Sabado, Oktubre 7, 2017
Mga Pagbasa alang sa Paghandum sa Mahal nga Birhen sa Rosaryo
Birhen sa Santo Rosaryo – Handumanan
Samtang atong gipasidunggan karong adlawa ang Birhen sa Santo Rosaryo, maayong higayon kini sa pagpamalandong niining gamhanang pag-ampo. Ang labing maayong paagi sa pagpamalandong sa gahom sa Rosaryo mao ang pagpaminaw sa mga santos. Ania sa ubos ang pipila ka mga pulong sa mga santos sa Diyos bahin sa Rosaryo. Pamalandongi kini ug tugoti nga motandog kini sa imong kasingkasing.
“Dili gayod mahisalaag ang bisan kinsa nga mag-ampo sa Rosaryo matag adlaw. Malipayon kong pirmahan kining pamahayag pinaagi sa akong dugo.” – San Luis de Montfort.
“Sa tanang pag-ampo, ang Rosaryo mao ang labing matahom ug labing madagayaon sa mga grasya… higugmaa ang Rosaryo ug iampo kini matag adlaw uban sa debosyon.” – San Pio X.
“Pagkatahom sa pamilya nga mag-ampo sa Rosaryo matag gabii.” – Santo Papa Juan Pablo II.
“Ang Rosaryo mao ang akong pinalanggang pag-ampo. Pag-ampo nga kahibulongan! Kahibulongan sa kayano ug sa giladmon niini.” – Santo Papa Juan Pablo II.
“Ang Rosaryo usa ka bahandi nga dili matumbasan ug gikan sa inspirasyon sa Diyos.” – San Luis de Montfort.
“Walay laing mas seguradong paagi sa pagpangayo sa panalangin sa Diyos alang sa pamilya… kay sa pag-ampo sa Rosaryo matag adlaw.” – Papa Pio XII.
“Ang Rosaryo mao ang labing maayong matang sa pag-ampo ug ang labing epektibong paagi sa pagkab-ot sa kinabuhing dayon. Kini ang tambal sa tanan natong kadaotan ug ang gamot sa tanan natong panalangin. Wala nay labaw pa niini nga paagi sa pag-ampo.” – Santo Papa Leon XIII.
“Hatagi ako og kasundalohan nga nag-ampo sa Rosaryo, ug buntogon ko ang kalibotan.” – Beato Papa Pio IX.
“Kon nangandoy kamo og kalinaw sa inyong mga kasingkasing, sa inyong mga panimalay, ug sa inyong nasod, pagtigom kamo matag gabii aron mag-ampo sa Rosaryo. Ayaw palabyag bisan usa ka adlaw nga dili ninyo kini maampo, bisan unsa pa kabug-at ang inyong daghang kabalaka ug buluhaton.” – Papa Pio XI.
“Wala gayod ako hikawi sa Mahal nga Birhen sa grasya nga akong gipangayo pinaagi sa pag-ampo sa Rosaryo.” – San Padre Pio sa Pietrelcina.
“Ang labing maayong paagi sa pag-ampo mao ang pag-ampo sa Rosaryo.” – San Francisco de Sales.
“Usa ka adlaw, pinaagi sa Rosaryo ug sa Eskapularyo, luwason sa Mahal nga Birhen ang kalibotan.” – San Domingo.
Ginoo, hinaot nga masabtan ko ang gahom niining bililhong gasa, ang Santo Rosaryo. Hatagi ako og grasya nga mahimo kini nga bahin sa akong pag-ampo matag adlaw. Hesus, misalig ako Kanimo.




