Hunyo 2, 2020
Martes sa Ikasiyam nga Semana sa Ordinaryong Panahon
Mga Basahon alang sa Adlawng Karon
Santos Marcelino ug Pedro, mga Martir—Opsiyonal nga Handumanan

Paminaw sa Iningles
“Magtutudlo, nahibalo kami nga matinud-anon ka ug nga wala ka magpalibog sa opinyon ni bisan kinsa. Wala nimo tagda ang kahimtang sa tawo sa katilingban, kondili gitudlo nimo ang dalan sa Diyos sumala sa kamatuoran.” Marcos 12:14a
Kini gisulti sa pipila sa mga Pariseo ug sa mga sakop sa pundok ni Herodes nga gipadala aron “lit-agon” si Jesus pinaagi sa iyang mga pulong. Malimbongon ug tuso ang ilang paagi sa pagdalag kaniya sa lit-ag. Gisulayan nila siya pagpasulti og batok kang Cesar aron mapasanginlan siya sa mga Romanong awtoridad. Apan ang makapainteres mao nga tinuod gayod ang ilang gisulti bahin kang Jesus ug nagpakita kini og dakong hiyas.
Duha ka butang ang ilang gisulti nga nagpasiugda sa pagkamapainubsanon ug pagkasinsero ni Jesus: 1) “Wala ka magpalibog sa opinyon ni bisan kinsa”; 2) “Wala nimo tagda ang kahimtang sa tawo sa katilingban.” Unya gisulayan gayod nila siya paglimbong aron makalapas siya sa balaod sa Roma. Wala mahulog si Jesus sa ilang lit-ag, ug sa kataposan napildi niya sila sa kaalam.
Apan angay natong pamalandongan kining mga hiyasa kay angay kitang maningkamot nga makita kini sa atong kaugalingong kinabuhi. Una, dili kita angay magpalibog sa mga opinyon sa uban. Apan kinahanglang sabton kini sa hustong paagi. Siyempre, importante nga maminaw kita sa uban, mangayo sa ilang tambag, ug magbaton og bukas nga hunahuna. Ang panglantaw sa ubang tawo mahimong mahinungdanon kaayo sa paghimog maayong mga desisyon sa kinabuhi. Apan ang angay natong likayan mao ang pagtugot, tungod sa kahadlok, nga ang uban maoy magbuot sa atong mga lihok. Usahay ang mga “opinyon” sa uban negatibo ug sayop. Kitang tanan mahimong makasinati sa lainlaing matang sa pagpamugos gikan sa atong mga kauban. Si Jesus wala gayod magpadala sa sayop nga mga opinyon sa uban, ni mitugot nga ang pagpit-os tungod niadtong mga opinyona makausab sa iyang paagi sa paglihok.
Ikaduha, ilang gipunting nga si Jesus wala magpaimpluwensiya sa “kahimtang” sa laing tawo sa katilingban. Hiyas usab kini. Kinahanglan natong masayran nga ang tanang tawo managsama sa panan-aw sa Diyos. Ang katungdanan nga may gahom o impluwensiya wala magpasabot nga mas husto ang usa ka tawo kay sa uban. Ang mahinungdanon mao ang pagkasinsero, pagkamatarong, ug pagkamatinud-anon sa matag tawo. Hingpit nga gipakita ni Jesus kining hiyasa.
Pamalandonga karong adlawa kon masulti ba usab kini nga mga pulong mahitungod kanimo. Paningkamoti nga makakat-on gikan sa gisulti niining mga Pariseo ug mga sakop sa pundok ni Herodes; paningkamoti nga magkinabuhi sa pagkamatarong ug pagkamapainubsanon. Kon buhaton mo kini, makapakig-ambit usab ka sa kaalam ni Jesus aron makalikay ka bisan sa labing lisod nga mga lit-ag sa kinabuhi.
Ginoo, gusto gayod kong mahimong matinud-anon ug matarong nga tawo. Gusto kong maminaw sa maayong tambag sa uban, apan dili magpadala sa mga kasaypanan o sa pagpamugos nga mahimo usab nakong masugatan. Tabangi ako nga pangitaon ko kanunay ikaw ug ang imong kamatuoran sa tanang butang. Jesus, misalig ako kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Santos sa Adlaw – San Marcelino ug San Pedro, mga Martir
Mga Kapilian sa mga Basahon sa Misa
Hulagway: Ang mga Pariseo ug mga Saduseo Miabot aron Pagsulay kang Jesus, ni James Tissot




