Cebuano

Pagtugyan sa Dios

Nobyembre 13, 2020
Biyernes sa Ika-32 nga Semana sa Ordinaryong Panahon
Mga Basahon sa Adlaw

Santa Frances Xavier Cabrini, Birhen—Handumanan sa USA

Paminaw sa Iningles

“Bisan kinsa nga magtinguha sa pag-amping sa iyang kinabuhi mawad-an niini, apan bisan kinsa nga mawad-an niini makaluwas niini.”  Lucas 17:33

Kanunayng adunay isulti si Jesus nga makapahunong ug makapahunahuna kanato.  Usa niini ang maong mga pulong gikan sa Ebanghelyo karong adlawa.  Iyang gipakita kanato ang usa ka daw nagkasumpaki nga kamatuoran.  Ang pagtinguha sa pagluwas sa imong kinabuhi maoy hinungdan nga mawad-an ka niini, apan ang pagkawala sa imong kinabuhi maoy paagi aron maluwas nimo kini.  Unsay kahulogan niini?

Kining pamahayag ilabinang nagpatin-aw sa diwa sa pagsalig ug pagtugyan. Kon paningkamotan natong dumalahon ang atong kinabuhi ug kaugmaon pinaagi lamang sa kaugalingon natong paningkamot, dili maayo ang dangatan. Sa pagtawag kanato nga “wad-on” ang atong kinabuhi, giingnan kita ni Jesus nga kinahanglan itugyan nato ang atong kaugalingon Kaniya. Kinahanglan tugotan nato Siya sa pagdumala sa tanang butang ug sa paggiya kanato sa pagtuman sa Iyang labing balaang kabubut-on. Kini lamang ang paagi sa pagluwas sa atong kinabuhi. Maluwas nato kini pinaagi sa pagbuhi sa atong kaugalingong kabubut-on ug sa pagtugot nga ang Diyos maoy modumala.

Lisod kaayo sa sinugdan kining maong ang-ang sa pagsalig ug pagtugyan.  Lisod ang pagkab-ot sa hingpit nga pagsalig sa Dios.  Apan kon mahimo nato kini, mahingangha kita sa kamatuoran nga ang mga paagi ug plano sa Dios alang sa atong kinabuhi mas maayo gayod kay sa bisan unsa nga atong mahunahunaan sa atong kaugalingon.  Walay ikatandi sa Iyang kaalam, ug hingpit ang Iyang tubag sa tanan natong mga kabalaka ug mga suliran.

Pamalandongi karong adlawa kon unsa ka kaandam ug kinabubut-on sa pagtugyan sa hingpit nga pagdumala sa imong kinabuhi ngadto sa atong maluluy-ong Dios.  Igo ba ang imong pagsalig Kaniya aron tugotan Siya nga hingpit nga magdumala?  Buhata kining buhat sa pagtuo sa labing kinasingkasing nga paagi nga imong mahimo, ug tan-awa samtang magsugod Siya sa pag-amping kanimo ug pagtabang kanimo nga molambo sa paagi nga ang Dios lamang ang makahimo.

Ginoo, gitugyan ko Kanimo ang akong kinabuhi, ang akong mga kabalaka ug mga gipas-an, ug ang akong kaugmaon. Mosalig ako Kanimo sa tanang butang. Gitugyan ko ang tanan. Tabangi ako nga mosalig pa gayod Kanimo matag adlaw ug nga moduol Kanimo uban sa bug-os nga pagtugyan sa akong kaugalingon. Jesus, mosalig ako Kanimo.

Dugang nga mga Pamalandong sa Ebanghelyo

Mga Pamalandong sa Diosnong Kalooy

Tanang Santos/Mga Kapistahan

Santos sa Adlaw – Santa Frances Xavier Cabrini, Birhen

Mga Kapilian sa mga Basahon sa Misa

Pangunang hulagway sa ibabaw: Ang Pagpanaw Paingon sa Emaus, ni Joseph von Führich