Tagalog

Pagpapatahimik sa Dagat

Sabado, Enero 27, 2018

Ikatlong Linggo sa Karaniwang Panahon

Mga Pagbasa Ngayon

Santa Angela Merici, Birhen – Paggunita na Maaaring Ipagdiwang

Si Jesus ay nasa hulihan ng bangka, natutulog na nakahilig sa isang unan. Ginising nila Siya at sinabi, “Guro, wala ba Kayong pakialam na mapapahamak na kami?” Bumangon Siya, sinaway ang hangin, at sinabi sa dagat, “Tumahimik ka! Pumayapa ka!” Tumigil ang hangin at nagkaroon ng ganap na katahimikan. Marcos 4:38-39

At nagkaroon ng malaking katahimikan! Oo, tumutukoy ito sa pagpayapa ng dagat, ngunit isa rin itong mensahe para sa mga kaguluhang kinakaharap natin kung minsan sa buhay. Nais ni Hesus na maghatid ng malalim na kapayapaan sa ating buhay.

Napakadaling panghinaan ng loob sa buhay. Napakadaling ituon ang ating pansin sa kaguluhang nakapaligid sa atin. Maging ito man ay isang malupit at masakit na salita mula sa iba, problema sa pamilya, kaguluhan sa lipunan, suliraning pinansiyal, at iba pa, napakaraming dahilan upang ang bawat isa sa atin ay mahulog sa bitag ng takot, pagkabigo, depresyon, at pagkabalisa.

Ngunit ito mismo ang dahilan kung bakit pinahintulutan ni Jesus na mangyari ito sa Kanyang mga alagad. Sumakay Siya sa bangka kasama ang Kanyang mga alagad at hinayaan silang makaranas ng isang malakas na unos habang Siya ay natutulog, upang sa pamamagitan ng karanasang ito ay maihatid Niya sa ating lahat ang isang malinaw at kapani-paniwalang mensahe.

Sa salaysay na ito, iisa ang nasa isip ng mga alagad: Mamamatay na sila! Hinahampas sila ng mga alon, at natatakot silang anumang sandali ay may mangyaring sakuna. Ngunit sa gitna ng lahat ng iyon, naroon si Hesus, mahimbing na natutulog, naghihintay na gisingin nila Siya. At nang gisingin nila Siya, pinatahimik Niya ang unos at lubusang kumalma ang dagat.

Ganyan din sa ating buhay. Napakadali nating matinag sa mga alalahanin at hirap ng araw-araw. Madalas nating hinahayaang madaig tayo ng mga problemang kinakaharap natin. Ang susi ay ang ituon ang ating mga mata kay Hesus. Masdan mo Siya sa iyong harapan, natutulog at naghihintay na gisingin mo Siya. Lagi Siyang naroon, laging naghihintay, laging handa.

Ang paggising sa ating Panginoon ay kasingsimple ng pag-aalis ng ating tingin sa maunos na dagat at pagtitiwala sa Kanyang banal na presensya. Pagtitiwala ang pinakamahalaga. Ganap at hindi natitinag na pagtitiwala. Nagtitiwala ka ba sa Kanya?

Pagnilayan mo ngayon ang anumang nagdudulot sa iyo ng pagkabalisa, takot, o pagkalito sa araw-araw. Ano ang tila nagpapabaling-baling sa iyo at nagdudulot ng pagkabagabag at pag-aalala? Habang nakikita mo ang pasaning ito, masdan mo rin si Jesus na naroon kasama mo, naghihintay na lumapit ka sa Kanya nang may pagtitiwala upang mapangasiwaan Niya ang bawat sitwasyong kinakaharap mo sa buhay. Mahal ka Niya at tunay na pangangalagaan ka Niya.

Panginoon, lumalapit ako sa Iyo sa gitna ng mga pagsubok sa buhay at nais Kitang gisingin upang saklolohan Mo ako. Alam kong lagi Kang malapit at hinihintay Mong magtiwala ako sa Iyo sa lahat ng bagay. Tulungan Mo akong ituon ang aking mga mata sa Iyo at manampalataya sa Iyong ganap na pag-ibig sa akin. Hesus, nagtitiwala ako sa Iyo.

Higit Pa>>>

Santo ng Araw – Santa Angela Merici