Domingo, Enero 28, 2018
Ikaupat nga Domingo sa Ordinaryong Panahon, Tuig B
Santo Tomas de Aquino, Pari ug Doktor sa Simbahan – Handumanan

Gibadlong siya ni Hesus ug miingon, “Hilom! Gawas gikan kaniya!” Gikurog pag-ayo sa mahugaw nga espiritu ang maong tawo, ug uban sa kusog nga singgit migawas kini gikan kaniya. Marcos 1:25-26
Kining bahin sa Ebanghelyo ni Marcos mahimong eksena sa usa ka makahahadlok nga salida. Aw, kon ang Hollywood pa ang mohimo sa salida. Sa pagkatinuod, usa kini ka buhat sa dakong gugma ug kalooy nga nagpadayag sa gahom ug awtoridad ni Hesus!
Sugilanon kini sa usa ka tawo nga gisudlan sa mahugaw nga espiritu, usa ka demonyo. Gisakit siya sa demonyo. Busa gitan-aw siya ni Hesus uban sa dakong gugma ug kalooy, ug giabog Niya ang daotang espiritu aron makagawas ang tawo gikan sa iyang pagkabihag. Tinuod gayod kini nga buhat sa gugma.
Apan may pangutana nga mitungha dinhi: Unsay papel sa mga daotang espiritu sa atong kalibotan, ug unsa ka dako ang ilang katakos sa pagkontrol o pagmaniobra kanato, o bisan sa pagtintal lang kanato? Mga gamhanang espiritu sila nga gilalang sa Diyos nga may kagawasan sa pagpili, ug gigamit nila kana nga kagawasan sa pagtalikod sa Diyos. Usa sa ilang pangunang katungdanan, nga gihatag kanila sa dihang gilalang sila, mao ang pag-atiman sa katawhan. Ang mga espiritu nga nahulog gikan sa grasya tungod sa ilang garbo ug sala nagpabilin gihapon sa ilang kinaiyanhong espirituhanong gahom. Apan tungod sa ilang pagkahulog, pagdumot na lang sa katawhan ang anaa kanila, ug naninguha sila sa paglaglag kanato. Tinuod kini. Angay nga masabtan nato kini pag-ayo.
Apan walay hinungdan nga mawad-an kita og paglaom o magpadala sa kahadlok. Kining mga espiritu, siyempre, ubos gihapon sa gahom ug awtoridad sa Diyos. Wala silay mahimo kon dili kini itugot sa Diyos, ug sa kataposan dili sila makagahom sa atong kinabuhi.
Apan sa pagkakaron, kinahanglan natong ilhon ang ilang kinaiyanhong espirituhanong gahom ug impluwensiya. Kinahanglan natong masabtan nga makahimo sila ug maningkamot gayod sa pagpahinabog dakong kadaot sa atong kinabuhi. Kon tugotan nato ang kahadlok nga mopaluya sa atong pagtuo, ug kon dili kita mosalig sa labing gamhanang Diyos, hinayhinay natong gitugotan sila nga modako ang ilang impluwensiya kanato. Apan kon tugotan nato ang grasya ug kalooy sa Diyos nga modaog sa ilang daotang impluwensiya, madungog nato si Hesus nga nagbadlong kanila ug nagsugo kanila sa paghunong.
Pamalandonga karong adlawa nga tinuod ang espirituhanong pakigbisog. Apan segurado ang kadaugan kon magpaubos lang kita atubangan sa Diyos ug mosalig sa Iyang gahom ug awtoridad. Ang pagpaubos mao ang yawe niining espirituhanong pakigbisog. Mao kini ang yawe sa pagbuntog sa mga pag-atake ug mga tentasyon sa daotan. Busa pagpaubos atubangan sa Diyos kon gibati nimo nga gidaogdaog o gitintal ka. Pagpaubos pinaagi sa pag-angkon sa imong mga kahuyang. Ilha nga ang Diyos lamang ang adunay awtoridad sa paglig-on kanimo. Salig Kaniya. Dili ka Niya pakyason!
Ginoo, huyang ako, ug kon wala Ka, wala akoy mahimo. Tabangi ako nga masayod ug motuo niini. Tabangi ako nga magpaubos sa Imong atubangan ug nga pinaagi nianang pagpaubos malig-on ako sa pagbuntog sa mga tentasyon ug impluwensiya sa daotan. Hesus, misalig ako Kanimo!
Santos sa Adlaw – Santo Tomas de Aquino
Mga Debosyon alang sa Kwaresma 2018




