Cebuano

Ang Padayong Presensya sa Atong Ginoo

(Pahinumdom: Kon gisaulog ang Pagsaka sa Ginoo sa Langit niadtong Huwebes sa inyong diyosesis, padayon sa ubos ngadto sa pamalandong alang sa Ikapitong Domingo sa Pasko sa Pagkabanhaw.)

Domingo, Mayo 24, 2020

Dakong Kapistahan sa Pagsaka sa Atong Ginoo sa Langit

Mga Pagbasa alang sa Pagkayab sa Langit

Paminaw sa Iningles

“Busa panglakaw kamo ug himoa ninyong mga tinun-an ang tanang kanasoran. Bawtismohi sila sa ngalan sa Amahan, ug sa Anak, ug sa Espiritu Santo, ug tudloi sila sa pagtuman sa tanan nga akong gisugo kaninyo.  Ug timan-i: ania ako uban kaninyo sa kanunay, hangtod sa kataposan sa kalibotan.”  Mateo 28:19-20 (Tuig A)

Gitapos ni Hesus ang Iyang misyon dinhi sa yuta ug misaka Siya sa langit aron molingkod sa Iyang mahimayaong trono sa walay kataposan.  Apan gitapos ba gayod Niya ang Iyang misyon dinhi sa yuta?  Oo ug dili ang tubag. Oo, milingkod gayod Siya sa Iyang mahimayaong trono, apan wala Niya taposa ang Iyang misyon dinhi sa yuta. Ang Pagsaka sa Ginoo sa Langit usa ka kataposan ug usa usab ka sinugdanan.  Kini ang pagbalhin ngadto sa sunod nga hugna sa hingpit nga plano sa Amahan.  Ug ang pagsabot kon giunsa pagkatuman sa maong plano angay magpuno kanato sa kahibulong ug pagtahod.

Lagmit nahadlok ug nalibog ang mga Apostoles. Si Hesus diha uban kanila, unya namatay Siya, nabanhaw ug nagpakita kanila sa makadaghang higayon, ug sa kataposan misaka Siya ngadto sa Amahan sa ilang atubangan. Apan giingnan usab Niya sila nga maayo nga mobiya Siya. Sa pagkatinuod, miingon Siya nga mas maayo pa nga mobiya Siya. Dili ikatingala nga nalibog sila. Giingnan usab sila ni Hesus nga moabot ang Iyang Manlalaban aron giyahan sila ngadto sa tibuok Kamatuoran. Busa, gikan sa kalipay, gibati sa mga Apostoles ang kahadlok, dayon pagkahupay ug mas dakong kalipay, dayon kalibog ug kasubo, ug sa ulahi napuno sila sa mga pangutana ug kawalay kasigurohan.

Pamilyar ba kini kanimo? Tingali ingon usab niini ang pagtan-aw sa uban sa ilang kinabuhi. May pagsaka ug paglugsong, mga liko ug kalit nga kausaban, mga kalipay ug kasubo. Sa matag hugna may bag-ong madayag—usa ka hagit, usa ka butang nga mahimayaon, o usa ka butang nga makapasubo. Ang maayong balita mao nga ang laraw sa Amahan hingpit nga natuman sa matag hugna.

Niining dakong kapistahan, ania kita sa bahin sa hingpit nga plano diin si Hesus magsugod na sa pagdumala gikan sa Langit sa Iyang misyon sa pagtukod sa Gingharian sa Dios. Gikan sa Iyang trono, ingnon ta, Siya ang naggiya sa dagan sa atong kinabuhi. Gikan sa Langit, kalit Siyang nagsugod sa walay hunong nga pagkunsad sa atong kinabuhi, nga nagtuman sa Iyang misyon diha sa mga Apostoles ug pinaagi kanila, ug diha usab kanatong tanan ug pinaagi kanato. Ang Iyang Pagsaka sa Langit wala magpasabot nga wala na si Hesus dinhi. Hinuon, nagpasabot kini nga anaa na Siya uban sa matag usa nga modangop Kaniya ug motugyan sa iyang kinabuhi sa Iyang misyon. Gikan sa Langit, makauban ni Hesus ang tanan. Makapuyo Siya dinhi kanato ug nagdapit kanato sa pagpuyo diha Kaniya. Kini ang bag-ong sinugdanan sa Simbahan. Karon, ang buhaton na lang sa mga Apostoles mao ang paghulat sa pagkunsad sa Espiritu Santo.

Pamalandonga karong adlawa ang makanunayon ug suod nga presensya sa atong Ginoo sa imong kinabuhi. Hinumdomi nga gidapit ka ni Jesus sa pag-ambit sa Iyang misyon. Gikan sa Iyang mahimayaong trono, gusto Niya nga “magwali kita bisan asa.” Gusto Niyang dapiton ang matag usa kanato sa pagtuman sa iyang bahin. Ang bahin sa laraw sa Amahan nga gitugyan sa matag usa kanato wala itugyan ngadto sa lain. Kitang tanan may bahin nianang larawa. Unsa ang imong bahin? Giunsa ni Jesus pagdumala ang Iyang misyon pinaagi kanimo? Pamalandonga kini karong adlawa, ug hinumdomi nga giubanan ka Niya samtang moingon ka og “Oo” sa imong bahin sa mahimayaong katumanan sa Iyang hingpit nga laraw.

