Cebuano

Pagdala og Kausaban

Hunyo 9, 2020
Martes sa Ikanapulong Semana sa Kasagarang Panahon
Mga Basahon Alang sa Adlaw nga Kini

San Efrem, Diyakono ug Doktor sa Simbahan—Opsiyonal nga Handumanan

Paminaw sa Iningles

“Kamo ang asin sa yuta… Kamo ang kahayag sa kalibotan.” Mateo 5:13a &14a

Asin ug kahayag—mao kana kita.  Hinaot unta!  Nakapamalandong ka na ba kon unsay kahulogan sa pagkahimong asin o kahayag niining kalibotana? 

Sugdan nato niining hulagwaya.  Hunahunaa nga nagluto ka og lamian kaayong sabaw sa mga utanon gamit ang tanang labing maayong sangkap.  Hinay kining nagbukal sulod sa pipila ka oras ug daw lami kaayo ang sabaw.  Apan nahutdan ka og asin ug ubang mga panakot.  Busa, gipasagdan lang nimo kining hinay nga mobukal ug naglaom ka nga lami ra gihapon ang resulta.  Sa dihang naluto na kini, imong gitilawan ug, sa imong kasagmuyo, medyo tab-ang kini.  Busa, nangita ka hangtod nga nakakita ka sa kulang nga sangkap, ang asin, ug imong gidugangan sa hustong gidaghanon.  Human sa laing tunga sa oras nga hinay nga pagpabukal, imong gitilawan pag-usab ug nalipay ka pag-ayo.  Kahibulongan gayod ang mahimo sa asin! 

O hunahunaa nga naglakaw ka sa lasang ug nasaag.  Samtang nangita ka sa agianan pagawas, misalop ang adlaw ug anam-anam nga mingitngit.  Dag-om ang langit, busa walay makita nga mga bituon o bulan.  Mga tunga sa oras human sa pagsalop sa adlaw, anaa ka sa hingpit nga kangitngit taliwala sa lasang.  Samtang naglingkod ka didto, kalit nimong nakita ang masanag nga bulan nga mitungha sa taliwala sa mga panganod.  Takdol ang bulan ug anam-anam nang nahawan ang dag-om nga kalangitan.  Sa kalit, ang takdol nga bulan naghatag og igong kahayag sa imong agianan aron makapangita ka na usab sa imong dalan latas sa mangitngit nga lasang.

Kining duha ka hulagway nagpakita kanato sa kamahinungdanon bisan sa gamay lang nga asin ug gamay lang nga kahayag.  Bisan gamay lang, mausab niini ang tanan! 

Mao usab kini kanato diha sa atong pagtuo.  Ang kalibotan nga atong gipuy-an mangitngit sa daghang paagi.  Halos wala usab niini ang “lami” sa gugma ug kalooy.  Gitawag ka sa Diyos sa pagdugang nianang gamay nga lami ug paghatag nianang gamay nga kahayag aron makakaplag ang uban sa ilang dalan. 

Sama sa bulan, dili ikaw ang tinubdan sa kahayag.  Gipadan-ag lamang nimo ang kahayag nga imong nadawat.  Gusto sa Diyos nga modan-ag pinaagi kanimo ug gusto Niya nga ipadan-ag nimo ang Iyang kahayag.  Kon bukas ka niini, Iyang hawi-on ang mga panganod sa hustong panahon aron magamit ka Niya sa paagi nga Iyang gipili.  Ang imong responsibilidad mao lamang ang pagpabiling bukas. 

Pamalandongi karon kon unsa ka kabukas.  Pag-ampo matag adlaw nga gamiton ka sa Diyos sumala sa Iyang balaang katuyoan.  Itugyan ang imong kaugalingon sa Iyang balaang grasya ug mahibulong ka kon giunsa Niya paggamit ang gagmayng mga butang sa imong kinabuhi aron makadala og kausaban.

Ginoo, buot gayod ako nga gamiton Mo. Buot ako nga mahimong asin ug kahayag. Buot ako nga makatampo sa kaayohan niining kalibotana. Gitugyan ko ang akong kaugalingon Kanimo ug sa pag-alagad Kanimo. Hesus, misalig ako Kanimo.

Nobena sa Mahal nga Kasingkasing ni Hesus
Mga petsa sa nobena: Hunyo 10–18, 2020
Hunyo 19, 2020: Dakong Kapistahan sa Mahal nga Kasingkasing ni Hesus

Dugang nga mga Pamalandong sa Ebanghelyo

Mga Pamalandong sa Diosnong Kalooy

Tanang Santos/Mga Kapistahan

Santos sa Adlaw – San Efren, Diyakono ug Doktor sa Simbahan

Mga Kapilian sa mga Basahon sa Misa