Domingo, Hulyo 22, 2018
Ika-16 nga Domingo sa Ordinaryong Panahon, Tuig B
Santa Maria Magdalena – Kasaulogan

“Dali, adto kamo nga kamo-kamo lamang sa usa ka dapit nga mingaw ug pahulay kadiyot.” Mark 6:31a
Tingali mas gikinahanglan pa nato nga madungog kining pagdapit kaysa atong naamgohan. Ug daghan ang maglisod sa pagdawat niining pagdapit ni Jesus. Apan dawata kini isip pagdapit nga gitumong kanimo mismo sa atong Ginoo. Paminawa siya nga nag-ingon kanimo, “Anak ko, palihog adto nga ikaw ra sa usa ka dapit nga mingaw ug pahulay una didto.”
Adunay dakong kaayohan ug kahupayan nga madala sa kahilom ug sa mga higayon sa pag-inusara. Ang kahilom ug pag-inusara makatabang kanato sa pagtutok pag-usab sa mga butang nga angay natong tutokan. Kanunay kaayo kitang mabug-atan sa pagkabusy sa kinabuhi. Ang “pagkabusy” sagad usa ka paagi sa daotan sa pagpaluya kanato ug pagpasimang kanato sa hustong dalan. Kini makababag kanato sa pagpaminaw sa malumo, tin-aw ug makapalagsik nga tingog sa Dios. Busa, sa unsang paagi ka gidapit sa Dios sa pagpalayo nga mag-inusara ug pagpahulay?
Ang hinungdan niining pagdapit mao ang pangandoy ni Jesus nga makapahulay kita gikan sa mga palas-anon nga nagbug-at kanato nga dili man unta kinahanglan. Tinuod nga daghang maayong butang ang ipabuhat sa Dios kanato nga makapakapoy pag-ayo. Apan kining “balaang kakapoy” dili daotan. Sa pagkatinuod, ang pagkakapoy sa pagtuman sa kabubut-on sa Dios makapalig-on sa atong pagtuo ug makapuno kanato sa kalipay. Ug kana nga kalipay makapagaan sa atong palas-anon.
Ang nag-unang hinungdan nganong kinahanglan kitang “mopalayo” ug “mopahulay” mao nga daghang butang sa kinabuhi ang dili kabahin sa kabubut-on sa Dios. Mga palas-anon kini nga atong gipapas-an sa atong kaugalingon bisan wala kinahanglana. Labaw sa tanan, kini nga mga palas-anon mao ang kinahanglan natong pahulayan.
Ang paggahin ug panahon nga kamo rang duha ni Jesus makatabang nga mahibalik ang imong pagtagad sa mahinungdanon ug mawagtang ang mga samok sa kinabuhi. Paagi kini sa paglikay sa atong kalit-kalit nga mga tinguha ug mga naandan nga nagpahilayo kanato sa kabubut-on sa Dios nga naghatag ug kalipay. Busa pamalandongi kining pagdapit. Hunahunaa kon unsaon nimo kini pagtuman. Makagahin ka ba karong adlawa ug labing menos napulo ka minuto sa usa ka hilom nga dapit aron makapahulay sa mga bukton ni Jesus?
Pamalandungi karong adlawa kon unsa ka kaandam ug kamauyonon sa pagdawat sa pagdapit ni Hesus nga moduol ug mopahulay uban Kaniya ug diha Kaniya. Pasaliga ang imong kaugalingon nga buhaton gayod kini. Desisyoni karong adlawa nga mogahin og panahon nga mag-inusara. Nianang higayona sa pag-inusara, paningkamoti nga madungog ang hinay, malumo ug hilom nga tingog sa Dios. Tugoti nga ang kahilom ug kalinaw sa presensya sa Dios maghatag kanimo og katin-aw ug magtabang kanimo sa pagtutok sa mahinungdanon taliwala sa imong daghang buluhaton.
Ginoo, tabangi ako nga madungog ang Imong pagtawag kanako sa pagpahulay ug pagpahimulos sa kalinaw. Tabangi ako sa pagpangita Kanimo ug sa pagdawat sa Imong malumong pagdapit. Hesus, misalig ako Kanimo.
Santos sa Adlaw – Santa Maria Magdalena



