Hunyo 4, 2020
Huwebes sa Ikasiyam nga Semana sa Ordinaryong Panahon
Mga Pagbasa Karong Adlawa

Paminaw sa Iningles
“Higugmaa ang Ginoo nga imong Diyos sa tibuok mong kasingkasing, sa tibuok mong kalag, sa tibuok mong hunahuna, ug sa tibuok mong kusog… Higugmaa ang imong isigkatawo sama sa imong kaugalingon.” Marcos 12:30-31b
Makapainteres tan-awon kon giunsa pagkadugtong kining duha ka dagkong sugo!
Una sa tanan, klaro ra kaayo ang sugo nga higugmaon ang Diyos sa tibuok mong kasingkasing, kalag, hunahuna ug kusog. Ang yawe sa pagsabot niini mao nga kini nga gugma naglangkob sa tibuok natong pagkatawo ug walay pagduhaduha o pagtipig alang sa kaugalingon. Wala kitay angayng ipugong sa atong paghigugma sa Diyos. Ang matag bahin sa atong pagkatawo kinahanglang bug-os nga ipahinungod sa paghigugma sa Diyos.
Bisan daghan pa kitag masulti bahin nianang gugma aron mas masabtan pa kini nato sa mas lawom nga paagi, importante usab nga makita nato ang kalambigitan sa Unang Sugo ug sa Ikaduhang Sugo. Kining duha ka sugo nagsumada sa Napulo ka Sugo nga gihatag ni Moises. Apan mahinungdanon gayod nga masabtan kon sa unsang paagi nagkalambigit kining duha.
Ang Ikaduhang Sugo nag-ingon nga kinahanglan nimong “higugmaon ang imong isigkatawo sama sa imong kaugalingon.” Busa motungha ang pangutana, “Unsaon nako paghigugma ang akong kaugalingon?” Ang tubag makita sa Unang Sugo. Labaw sa tanan, gihigugma nato ang atong kaugalingon pinaagi sa paghigugma sa Diyos sa tanan natong nabatonan ug sa tibuok natong pagkatawo. Ang paghigugma sa Diyos mao ang labing maayong mabuhat nato alang sa atong kaugalingon, ug busa mao kini ang yawe sa paghigugma sa atong kaugalingon.
Busa mao kini ang kalambigitan sa duha ka sugo: ang paghigugma sa atong isigkatawo sama sa atong paghigugma sa kaugalingon nagpasabot nga ang tanan natong buhaton alang sa uban angayng motabang kanila sa paghigugma sa Diyos sa tibuok nilang kasingkasing, kalag, hunahuna ug kusog. Mahimo nato kini pinaagi sa atong mga pulong, apan labaw sa tanan pinaagi sa atong impluwensiya kanila.
Kon higugmaon nato ang Diyos sa tibuok natong pagkatawo, matakdan usab ang uban sa atong gugma sa Diyos. Makita nila ang atong gugma sa Diyos, ang atong kainit ug pangandoy alang Kaniya, ang atong debosyon ug ang atong pagtugyan sa kaugalingon. Makita nila kini ug madani sila niini. Madani sila kay ang gugma sa Diyos madanihon gayod. Ang pagkakita sa ingon nga gugma makadasig sa uban ug makapadasig kanila sa pagsundog sa atong paghigugma.
Busa pamalandongi karong adlawa kon unsa kalalom ang imong gugma sa Diyos. Sama kaimportante ang pagpamalandong kon unsa nimo kaayo gipadan-ag kana nga gugma aron makita kini sa uban. Ayaw pagpanuko sa pagkinabuhi ug pagpahayag sa imong gugma sa Diyos sa dayag nga paagi. Kon buhaton mo kini, makita kini sa uban, ug sa ingon higugmaon mo sila sama sa imong paghigugma sa imong kaugalingon.
Ginoo, tabangi ako sa pagtuman niining mga sugo sa gugma. Tabangi ako nga higugmaon Ka sa tibuok nakong pagkatawo. Ug sa akong paghigugma Kanimo, tabangi ako sa pagpaambit nianang gugmaha ngadto sa uban. Hesus, misalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Santos/Kasaulogan Karong Adlawa
Mga Kapilian sa mga Basahon sa Misa
Hulagway: Si Kristo nga Maglilipay ni Carl Heinrich Bloch



