Nobyembre 8, 2020
Ika-32 nga Domingo sa Ordinaryong Panahon, Tuig A
Mga Basahon sa Adlaw

Paminaw sa Iningles
“Busa, pagtukaw kamo, kay wala kamo masayod sa adlaw ni sa takna.” Mateo 25:13
Handurawa nga nasayod ka sa adlaw ug takna sa imong pagpanaw gikan niining kinabuhia. Tinuod nga adunay mga tawo nga nasayod nga hapit na silang mamatay tungod sa sakit o katigulangon. Apan hunahunaa kini kalabot sa imong kaugalingong kinabuhi. Unsa kaha kon sultihan ka ni Hesus nga ugma na kana nga adlaw? Andam ka ba?
Tingali daghang butang ang mosantop sa imong hunahuna nga gusto pa nimong atimanon. Daghan ang maghunahuna sa tanan nilang minahal sa kinabuhi ug kon unsay epekto niini kanila. Isalikway una kana sa makadiyot ug palandonga ang pangutana gikan sa usa lamang ka panglantaw. Andam ka na bang makigkita kang Hesus?
Sa imong pagbiya niining kinabuhia, usa na lang ka butang ang mahinungdanon. Unsay isulti ni Jesus kanimo? Sa wala pa ang kinutlo sa Kasulatan sa ibabaw, gisaysay ni Jesus ang Sambingay sa Napulo ka Birhen. Ang uban maalamon ug may lana alang sa ilang mga lampara. Sa pag-abot sa pamanhonon lawom na ang kagabhion, andam sila sa pagsugat kaniya nga nagdagkot ang ilang mga lampara, ug gidawat niya sila. Ang mga buangbuang wala mangandam ug walay lana alang sa ilang mga lampara. Sa pag-abot sa pamanhonon, wala sila makasugat kaniya ug nadungog nila kining mga pulonga: “Amen, sultihan ko kamo, wala ako makaila kaninyo” (Mateo 25:12).
Ang lana sa ilang mga lampara, o ang kakulang niini, simbolo sa gugmang putli. Aron maandam kita sa pagsugat sa Ginoo sa bisan unsang orasa ug adlawa, kinahanglan nga anaa sa atong kinabuhi ang gugmang putli. Ang gugmang putli labaw pa sa kainit o pagbati sa paghigugma. Kini usa ka hingpit nga pagtugyan sa kaugalingon sa paghigugma sa uban uban sa kasingkasing ni Kristo. Kini usa ka batasan nga atong mapalambo matag adlaw pinaagi sa pagpili nga unahon ang uban ug ihatag kanila ang tanan nga gipangayo ni Jesus nga atong ihatag. Mahimo kining usa ka gamayng sakripisyo o usa ka maisogong buhat sa pagpasaylo. Apan bisan unsa pa kini, gikinahanglan nato ang gugmang putli aron maandam kita sa pagsugat sa atong Ginoo.
Pamalandongi karon ang mga tawo sa imong kinabuhi nga gusto sa Diyos nga imong higugmaon. Unsa ka maayo ang imong paghigugma kanila? Hingpit ba ang imong pagtugyan niini? Hangtod asa ka andam nga moabot? Bisan unsay mosantop sa imong hunahuna bahin sa imong kakulang niining gasa, hatagi kini og pagtagad ug pangamuyo sa Ginoo alang sa Iyang grasya, aron ikaw usab mahimong maalamon ug andam sa pagsugat sa Ginoo sa bisan unsang orasa.
Ginoo, nag-ampo ako nga madawat ko sa akong kinabuhi ang labaw sa kinaiyanhong gasa sa gugmang putli. Pun-a ako sa gugma alang sa uban ug tabangi ako nga magmadagayaon gayod sa pagpaambit niini. Hinaot nga wala akoy ipugong sa akong paghatag, aron hingpit akong maandam sa pagsugat Kanimo sa dihang tawgon Mo ako sa pagpauli Kanimo. Jesus, misalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Santos/Kasaulogan Karong Adlawa
Mga Kapilian sa mga Basahon sa Misa
Hulagway nga gipakita sa ibabaw: Ang Sambingay sa Napulo ka Birhen (bahin) ni Phoebe Anna Traquair



