa Adlaw Karon

“Sa kataposan, gipadala niya ngadto kanila ang iyang anak, nga naghunahuna, ‘Tahoron nila ang akong anak.’ Apan sa pagkakita sa mga saop sa anak, nag-ingon sila sa usag usa, ‘Mao kini ang manununod. Dali, patyon nato siya aron maangkon nato ang iyang panulondon.’ Gidakop nila siya, gilabay sa gawas sa parasan, ug gipatay.” Mateo 21:37-39

Makapakurat kining bahina sa Sambingay sa mga Saop. Kon nahitabo pa kini sa tinuod nga kinabuhi, dili katuohan alang sa amahan nga nagpadala sa iyang anak sa parasan aron kuhaon ang abot nga gipatay sa daotang mga saop bisan ang iyang anak. Siyempre, kon nasayod pa siya nga mahitabo kini, dili gayod unta niya ipadala ang iyang anak sa ingon niining daotang kahimtang.

Gipakita niining bahina sa sambingay ang kalainan tali sa makataronganong panghunahuna ug sa panghunahuna nga sukwahi sa katarongan. Gipadala sa amahan ang iyang anak kay nagtuo siya nga molihok ang mga saop sumala sa katarongan. Nagdahom siya nga motahod man lang sila sa iyang anak, apan ang daotan hinuon ang iyang nasagubang.

Kon makasugat kita og binuhatan nga sukwahi kaayo sa katarongan ug naggikan sa daotan, mahimo kitang makurat, mawad-an og paglaom, mahadlok, o malibog. Apan importante nga dili kita magpadala niining mga pagbati. Hinuon, maningkamot kita nga magmabinantayon ug maalamon aron mailhan nato ang daotan sa dihang masugatan nato kini. Kon mas nakaila pa ang amahan sa sambingay sa kadaotan nga iyang giatubang, wala unta niya ipadala ang iyang anak.

Ingon usab niana kanato. Usahay, kinahanglang andam kitang moingon nga daotan ang daotan, imbes nga mosulay sa pagsagubang niini pinaagi sa pangatarongan. Ang daotan dili makataronganon. Dili kini madala sa pangatarongan o sa pakigsabot. Kinahanglan gayod kining suklan, ug suklan sa tibuok kusog. Mao kana nga gitapos ni Hesus kining sambingaya sa pag-ingon, “Sa pag-abot sa tag-iya sa parasan, unsa may iyang buhaton niadtong mga saop?” Mitubag sila kaniya, “Silotan niya kadtong mga tampalasan og makalilisang nga kamatayon” (Mateo 21:40-41).

Pamalandongi karong adlawa ang bisan unsang kahimtang diin nag-atubang ka mismo sa daotan. Kat-oni gikan niining sambingaya nga sa daghang higayon sa kinabuhi, ang katarongan maoy modaug. Apan adunay mga higayon nga ang gamhanang kapungot sa Diyos mao ray tubag. Kon ang daotan “lunsay” nga daotan, kinahanglan kining atubangon sa dayag uban sa kusog ug kaalam sa Espiritu Santo. Paningkamoti nga mailhan ang kalainan niining duha ka kahimtang, ug ayaw kahadlok sa pag-ingon nga daotan ang daotan kon anaa kini.

Ginoo, hatagi ako og kaalam ug katakos sa pag-ila kon unsay angay buhaton. Tabangi ako sa pagpangita og makataronganong kasulbaran uban niadtong andam nga maminaw. Hatagi usab ako sa kaisog nga akong gikinahanglan aron, pinaagi sa Imong grasya, makabarog ako nga lig-on ug molihok nga determinado kon mao kana ang Imong kabubut-on. Gitugyan ko Kanimo ang akong kinabuhi, minahal kong Ginoo. Gamita ako sumala sa Imong kabubut-on. Hesus, misalig ako Kanimo.

Dugang pa>>>