Cebuano

Espirituhanong Bahandi ug Materyal nga Bahandi

Hunyo 6, 2020
Sabado sa Ikasiyam nga Semana sa Ordinaryong Panahon
Mga Basahon Karong Adlawa

San Norberto, Obispo—Opsiyonal nga Handumanan

Paminaw sa Iningles

“Sa pagkatinuod, sultihan ko kamo: kining kabos nga biyuda naghulog ug labaw pa kay sa tanang uban nga naghulog sa sudlanan sa mga halad. Kay silang tanan mihatag gikan sa sobra sa ilang bahandi, apan siya, bisan sa iyang kakabos, mihatag sa tanan niyang nabatonan, sa tanan niyang ikinabuhi.” Marcos 12:43-44

Duha lamang ka gagmayng sensilyo nga pipila ra ka sentimos ang bili ang iyang gihulog sa bukag. Apan miingon si Hesus nga mas dako ang iyang gihulog kay sa gihulog sa tanang uban. Motuo ka ba niana? Lisod dawaton nga tinuod kini. Kasagaran, ang kantidad sa dagkong mga halad nga gihulog sa wala pa mohatag kining kabos nga biyuda mao dayon ang atong hunahunaon. Dili ba mas gustohon nato kadtong dagkong mga halad kay sa duha ka gagmayng sensilyo nga iyang gihulog? O dili diay?

Kon tuohan nato ang gisulti ni Jesus, angay kitang mas magpasalamat sa duha ka sensilyo sa biyuda kay sa dinagkong kantidad sa salapi nga gihulog sa wala pa siya.  Wala kini magpasabot nga ang dinagkong kantidad sa salapi dili maayo ug madagayaong mga halad.  Lagmit maayo ug madagayaon kadto nga mga halad.  Gidawat ug gigamit usab sa Diyos kadto nga mga halad.  

Apan dinhi gipasiugda ni Jesus ang kalainan tali sa espirituhanong bahandi ug materyal nga bahandi.  Giingon Niya nga ang espirituhanong bahandi ug ang pagkamanggihatagon sa espirituhanong mga butang mas importante pa gayod kay sa materyal nga bahandi ug sa pagkamanggihatagon sa materyal nga mga butang.  Ang kabos nga biyuda kabos sa materyal nga mga butang apan adunahan sa espiritu.  Kadtong may dinagkong kantidad sa salapi adunahan sa materyal nga mga butang, apan mas kabos pa sila sa espiritu kay sa biyuda.  

Sa materyalistang katilingban nga atong gipuy-an, lisod kining tuohan.  Lisod kaayo ang tinuyo nga pagpili sa espirituhanong bahandi isip mas dakong panalangin.  Nganong lisod man kini?  Kay aron madawat ang espirituhanong bahandi, kinahanglang buhian ang tanan.  Kitang tanan kinahanglang mahisama niining kabos nga biyuda ug ihalad ang tanan natong nabatonan, ang “tibuok natong panginabuhian.”  

Tingali may moingon dayon nga sobra ra kini nga pamahayag.  Apan dili kini sobra.  Walay daotan sa pagdawat sa materyal nga bahandi isip panalangin, apan sayop ang pagkapilit sa kasingkasing niini.  Ang mahinungdanon mao ang kinaiya sa kasingkasing nga nagsundog sa pagkamanggihatagon ug espirituhanong kakabos niining kabos nga biyuda.  Gusto siyang mohatag ug gusto niyang may kaayohang madala ang iyang gihatag.  Busa gihatag niya ang tanan niyang nabatonan.

Ang matag usa kinahanglang motimbang kon unsaon niya kini pagkinabuhi sa adlaw-adlaw.  Wala kini magpasabot nga ang tanan kinahanglang mobaligya gayod sa tanan nilang nabatonan ug mosulod sa monasteryo aron magmonhe.  Apan nagpasabot kini nga ang matag usa kinahanglang andam sa kasingkasing nga mohatag sa tanan ug dili magpabiling mapiit sa mga kabtangan.  Gikan niana, ipakita kanimo sa Ginoo kon unsaon paggamit sa mga materyal nga butang nga anaa kanimo alang sa imong labing dakong kaayohan ug sa kaayohan usab sa uban.

Pamalandonga karon ang kalainan niining duha ka matang sa bahandi ug pilia ang molungtad hangtod sa kahangtoran.  Itugyan sa atong Ginoo ang tanan nimong nabatonan ug ang tibuok nimong kaugalingon, ug tugoti Siya nga mogiya sa pagkamanggihatagon sa imong kasingkasing sumala sa Iyang hingpit nga kabubut-on.

Ginoo, palihog hatagi ako og kasingkasing nga sama sa iya niining kabos nga biyuda, manggihatagon ug dili kaugalingon ang gihunahuna.  Tabangi ako sa pagpangita sa mga paagi nga gitawag Mo ako sa pagtugyan sa akong tibuok kaugalingon Kanimo, nga walay itago, ug sa pagpangita labaw sa tanan sa espirituhanong mga bahandi sa Imong Gingharian.  Jesus, misalig ako Kanimo.

Dugang nga mga Pamalandong sa Ebanghelyo

Mga Pamalandong sa Diosnong Kalooy

Tanang Santos/Mga Kapistahan

Santo sa Adlaw – San Norbert, Obispo

Mga Kapilian sa mga Basahon sa Misa

Hulagway: Ang Sensilyo sa Biyuda ni James Tissot