Domingo, Hunyo 7, 2020
Solemnidad sa Santisima Trinidad

“Dako kaayo ang gugma sa Diyos alang sa kalibotan, mao nga gihatag niya ang iyang bugtong Anak, aron ang matag usa nga motuo kaniya dili malaglag kondili makabaton og kinabuhing dayon.” Juan 3:16
Ang Trinidad! Ang sulodnong kinabuhi sa Dios! Ang Labing Dakong Misteryo sa atong Pagtuo!
Kitang tanan naanad na sa hunahuna nga adunay usa lamang ka Dios. Ug hingpit natong gidawat nga kining usa ka Dios mao ang Amahan, Anak ug Espiritu Santo. Sa unang tan-aw, daw nagkasumpaki kini. Sa unsang paagi nga ang Dios usa ug tulo sa samang higayon? Usa kini ka misteryo nga angay natong susihon pag-ayo ug pamalandongan.
Una, kinahanglan natong masabtan nga ang Dios nga Amahan, Anak ug Espiritu Santo tulo ka diosnong Persona. Ang matag usa lahi sa usag usa. Ang matag Persona adunay hingpit nga salabutan ug gawasnong kabubut-on. Ang matag usa makahimo sa pag-ila ug paghigugma sa hingpit nga paagi.
Apan kining “kahingpitan” sa ilang katakos sa pag-ila ug paghigugma mao ang naghimo kanila nga usa. Silang tanan nag-ambit sa usa ka diosnong kinaiya ug, sulod nianang diosnong kinaiya, hingpit silang nagkahiusa. Nagpasabot kini nga ang matag usa hingpit nga nakaila ug nahigugma sa usag usa. Ug kana nga pag-ila (usa ka buhat sa ilang hingpit nga salabutan) ug paghigugma (usa ka buhat sa ilang hingpit nga kabubut-on) nagmugna og panaghiusa nga hilabihan kalawom nga sila nagpuyo ug naglihok isip usa ka Dios.
Makapadasig usab ang pagkahibalo ug pagsabot nga ang panaghiusang ilang giambitan pinaagi sa ilang pag-ila ug paghigugma sa usag usa naghatag usab sa matag usa kanila og hingpit nga katumanan isip Persona. Nagpakita kini nga ang “pagka-persona” nakakab-ot sa katumanan pinaagi sa panaghiusa. Pagkatalagsaon niining leksiyona alang sa matag usa kanato.
Dili kita Diyos, apan gilalang kita sa dagway ug panagway sa Diyos. Busa, makakaplag kita sa kahingpitan sa kinabuhi sa samang paagi sa Diyos. Sa ato pa, makakaplag kita sa kahingpitan sa kinabuhi pinaagi sa paghigugma sa uban ug sa gawasnong pagpili nga makaila sa matag tawo ug makighiusa kanila. Magkalahi ang porma niini sumala sa atong relasyon sa matag usa. Siyempre, ang bana ug asawa gitawag sa pag-ambit sa labing lawom nga panaghiusa isip pagsundog sa kinabuhi sa Diyos. Apan ang matag relasyon gitawag sa pag-ambit sa kinabuhi sa Diyos sa kaugalingon niining paagi.
Pamalandongi karon, samtang nagsaulog kita niining Domingo sa Trinidad, ang mga relasyon nga gitawag ka sa Dios nga sudlan. Unsa ka hingpit nimong gisundog ang gugma sa Trinidad diha sa imong mga relasyon? Sigurado nga kitang tanan makakita og mga bahin nga angay pa natong pauswagon. Paghimo og pasalig nga mohimo ka og laing lakang paingon sa mas lawom nga panaghiusa ug, nianang lakang sa paghigugma, tugoti ang Dios sa paghatag kanimo og mas dakong katumanan isip bunga niini.
Amahan, Anak ug Espiritu Santo, tabangi ako nga makaila ug mahigugma Kaninyo. Tabangi ako nga madiskobrehan ang gugma nga Inyong gipaambit sa usag usa sulod sa Inyong balaang kinabuhi. Pinaagi sa pagkadiskobre niini, tabangi usab ako sa paghigugma sa uban uban sa Inyong kasingkasing. Amahan, Anak ug Espiritu Santo, misalig ako Kaninyo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Santos/Kasaulogan Karong Adlawa
Mga Kapilian sa mga Basahon sa Misa
Dugang nga Basahon – Solemnidad sa Santisima Trinidad
Hulagway: Ang Balaang Trinidad ni Antonio de Pereda
Daily Reflections for Ordinary Time:
Weeks 1-17





