Sabado, Enero 27, 2018
Ikatulong Semana sa Ordinaryong Panahon
Santa Angela Merici, Birhen – Opsyonal nga Handumanan

Si Jesus didto sa ulin, natulog nga nagsandig sa usa ka unlan. Gipukaw nila Siya ug giingnan, “Magtutudlo, wala ba Ikaw magtagad nga malunod na kita?” Mibangon Siya, gibadlong ang hangin, ug miingon sa dagat, “Hilom! Kalma!” Mihunong ang hangin ug mikalma pag-ayo ang dagat. Marcos 4:38-39
Ug milinaw pag-ayo ang tanan! Oo, nagtumong kini sa pagkalinaw sa dagat, apan mensahe usab kini alang kanato sa mga panahon nga nagubot ang atong kinabuhi. Gusto ni Hesus nga magdala og dakong kalinaw sa atong kinabuhi.
Sayon kaayo nga mawad-an og kadasig sa kinabuhi. Sayon kaayo nga matutok kita sa kagubot sa atong palibot. Bisan kon kini usa ka mapintas ug masakit nga pulong gikan sa uban, usa ka problema sa pamilya, kagubot sa katilingban, mga kabalaka sa panalapi, ug uban pa, daghan kaayong hinungdan nga ang matag usa kanato mahulog sa lit-ag sa kahadlok, kapakyasan, depresyon ug kabalaka.
Apan tungod gayod niini nga gitugotan ni Jesus nga mahitabo kini uban sa Iyang mga tinun-an. Misakay Siya sa sakayan uban sa Iyang mga tinun-an ug gitugotan sila nga makasinati og kusog nga unos samtang Siya natulog, aron pinaagi niini nga kasinatian makahatag Siya og tin-aw ug makapakombinsir nga mensahe kanatong tanan.
Niining sugilanona, usa ra ang gihunahuna sa mga tinun-an: Malaglag na sila! Giuyog-uyog sila sa mga balod, ug nahadlok sila nga hapit na silang malunod. Apan niining tanan, diha ra si Hesus, nahinanok sa pagkatulog, naghulat nga pukawon nila Siya. Ug sa dihang gipukaw nila Siya, gipahunong Niya ang unos ug milinaw pag-ayo ang tanan.
Ingon usab niana sa atong kinabuhi. Dali ra kaayo kitang mabalaka tungod sa mga kabug-at ug kalisdanan sa matag adlaw. Kasagaran magpadala kita sa kabug-at sa mga problema nga atong giatubang. Ang yawe mao ang pagtutok kang Hesus. Tan-awa Siya diha sa imong atubangan: natulog Siya ug naghulat nga pukawon nimo Siya. Kanunay Siyang anaa, kanunayng naghulat, kanunayng andam.
Ang pagpukaw sa atong Ginoo sama ra kayano sa pagbalhin sa atong panan-aw gikan sa madag-umong dagat ug pagsalig sa Iyang diosnong presensya. Ang tanan nag-agad sa pagsalig. Hingpit ug dili matarog nga pagsalig. Nagsalig ka ba Kaniya?
Pamalandongi karon kon unsa ang hinungdan sa imong adlaw-adlaw nga kabalaka, kahadlok o kalibog. Unsa man ang daw nagtabyog kanimo ngadto-nganhi, nga nakapabug-at ug nakapabalaka kanimo? Samtang imong tan-awon kining palas-anon, tan-awa usab si Jesus nga anaa uban kanimo, naghulat nga moduol ka Kaniya uban sa pagsalig aron Siya ang magdumala sa matag kahimtang sa imong kinabuhi. Gihigugma ka Niya ug ampingan ka gayod Niya.
Ginoo, midangop ako Kanimo taliwala sa mga hagit sa kinabuhi ug buot Kong pukawon Ka aron tabangan Mo ako. Nasayod ako nga kanunay Kang duol, naghulat nga mosalig ako Kanimo sa tanang butang. Tabangi ako nga motutok Kanimo ug motuo sa Imong hingpit nga gugma alang kanako. Hesus, misalig ako Kanimo.
Santos sa Adlaw – Santa Angela Merici



