Mayo 25, 2020
Lunes sa Ikapitong Semana sa Pasko sa Pagkabanhaw
Mga Pagbasa Karong Adlawa
San Beda nga Talahuron, Pari ug Doktor sa Simbahan—Opsiyonal nga Handumanan
San Gregorio VII, Papa, Relihiyoso—Opsiyonal nga Handumanan
Santa Maria Magdalena de Pazzi, Birhen—Opsiyonal nga Handumanan

Paminaw sa Iningles
“Karon nasayod na kami nga nahibalo Ka sa tanan ug nga dili na kinahanglan nga adunay mangutana Kanimo. Tungod niini mituo kami nga gikan Ka sa Dios.” Mitubag si Jesus kanila, “Mituo na ba kamo karon? Tan-awa, moabot ang takna ug miabot na nga magkatibulaag kamo, ang matag usa ngadto sa iyang kaugalingong panimalay, ug biyaan ninyo Ako nga mag-inusara.” Juan 16:30–32
Mituo ka na ba kang Jesus? Unsa kalalom kana nga pagtuo? Ug nganong mituo ka? Andam ug kinabubut-on ka bang mogunit nianang pagtuo bisan unsa pay imong maatubang? Andam ka bang mosunod Kaniya bisan kon lisod kini ug dili uyonan sa kadaghanan? Andam ka bang mag-antos tungod sa imong pagtuo? Mga mahinungdanong pangutana kini. Mga pangutana kini nga kinahanglan natong tubagon sa mga panahong sayon ang pagkahimong Kristohanon ug sa mga panahong lisod kini.
Sayon ang pagkahimong Kristohanon ug ang pagsunod kang Jesus kon ang tanan nagbuhat usab niini. Pananglitan, sa usa ka bunyag o kasal, natural lang nga gusto natong mahiapil ug ipahibalo sa uban ang atong pagsuporta ug pagtuo sa ilang gibuhat. Apan komosta ang mga higayon nga gibiaybiay o gitamay ang imong pagtuo? O kon kinahanglan kang mohimo sa lisod nga pagpili sa pagsalikway sa mga pagpamugos sa kultura ug pagbarog alang sa imong pagtuo? Mas mahagiton kining mga panahona alang sa usa ka sumusunod ni Cristo.
Sa Ebanghelyo karong adlawa, daghan ang nagsusi sa pagtulon-an ni Jesus, naminaw Kaniya ug naghisgot mahitungod Kaniya. Morag klaro nga nagkauyon sila nga si Jesus usa ka balaang tawo ug usa ka bantogang propeta. Daghan pa gani ang nagsugod sa pagtuo nga Siya mao ang Mesiyas. Busa adunay usa ka nagkadakong pag-uyon Kaniya nga nakapasayon sa daghang tawo sa pag-ingon nga mituo sila Kaniya ug mituo silang gikan Siya sa Dios.
Gipatin-aw dayon ni Hesus kanila nga bisan tuod motuo sila karon, hapit nang moabot ang takna nga halos silang tanan mobiya Kaniya. Magkatibulaag sila ug pasagdan Siyang mag-inusara. Tin-aw nga usa kini ka propesiya bahin sa umaabot Niyang paglutos ug paglansang sa krus.
Usa sa labing dakong pagsulay sa atong pagtuo mao ang pagsusi kon unsa kita kamatinud-anon sa dihang ang pagsunod kang Cristo dili kaayo uyonan sa kadaghanan. Niining mga higayona, labaw pa kay sa mga higayong sayon, aduna kitay kahigayonan sa pagpakita sa atong pagtuo ug sa pagpalig-on sa atong determinasyon nga mahimong Kristohanon.
Pamalandongi karong adlawa kon unsa kalalom ang imong pagtugyan sa kaugalingon kang Cristo. Andam ka bang mosunod Kaniya ngadto sa Krus? Andam ka bang mobiya sa tanan aron mosunod Kaniya? Hinaot nga ang tubag usa ka tin-aw ug malig-ong oo. Kinahanglan kini mahimong usa ka “Oo” nga mogiya sa atong kinabuhi bisan unsa pa ang kahimtang nga atong maanaa.
Ginoo, mituo gayod ako. Tabangi ako nga magpabiling lig-on sa kanunay ang akong pagtuo Kanimo. Tabangi ako sa pag-ingon og “oo” Kanimo ug sa pagkinabuhi nianang “oo” sa kanunay. Hesus, misalig ako Kanimo.
Nobena sa Espiritu Santo
Giampo isip pagpangandam alang sa Pentekostes
Ikaupat nga Adlaw – Lunes, Mayo 25
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Santos sa Adlaw
San Beda nga Talahuron, Pari ug Doktor sa Simbahan
San Gregorio VII, Santo Papa, Relihiyoso
Santa Maria Magdalena de Pazzi, Birhen
Mga Kapilian sa mga Basahon sa Misa
Hulagway: Si Hesus Nagsulti Duol sa Tipiganan sa Halad, obra ni James Tissot




