Sabado, Agosto 25, 2018
Sabado sa Ikakawhaan nga Semana sa Ordinaryong Panahon
San Luis o San Jose sa Calasanz, Pari – Mga Opsiyonal nga Handumanan

Paminaw sa Iningles
“Ang mga eskriba ug ang mga Pariseo milingkod sa lingkoranan ni Moises. Busa, buhata ug tumana ang tanan nilang isulti kaninyo, apan ayaw sunda ang ilang panig-ingnan. Kay nagsangyaw sila apan wala nila kini buhata. Nagbugkos sila ug bug-at nga mga lulan nga lisod pas-anon ug ilang ipapas-an sa abaga sa mga tawo, apan dili gani sila motandog niini bisan sa usa ka tudlo aron sa pagtabang. Ang tanan nilang buhat gihimo aron makita sa mga tawo. Ilang gipadak-an ang ilang mga pilakterya ug gipataas ang mga borlas sa ilang mga sapot. Ganahan sila sa mga dapit nga dungganon sa mga kombira, sa mga lingkoranan nga dungganon sa mga sinagoga, sa mga pagtimbaya sa mga tiyanggihan, ug sa pagtawag kanila nga ‘Rabbi.’” Mateo 23:2-7
Sumala sa tradisyon, ang mga Sabado gipahinungod sa pagpasidungog sa atong Mahal nga Inahan. Pagkalahi gayod sa mga Pariseo ug sa atong Mahal nga Inahan, ang Rayna sa Langit ug sa Yuta!
Una, hisgotan nato ang mga Pariseo. Kanunay silang gibadlong ni Hesus tungod sa ilang garbo ug sa ilang pagpakamatarong. Nag-ampo sila sa ilang kaugalingon, nangita sa mga lingkoranan sa dungog, nagpugos nga tahoron sila sa uban, ug walay laing gihunahuna kondili ang ilang kaugalingon. Ang kanunayng pagbadlong ni Hesus kanila usa ka buhat sa kaluoy. Pinaagi niini, naningkamot Siya nga mahigawas sila sa ilang garbo aron makita nila ang kahayag sa kamatuoran.
Ikaduha, itandi nato sila sa atong Mahal nga Inahan. Labaw pa sa atong mahanduraw ang iyang pagkamapaubsanon. Siya mao ang Imakulada Konsepsiyon… hingpit sa tanang paagi. Ang tanang birtud anaa sa iyang kalag. Siya ang Bag-ong Eva, ang bag-ong Inahan sa tanang buhi. Ug gipasidunggan siya hangtod sa kahangtoran isip Rayna sa Langit ug sa Yuta.
Makita ang dakong kalainan sa paagi sa iyang pagkinabuhi. Makita kini sa kamatuoran nga aduna siyay bug-os nga katungod sa pagbayaw sa iyang kaugalingon ug sa pagdahom ug dungog ug pagtahod sa tibuok niyang kinabuhi. Apan, sa iyang pagkamapainubsanon, wala niya angkona ang maong katungod. Gitugotan niya nga magpabilin siyang tago ug gani biaybiayon tungod sa pagmabdos nga dili minyo. Lahi siya sa mga Pariseo sa tanang paagi.
Apan karon, hangtod sa kahangtoran, gibayaw siya sa Diyos. Sa walay kataposan ilhon siya nga Rayna ug pasidunggan ug higugmaon sa tanan. Ang tanan niyang hiyas mosidlak sa walay kataposan kay siya gigantihan ug gibayaw aron makita sa tanan.
Pamalandongi karong adlawa kon kinsa ang imong mas nahisama. Mas nahisama ka ba sa mga Pariseo nga nagtinguha sa pagbayaw sa ilang kaugalingon? O mas nahisama ka ba sa atong Bulahang Inahan nga nagpaubos sa iyang kaugalingon? Pilia ang pagsundog sa atong Bulahang Inahan ug ang Diyos moganti usab kanimo hangtod sa kahangtoran!
Ginoo, hinaot nga makita ko ang katahom ug kahalangdon sa kalag sa Imong Inahan. Hinaot nga higugmaon ug pasidunggan ko siya. Ug sa akong paghigugma ug pagpasidungog kaniya, hinaot nga masundog ko siya sa tanang paagi. Hesus, misalig ako Kanimo.
Mga Santos Karong Adlawa – San Luis o San Jose de Calasanz



