Wednesday, July 24, 2019
Wednesday of the Sixteenth Week in Ordinary Time
Saint Sharbel Makhluf, Priest, Hermit – Optional Memorial
Paminaw sa Iningles
“Apan ang ubang binhi nahulog sa tambok nga yuta ug namunga og usa ka gatos, kan-uman o katloan ka pilo. Ang adunay mga dalunggan angay maminaw.” Mateo 13:8-9
Ang “mga dalunggan” nga gihisgotan ni Jesus labaw pa gayod sa atong pisikal nga mga dalunggan. Ang Iyang gipasabot mao ang atong sulodnong kinabuhi, diin kita makahimo sa pagpaminaw, pagsabot, pagdawat ug pagpili sa Iyang balaang kabubut-on. Iyang gipahayag kanato ang Iyang Pulong sa daghang paagi. Ang pangutana nga angay pamalandongan mao kon namati ba kita ug andam bang motugot nga motuhop sa atong kasingkasing ang Iyang Pulong. Pinaagi lamang sa matinagdanong pagpaminaw sa Iyang Pulong nga atong mahangop ang Iyang kabubut-on.
Ang atong mga kalag kinahanglan mahisama sa tambok nga yuta. Pamilyar kini nga hulagway gikan sa Balaang Kasulatan, apan takos kini nga hatagan og igong panahon sa pagpamalandong. Dili sayon ang pagpatambok sa yuta sa atong mga kalag. Mas sayon nga mahisama kita sa uga, tunokon, batoon ug dili madawaton nga yuta. Apan aron mapalambo sulod kanato ang tinuod nga katambok ug ang yutang mabungahon, gikinahanglan ang dakong pag-atiman ug pagtagad. Unsaon man kini?
Usa sa labing mahinungdanong sinugdanan aron mahimong tambok ang yuta sulod sa atong mga kalag mao ang pagpaningkamot nga makabaton og tinuod nga pagpaubos. Sa kinauyokan niini, ang pagpaubos mao ang pag-ila sa kamatuoran kon kinsa kita ug, sa piho gayod, ang pag-ila sa atong panginahanglan sa grasya sa Dios sa atong kinabuhi. Ang mapaubsanong pag-angkon nga wala kitay mahimo kon walay grasya sa Dios mahinungdanon aron mahimong tambok ang yuta sa atong kinasuloran.
Gikan niini, kinahanglan kitang moabot sa hingpit nga pagsalig sa Dios. Kon magpaubos una kita ug moila nga hingpit kitang nagkinahanglan sa Dios, maandam kitang mosalig Kaniya sa dihang Siya mosulti. Ug kon Siya mosulti, mamati ug motuman kita uban sa kalipay. Niana lamang mabubo sa atong kinabuhi ang maayong bunga sa Iyang kalooy ug, pinaagi kanato, sa kinabuhi sa uban.
Pamalandongi karon ang imong sulodnong kinabuhi. Unsay anaa niini? Mas nahisama ba kini sa uga ug batoon nga yuta? O kanunay ka bang naningkamot sa pag-amuma sa imong kalag ug pag-andam niini sa pagdawat sa balaang Pulong sa Dios? Paningkamoti nga mamahimong mabungahon ang imong kinasuloran, ug ang Ginoo na ang mag-atiman aron mamunga og maayo ang imong kinabuhi.
Lord, help me to become truly fertile soil for Your most holy Word. May I receive all that You speak and may the seed of faith be planted deep within. Help this faith to grow and to produce the blessings You wish to bestow. Jesus, I trust in You.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Saint of the Day – Saint Sharbel Makhluf
