Cebuano

Pagtuo

Nobyembre 14, 2020
Sabado sa Ika-32 nga Semana sa Ordinaryong Panahon
Mga Basahon sa Adlaw

Paminaw sa Iningles

“Sa pag-abot sa Anak sa Tawo, makakaplag ba Siya ug pagtuo dinhi sa yuta?”  Lucas 18:8b

Maayo ug makapainteres kini nga pangutana nga gipangutana ni Jesus.  Gipangutana Niya kini sa matag usa kanato ug gihangyo kita nga tubagon kini sa personal nga paagi.  Ang tubag nag-agad kon ang matag usa kanato adunay pagtuo sa atong kasingkasing o wala.

Busa unsa man ang imong tubag kang Jesus?  Lagmit ang tubag mao ang “Oo.”  Apan dili lang kini tubag nga oo o dili.  Hinaot nga kini usa ka “oo” nga padayong nagkalalom ug nagkalig-on sa kasigurohan.

Unsa ang pagtuo?  Ang pagtuo mao ang tubag sa matag usa kanato sa Dios nga namulong sa atong kasingkasing.  Aron makabaton ug pagtuo, kinahanglan una kitang mamati sa Dios nga namulong.  Kinahanglan natong tugotan Siya sa pagpadayag sa Iyang kaugalingon ngari kanato diha sa kahiladman sa atong konsensya.  Ug sa dihang buhaton Niya kini, atong gipakita ang pagtuo pinaagi sa pagtubag sa tanan Niyang gipadayag.  Motuo kita sa Iyang Pulong nga gisulti ngari kanato, ug kining buhat sa pagtuo mao ang nag-usab kanato ug nagporma sa pagtuo sulod kanato.

Ang pagtuo dili lamang kay pagdawat nga tinuod ang usa ka butang. Pagtuo kini sa gisulti sa Diyos kanato. Pagtuo kini sa Iyang Pulong mismo ug sa Iya mismong Persona. Talagsaon nga sa dihang dawaton ug puy-an nato ang gasa sa pagtuo, molig-on pag-ayo ang atong kasigurohan bahin sa Diyos ug sa tanan Niyang gisulti. Mao kana nga kasigurohan ang gipangita sa Diyos sa atong kinabuhi, ug kini ang mahimong tubag sa Iyang pangutana sa ibabaw.

Pamalandongi karon kon unsa katinuod ug unsa kalig-on ang kasigurohan sa imong pagtuo.  Pamalandongi si Jesus nga nangutana kanimo niini.  Makakaplag ba Siya ug pagtuo sa imong kasingkasing?  Tugoti nga motubo ang imong “Oo” ngadto Kaniya ug itugyan ang imong kaugalingon sa mas lawom nga pagdawat sa tanan Niyang gipadayag kanimo matag adlaw.  Ayaw kahadlok sa pagpangita sa Iyang tingog aron makaingon ka ug “Oo” sa tanan Niyang gipadayag.

Ginoo, buot akong motubo sa pagtuo. Buot kong molalom ang akong paghigugma ug pag-ila Kanimo. Hinaot nga buhi ang pagtuo sa akong kinabuhi ug nga makaplagan Mo kini isip usa ka bililhong gasa nga akong gihalad Kanimo. Jesus, mosalig ako Kanimo.

Dugang nga mga Pamalandong sa Ebanghelyo

Mga Pamalandong sa Diosnong Kalooy

Mga Santos/Kasaulogan Karong Adlawa

Mga Kapilian sa mga Basahon sa Misa

Pangunang hulagway sa ibabaw: Ang Kataposang Paghukom, ni Hans Memling