Disyembre 5, 2020
Sabado sa Unang Semana sa Adbiyento
Mga Pagbasa Karong Adlawa

Paminaw sa Iningles
“Daghan ang anihon apan diyutay ra ang mga mamumuo; busa pangayoa sa tag-iya sa anihon nga magpadala siyag mga mamumuo alang sa iyang anihon.” Mateo 9:37–38
Unsa may gusto sa Diyos nga imong buhaton? Unsa ang imong misyon? Ang pipila ka madasigong Kristohanon tingali nagdamgo nga mahimong inilang magwawali sa Ebanghelyo. Ang uban tingali nagdamgo sa paghimo og bayanihong mga buhat sa gugmang putli nga dayegon sa tanan. Ug ang uban tingali nangandoy nga magkinabuhi sa pagtuo nga hilom kaayo ug tago sa mata sa kadaghanan, duol sa pamilya ug mga higala. Apan unsa may gusto sa Diyos nga IMONG buhaton?
Sa kinutlo sa ibabaw, giawhag ni Jesus ang Iyang mga tinun-an sa pag-ampo alang sa “mga mamumuo alang sa iyang anihon.” Makasiguro ka nga usa ka sa mga “mamumuo” nga gihisgotan sa atong Ginoo. Sayon ra hunahunaon nga kini nga misyon alang sa uban, sama sa mga pari, mga relihiyoso ug relihiyosa, ug mga laykong nagpahinungod sa tibuok nilang panahon sa pagsangyaw sa Ebanghelyo. Sayon alang sa daghan ang paghunahuna nga gamay ra ang ilang ikatampo. Apan wala nay mas layo pa sa kamatuoran kay niini.
Buot sa Diyos nga gamiton ka sa talagsaong mahimayaong mga paagi. Oo, “talagsaong mahimayaon!” Siyempre, wala kini magpasabot nga ikaw na ang sunod nga labing inilang magwawali sa Ebanghelyo sa YouTube o nga mahimong sentro ka sa pagtagad sa kadaghanan sama ni Santa Madre Teresa. Apan ang buluhaton nga gusto sa Diyos nga imong buhaton sama ra katinuod ug sama ra kaimportante sa buluhaton ni bisan kinsa sa labing bantogang mga santos kaniadto o sa mga buhi karon.
Ang pagkabalaan sa kinabuhi makaplagan diha sa pag-ampo ug sa buhat usab. Samtang mag-ampo ka matag adlaw ug magkaanam ka kaduol kang Kristo, awhagon ka Niya: “Ayoha ninyo ang mga masakiton, banhawa ang mga patay, hinloi ang mga sanlahon, ug hinginla ang mga demonyo” (Mateo 10:8), sama sa giingon sa sumpay sa Ebanghelyo karong adlawa. Apan tawgon ka Niya sa pagbuhat niini sa paaging talagsaon sa imong kaugalingong bokasyon. Ayaw ibaliwala ang imong adlaw-adlaw nga katungdanan. Busa, kinsa sa imong mga masugatan matag adlaw ang mga masakiton, mga patay, mga sanlahon ug mga gisudlan og demonyo? Lagmit anaa sila sa imong palibot, bisan kon lainlain ang ilang kahimtang. Pananglitan, hunahunaa kadtong mga “sanlahon.” Sila ang mga tawo nga “gisalikway” sa katilingban. Ang atong kalibotan mahimong mabangis ug mapintas, ug tingali ang uban mobati nga nahisalaag sila ug nag-inusara. Kinsa sa imong nailhan ang tingali anaa niini nga kahimtang? Kinsa ang nagkinahanglan og gamayng pagdasig, pagsabot ug pagpakabana? Gihatagan ka sa Diyos og adlaw-adlaw nga katungdanan nga wala Niya ihatag sa laing tawo, ug tungod niana adunay mga tawo nga nagkinahanglan sa imong gugma. Pangitaa sila, duola sila, ipaambit si Kristo kanila, ug ubanan sila.
Pamalandongi karong adlawa kining talagsaong mahimayaong tawag nga gihatag kanimo aron mahimong Kristo ngadto sa uban. Dawata kining katungdanan sa gugma. Ilha ang imong kaugalingon isip usa nga gitawag nga mahimong mamumuo alang kang Kristo ug ipahinungod ang imong kaugalingon sa hingpit ug mahimayaong pagtuman niining misyon, bisan unsa pa ang paagi sa pagkinabuhi niini sa imong kinabuhi.
Minahal kong Ginoo, gitugyan ko ang akong kaugalingon sa Imong balaang misyon. Gipili Ko Ikaw ug ang Imong balaang kabubut-on alang sa akong kinabuhi. Isugo ako, minahal kong Ginoo, ngadto sa mga labing nagkinahanglan sa Imong gugma ug kalooy. Tabangi ako nga masayod unsaon nako pagpaambit nianang gugma ug kalooy ngadto sa mga tawo nga gitugyan Kanako, aron masinati nila sa ilang kinabuhi ang Imong mahimayaon ug makaluwas nga grasya. Hesus, misalig ako Kanimo.
Nobena sa Imakulada Concepcion
Nobyembre 29-Disyembre 7
Tan-awa ang among mga kapanguhaan alang sa Adbiyento!
Mga Pamalandong sa Balaang Kasulatan
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Santos/Kasaulogan Karong Adlawa
Mga Kapilian sa mga Basahon sa Misa
Hulagway sa ibabaw: Ang Komunyon sa mga Apostoles ni Communion of the Apostles
Mga Pamalandong sa Adbiyento ug Pasko
Libro nga humok og hapin & Elektronikong libro
Amazon.com – Google Play – iTunes – Barnes and Noble





