Nobyembre 11, 2020
Miyerkules sa Ika-32 nga Semana sa Ordinaryong Panahon
Mga Basahon Karong Adlawa
San Martin sa Tours, Obispo—Handumanan

Paminaw sa Iningles
Ug ang usa kanila, sa pagkamatikod niya nga naayo na siya, mibalik samtang naghimaya sa Diyos sa makusog nga tingog; mihapa siya sa tiilan ni Jesus ug nagpasalamat kaniya. Usa siya ka Samaritano. Lucas 17:15-16
Kining tawhana nga sanlahon usa sa napulo nga giayo ni Jesus samtang nagpanaw Siya latas sa Samaria ug Galilea. Langyaw siya, dili Judio, ug siya ra ang mibalik kang Jesus aron magpasalamat sa iyang pagkaayo.
Matikdi nga duha ka butang ang gibuhat niining Samaritano sa dihang naayo siya. Una, siya “mibalik, nga naghimaya sa Diyos sa makusog nga tingog.” Mahinungdanon kining paghulagway sa nahitabo. Wala lang siya mibalik aron moingon og salamat, kondili mipadayag siya sa iyang pasalamat uban sa dakong kadasig. Handurawa kining sanlahon nga nag-awhag sa iyang tingog sa pagdayeg sa Diyos tungod sa sinsero ug lawom niyang pagpasalamat.
Ikaduha, kining tawhana “mihapa sa tiilan ni Jesus ug nagpasalamat Kaniya.” Dili usab gamayng butang kining gibuhat sa Samaritano. Ang paghapa sa tiilan ni Jesus laing timaan sa iyang dakong pagpasalamat. Dili lamang siya nalipay pag-ayo; ang iyang pagkaayo nakapapaubos usab pag-ayo kaniya. Makita kini sa iyang mapainubsanong paghapa sa tiilan ni Jesus. Nagpakita kini nga mapainubsanon niyang giila atubangan sa Diyos nga dili siya takos nga makadawat niining kaayohan. Matahom kini nga lihok nga nag-ila nga dili igo ang yano nga pagpasalamat. Kinahanglan ang lawom nga pagpasalamat. Ang lawom ug mapainubsanong pagpasalamat mao unta kanunay ang atong tubag sa kaayo sa Diyos.
Pamalandongi karon kon giunsa nimo pagtubag ang kaayo sa Diyos. Sa napulo nga naayo, kining usa lamang ka sanlahon ang nagpakita sa hustong kinaiya. Tingali mapasalamaton usab ang uban, apan dili sama sa angay nilang ipakita. Ikaw, kumusta man? Unsa kalawom ang imong pagpasalamat sa Diyos? Nasayod ka ba sa hingpit sa tanan nga Iyang ginabuhat alang kanimo matag adlaw? Kon wala pa, paningkamoti nga sundogon kining sanlahon, ug makaplagan mo usab ang kalipay nga iyang nakaplagan.
Ginoo, nag-ampo ako nga matag adlaw moduol ako Kanimo uban sa lawom ug bug-os nga pagpasalamat. Hinaot nga makita ko ang tanan nga Imong ginabuhat alang kanako matag adlaw ug nga makatubag ako pinaagi sa kinasingkasing nga pagpasalamat. Jesus, mosalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Santos sa Adlaw – San Martin sa Tours, Obispo
Mga Kapilian sa mga Basahon sa Misa




