May 7, 2020
Thursday of the Fourth Week of Easter
Readings for Today
Paminaw sa Iningles
Human hugasi ni Jesus ang mga tiil sa mga tinun-an, miingon Siya kanila: “Sa pagkatinuod, sa pagkatinuod, sultihan Ko kamo, walay ulipon nga labaw sa iyang agalon, ni sinugo nga labaw sa nagsugo kaniya.” Juan 13:16
Kon atong pamalandongan ang mas lawom nga kahulogan niini, madungog nato si Jesus nga nagsulti kanato og duha ka butang. Una, maayo nga isipon nato ang atong kaugalingon nga mga ulipon ug mga sinugo sa Dios, ug ikaduha, kinahanglan nga kanunay natong ihatag sa Dios ang himaya. Importante kining mga punto nga angay natong sundon sa espirituhanong kinabuhi. Atong tan-awon kining duha.
Kasagaran, dili kaayo madanihon ang hunahuna nga mahimong “ulipon.” Dili na kaayo kita sinati sa pagkaulipon niining atong panahon, apan tinuod kini ug nakapahinabo og hilabihang kadaot sa tibuok kasaysayan sa atong kalibotan, sa daghang kultura ug sa lainlaing panahon. Ang labing daotan sa pagkaulipon mao ang kabangis sa pagtratar sa mga ulipon. Gitratar sila ingong mga butang ug kabtangan, nga hingpit nga supak sa ilang tawhanong dignidad.
Apan handurawa ang usa ka tawo nga ulipon sa usa ka agalon nga nahigugma kaniya sa hingpit ug kansang unang misyon mao ang pagtabang nianang “ulipon” nga mapalambo sa hingpit ang iyang tinuod nga mga katakos ug makab-ot ang katumanan sa iyang kinabuhi. Niining kahimtanga, “sugoon” sa agalon ang ulipon nga dawaton ang gugma ug kalipay ug dili gayod niya lapason ang tawhanong dignidad niini.
Ingon niini ang atong relasyon sa Dios. Dili gayod kita angay mahadlok sa hunahuna nga mahimong ulipon sa Dios. Bisan tuod kining mga pulonga mahimong magpahinumdom sa mga paglapas sa tawhanong dignidad kaniadto, ang pagkaulipon sa Dios angay mahimong atong tumong. Ngano man? Kay ang Dios mao ang angay natong tinguhaon nga mahimong atong agalon. Sa pagkatinuod, mas angay pa natong tinguhaon nga ang Dios maoy atong agalon kay sa kita mismo ang magbuot sa atong kaugalingon! Mas maayo ang pagtratar sa Dios kanato kay sa atong pagtratar sa atong kaugalingon! Iyang itakda alang kanato ang usa ka hingpit nga kinabuhi sa pagkabalaan ug kalipay, ug kita mapainubsanong magpasakop sa Iyang balaang kabubut-on. Ug labaw pa niana, ihatag Niya kanato ang gikinahanglang mga paagi aron matuman ang tanan Niyang gitakda alang kanato kon tugotan nato Siya. Ang pagkahimong “ulipon sa Dios” usa ka maayong butang ug angay nga mao ang atong tumong sa kinabuhi.
Samtang nagkadako ang atong katakos sa pagtugot sa Dios nga modumala sa atong kinabuhi, kinahanglan usab nga kanunay kitang magpasalamat ug magdayeg sa Dios tungod sa tanan Niyang gibuhat diha kanato. Kinahanglan nga ngadto Kaniya nato ipahinungod ang tanang himaya tungod sa Iyang pagtugot nga makaambit kita sa Iyang misyon ug sa Iyang pagpadala kanato aron tumanon ang Iyang kabubut-on. Labaw Siya sa tanang paagi, apan gusto usab Niya nga makaambit kita nianang pagkahalangdon ug himaya. Busa, ang maayong balita mao nga kon atong himayaon ug pasalamatan ang Dios tungod sa tanan Niyang gibuhat diha kanato ug sa tanang gilatid sa Iyang balaod ug sa Iyang mga sugo, ipataas kita sa Dios aron makaapil ug makaambit sa Iyang himaya! Usa kini ka bunga sa Kristohanong kinabuhi nga naghatag kanato og mga panalangin nga labaw pa sa bisan unsang atong mahunahunaan sa atong kaugalingon.
Pamalandongi karong adlawa ang pagtugot sa imong kaugalingon nga mahimong bug-os nga ulipon sa Dios ug sa Iyang kabubut-on. Kana nga pasalig maoy mosugod sa imong panaw diha sa dalan sa dakong kalipay.
Lord, I submit myself to Your every command. May Your will be done in me and only Your will. I choose You as my Master in all things and trust in Your perfect love for me. Jesus, I trust in You.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Santos/Kasaulogan Karong Adlawa
Mga Kapilian sa mga Basahon sa Misa