Ginoo, nakita ko gayod nga ang akong kinabuhi puno sa mga pagsaka, pagkanaog ug mga liko-liko. Adunay mga kalipay ug kasubo, ug mga higayon nga malibog ko ug mga higayon nga makasabot ko pag-ayo. Sa tanang kahimtang, tabangi ako nga kanunayng moingon og “Oo” sa Imong plano. Hesus, nagsalig ako Kanimo.

Nobena sa Espiritu Santo
Giampo isip pagpangandam alang sa Pentekostes
Ikatulong Adlaw – Domingo, Mayo 24

Dugang nga mga Pamalandong sa Ebanghelyo

Mga Pamalandong sa Diosnong Kalooy

Mga Santos/Kasaulogan Karong Adlawa

Mga Kapilian sa mga Basahon sa Misa

Dugang nga Basahon – Pagsaka sa Langit

Pamalandong sa Pag-ampo alang sa Pagsaka sa Langit

Hulagway: Ang Pagsaka sa Ginoo sa Langit ni Benjamin West

+++


Ang Pag-ampo ni Jesus

Ikapitong Domingo sa Pasko sa Pagkabanhaw, Tuig A

Mga Pagbasa Karong Adlawa

Paminaw sa Iningles

“Amahan, miabot na ang takna. Himayaa ang imong Anak aron himayaon ka sa imong Anak, maingon nga gihatagan mo siyag gahom ibabaw sa tanang tawo aron mahatagan niya og kinabuhing dayon ang tanan nga imong gihatag kaniya.”  Juan 17:1–2 (Tuig A)

Ang kapitulo 17 sa Ebanghelyo sumala ni San Juan gitawag nga Pag-ampo ni Hesus isip Labawng Pari.  Taas kini ug matahom nga pag-ampo nga angay basahon sa kinatibuk-an aron pamalandongan.  

Nagsugod si Jesus sa pagsulti sa Amahan nga “miabot na ang takna.” Miabot na ang Iyang takna sa pag-antos ug kamatayon. Apan nakita Niya kini isip higayon nga Siya pagahimayaon. Importante kini nga pagpadayag sa Ebanghelyo sumala ni Juan, ilabina niining pag-ampoha. Kon tawhanong panglantaw lamang ang basihan, makalilisang ang Krus. Apan sa balaang panglantaw—sa kahayag sa kabubut-on sa Amahan ug sa kaluwasan sa kalibotan—mahimayaon kini: mao kini ang higayon nga milingkod si Jesus sa Iyang trono, ang Krus. Mahimayaon kini tungod kay hingpit Niyang gituman ang kabubut-on sa Amahan pinaagi sa pag-antos nga kinabubut-on Niyang gidawat.

Human niana, nag-ampo si Jesus ilabina alang sa mga Apostoles. Giampo Niya ang ilang misyon aron madawat nila ang grasya nga ilang gikinahanglan sa pagdawat usab sa kabubut-on sa Amahan ug sa pagpadayon sa buhat ni Jesus. Nasayod Siya nga pinaagi lamang sa pagdawat sa ilang mga krus, sumala sa kabubut-on sa Amahan, sila mahimaya.

Sa kataposan, nag-ampo si Jesus alang niadtong motuo pinaagi sa ministeryo sa mga Apostoles. Ilabina, giampo Niya ang ilang panaghiusa. Ang panaghiusa nga gipasabot ni Jesus mao ang pagkausa nga naggikan sa pagkahiusa sa Amahan sa Langit. Kini nga pagkausa maoy magdala sa tanan ngadto sa himaya. Ug sa makausa pa, makab-ot lamang kini nga pagkausa kon hingpit kitang nahiusa sa kabubut-on sa Amahan.

Pamalandonga karong adlawa kining matahom nga pag-ampo, ug samtang namalandong ka, tugoti ang Ginoo sa pagsulti kanimo. Paminawa Siya samtang nagtawag Siya kanimo ngadto sa hingpit nga katumanan ug himaya. Apan hinumdomi nga makab-ot kini pinaagi sa pagdawat sa imong “takna.” Gitawag ka sa Amahan sa pagsunod sa mga tunob sa Iyang Anak pinaagi sa paghalad sa imong kinabuhi diha sa hingpit nga pagtuman sa kabubut-on sa Amahan. Ang pagdawat niining krusa mao ang dalan paingon sa Langit, ug ang pag-ampo ni Jesus naghatag kanimo sa tanang grasya nga imong gikinahanglan aron makaingon ka og “Oo.”

Amahan sa Langit, gipili ko ang pagdawat sa Imong hingpit ug balaang kabubut-on sa tanang butang. Gidawat ko ang Imong pagdapit sa pagpas-an sa akong mga krus sa kinabuhi ug sa pagsulod sa takna nga Imong gitawag kanako sa pag-atubang. Hinaot nga makaplagan ko ang tinuod nga himaya niining taknaa ug nga ang akong kinabuhi kanunayng maghimaya Kanimo. Jesus, misalig ako Kanimo.

Nobena sa Espiritu Santo
Giampo isip pagpangandam alang sa Pentekostes
Ikatulong Adlaw – Domingo, Mayo 24

Dugang nga mga Pamalandong sa Ebanghelyo

Mga Pamalandong sa Diosnong Kalooy

Mga Santos/Kasaulogan Karong Adlawa

Mga Kapilian sa mga Basahon sa Misa

Dugang nga Basahon – Pagsaka sa Langit

Pamalandong sa Pag-ampo alang sa Pagsaka sa Langit

Hulagway: Dibuho ni Kristo didto sa Getsemani