Cebuano

Pag-ila sa Hunahuna sa Diyos

Hunyo 3, 2020
Miyerkoles sa Ikasiyam nga Semana sa Ordinaryong Panahon
Mga Pagbasa Karong Adlawa

San Charles Lwanga ug mga Kauban, mga Martir—Handumanan

Paminaw sa Iningles

Miingon si Hesus kanila, “Dili ba nasayop kamo tungod kay wala kamo masayod sa Kasulatan ni sa gahom sa Diyos?”  Marcos 12:24

Kining teksto sa Kasulatan gikan sa bahin diin gisulayan sa pipila ka mga Saduseo sa paglit-ag si Hesus pinaagi sa Iyang mga pulong.  Kanunay kining makita sa mga inadlawng pagbasa niining bag-ohay nga mga adlaw.  Ang tubag ni Hesus miigo gayod sa gamot sa problema.  Giklaro Niya ang nakapalibog kanila, apan nagsugod Siya sa yano ug klarong pagsulti sa kamatuoran: nasayop ang mga Saduseo kay wala sila masayod sa Kasulatan ni sa gahom sa Diyos.  Angay kitang mohunong kadiyot ug susihon ang atong kaugalingong pagsabot sa Kasulatan ug sa gahom sa Diyos.

Sayon rang mosulay sa pagsabot sa kinabuhi sa ato lang kaugalingong paningkamot.  Makahunahuna kita ug balikbalik ug maningkamot sa pagsusi kon nganong nahitabo kini o kadto.  Mahimo natong susihon ang mga binuhatan sa uban o bisan ang ato mismo.  Apan kasagaran, sa kataposan, naglibog ug “nasayop” gihapon kita sama sa pagsugod nato.  

Kon naglibog ka sa bisan unsang butang sa kinabuhi nga gusto nimong masabtan, tingali maayo nga molingkod ka ug mamati niadtong mga pulong ni Hesus nga daw gisulti Niya kanimo mismo.

Dili angay sabton kining mga pulonga ingong mapintas nga pagsaway o pagbadlong.  Hinunoa, dawata kini ingong gasa sa pagpanabot gikan kang Hesus nga motabang nato sa paghunong kadiyot ug pag-ila nga kasagaran masayop kita sa atong pagsabot sa mga butang sa kinabuhi.  Sayon ra kaayong tugotan ang atong mga pagbati ug mga sayop nga molubog sa atong panghunahuna ug pagpangatarungan ug modala nato sa sayop nga dalan.  Busa unsa may atong buhaton?

Kon mobati kita nga “nasayop” kita, o kon makaamgo kita nga wala gayod nato masabti ang Diyos o ang paglihok sa Iyang gahom, angay kitang mohunong ug mopahulay kadiyot sa atong pagpangatarungan aron makaampo kita ug mangita kon unsay isulti sa Diyos.

Angayng timan-an nga ang pag-ampo lahi sa paghunahuna.  Siyempre, kinahanglan natong gamiton ang atong hunahuna sa pagpamalandong sa mga butang nga may kalabotan sa Diyos, apan ang “paghunahuna, paghunahuna, ug dugang pang paghunahuna” dili kanunay mao ang dalan paingon sa hustong pagsabot.  Ang paghunahuna dili pag-ampo.  Kasagaran dili nato kini masabtan.  

Kinahanglan nga kanunay natong tumong ang paghunong kadiyot sa mapaubsanong paagi ug pag-angkon atubangan sa Diyos ug sa atong kaugalingon nga wala nato masabti ang Iyang mga pamaagi ug kabubut-on.  Maningkamot kita sa pagpahilom sa atong mga hunahuna ug sa pagsalikway sa tanang daan na natong pagtuo bahin sa unsay husto ug sayop.  Sa pagkamapaubsanon, kinahanglan nga molingkod kita, mamati, ug maghulat nga ang Ginoo maoy mogiya.  Kon undangan nato ang kanunayng paningkamot nga “masabtan kini” sa ato lang, tingali makita nato nga ang Diyos mismo mopasabot niini kanato ug mohatag sa kahayag nga atong gikinahanglan.  Ang mga Saduseo nalisdan sa pagbuntog sa ilang garbo ug pagkamapahitas-on, nga nakapalubog sa ilang panghunahuna ug nagtukmod kanila sa pagtuo nga sila ra ang matarong.  Gisulayan ni Hesus sa malumo apan lig-on nga paagi nga giyahan sila pagbalik sa tin-aw nga panghunahuna.  

Pamalandongi karong adlawa kon aduna ka bay mga hunahuna nga nagdala kanimo sa sayop o nagpalibog kanimo.  Pagpaubos aron matul-id ni Hesus ang imong panghunahuna ug matabangan ka Niyang makab-ot ang kamatuoran.

Ginoo, gusto gayod kong masayod sa kamatuoran.  Usahay matugotan nako nga madala ako sa sayop.  Tabangi ako sa pagpaubos sa akong kaugalingon sa Imong atubangan aron Ikaw ang mogiya kanako.  Hesus, misalig ako Kanimo.

Dugang nga mga Pamalandong sa Ebanghelyo

Mga Pamalandong sa Diosnong Kalooy

Tanang Santos/Mga Kapistahan

Santos sa Adlaw – San Charles Lwanga ug mga Kauban, mga Martir

Mga Kapilian sa mga Basahon sa Misa

Hulagway: Si Hesus Taliwala sa mga Magtutudlo sa Balaod ni Paolo Veronese