Cebuano

Matarong nga Kasuko

Lunes, Nobyembre 9, 2020

Pista sa Pagdedikar sa Basilika sa Laterano sa Roma

Mga Pagbasa Karong Adlawa

Paminaw sa Iningles

Mitungas si Jesus ngadto sa Jerusalem. Didto sa nataran sa templo, nakita Niya ang mga namaligyag baka, karnero, ug salampati, ingon man ang mga tig-ilis og salapi nga naglingkod didto. Naghimo Siya og latigo gikan sa mga pisi ug giabog silang tanan gikan sa nataran sa templo, uban sa mga karnero ug mga baka. Gisabwag Niya ang mga sensilyo sa mga tig-ilis og salapi ug gipangtuwad ang ilang mga lamesa. Ug miingon Siya sa mga namaligyag salampati, “Kuhaa kini dinhi, ug ayaw na himoang merkado ang balay sa Akong Amahan.”  John 2:13b-16

Grabe, nasuko gayod si Jesus!  Pinaagi sa latigo, gipapahawa Niya sa templo ang mga tigbaylo og kuwarta ug gipanglintuwad ang ilang mga lamesa samtang gibadlong Niya sila.  Talagsaon gayod kadto nga talan-awon.  

Ang mahinungdanon dinhi mao nga kinahanglan natong sabton kon unsang matang sa “kasuko” ang diha kang Jesus.  Kasagaran, kon maghisgot kita og kasuko, ang atong gipasabot mao ang usa ka pagbati nga dili na nato mapugngan ug, sa pagkatinuod, maoy nagkontrol kanato.  Kini maoy pagkawala sa pagpugong sa kaugalingon ug usa ka sala.  Apan dili kini ang kasuko nga diha kang Jesus.

Dayag nga hingpit si Jesus sa tanang paagi, busa kinahanglan mag-amping gayod kita nga dili ipareho ang Iyang kasuko sa kasuko nga kasagaran natong masinati.  Oo, usa kini ka pagbati alang Kaniya, apan lahi kini sa kasagaran natong masinati.  Ang Iyang kasuko maoy kasuko nga naggikan sa Iyang hingpit nga gugma.

Sa kahimtang ni Jesus, ang gugma alang sa makasasala ug ang Iyang tinguha nga sila maghinulsol maoy nagpalihok sa Iyang pagbati.  Ang Iyang kasuko gitumong sa sala nga ilang gikalulongan, ug tinuyo ug may hugot nga kabubut-on Niyang gisukol ang daotan nga Iyang nakita.  Oo, tingali nakapakurat kini sa mga nakasaksi, apan niadtong kahimtanga, kadto ang labing epektibong paagi alang Kaniya sa pagtawag kanila ngadto sa paghinulsol.  

Usahay makita nato nga kinahanglan usab kitang masuko tungod sa sala.  Apan pag-amping!  Sayon kaayo alang kanato nga gamiton kining pananglitan ni Jesus aron pangatarongan ang atong pagkawala sa pagpugong sa kaugalingon ug ang pagkahulog sa sala sa kasuko.  Ang matarong nga kasuko, sama sa gipakita ni Jesus, kanunayng magbilin sa tawo og pagbati sa kalinaw ug gugma alang sa mga gibadlong.  Anaa usab ang diha-diha nga pagkaandam sa pagpasaylo kon makita ang tinuod nga pagbasol sa sala.

Pamalandongi karon ang matarong nga kasuko nga tingali buot sa Dios ibutang sa imong kasingkasing usahay.  Sa makausa pa, pag-amping sa hustong pag-ila niini.  Ayaw tugoti nga malimbongan ka niining pagbatiha.  Hinuon, tugoti nga ang gugma sa Dios alang sa uban maoy magpalihok kanimo, ug tugoti nga ang balaang pagdumot sa sala maoy mogiya kanimo sa pagbuhat sa balaan ug matarong nga paagi.

Ginoo, tabangi ako sa pagpalambo diha sa akong kasingkasing sa balaan ug matarong nga kasuko nga gusto Nimong maangkon ko.  Tabangi ako nga makaila kon unsay makasasala ug unsay matarong.  Hinaot nga kining kainita sa akong pagbati ug ang tanan nakong mainitong pagbati ipunting kanunay sa pagtuman sa Imong balaang kabubut-on.  Jesus, misalig ako Kanimo.

Dugang nga mga Pamalandong sa Ebanghelyo

Mga Pamalandong sa Diosnong Kalooy

Tanang Santos/Mga Kapistahan

Kapistahan Karong Adlawa – Pagpahinungod sa Basilika sa Laterano

Mga Kapilian sa mga Basahon sa Misa

Hulagway nga gipakita sa ibabaw: Si Kristo nga Nagpapahawa sa mga Tigbaylo og Kuwarta gikan sa Templo ni Cecco del Caravaggio