Cebuano

Ang Kahalangdon sa Pagpaubos

Disyembre 6, 2020
Ikaduhang Domingo sa Adbiyento (Tuig B)
Mga Pagbasa Karong Adlawa

Paminaw sa Iningles

Ug mao kini ang iyang gimantala: “May moabot sunod kanako nga mas gamhanan kay kanako. Dili ako takos bisan sa pagduko ug pagbadbad sa mga higot sa iyang sandalyas.” Marcos 1:7

Giisip ni Jesus si Juan Bautista nga usa sa labing bantog nga mga tawo nga nabuhi sa kalibotan (tan-awa ang Mateo 11:11). Apan sa kinutlo sa ibabaw, tin-awng giingon ni Juan nga dili gani siya takos nga “moduko ug magbadbad sa mga higot” sa sandalyas ni Jesus. Pagkamapaubsanon gayod niya!

Unsay nakapabantog kang San Juan Bautista? Ang gahom ba sa iyang pagwali? Ang iyang madasigon ug madanihong personalidad? Ang iyang kaabtik sa pagsulti? Ang iyang maayong panagway? Ang kadaghan sa iyang mga sumusunod? Seguradong dili kini tungod sa bisan hain niini. Ang tinuod nga nakapabantog kang Juan mao ang iyang pagkamapaubsanon sa pagtultol sa tanan ngadto kang Jesus.

Usa sa labing lisod nga pakigbisog sa tawo sa kinabuhi mao ang pagbatok sa garbo. Kasagaran gusto natong madani ang pagtagad sa uban ngadto sa atong kaugalingon. Kadaghanan kanato naningkamot sa pagpugong sa hilig nga mosulti sa uban kon unsa kita kamaayo ug nganong kita ang husto. Gusto natong tagdon, ilhon ug dayegon. Kasagaran lisod pugngan kining hilig kay kon ipataas nato ang atong kaugalingon, mobati kita nga importante kita. Ug sa usa ka sukod, makapahimuot kanang “pagbati.” Apan ang sagad dili mailhan sa atong tawhanong kinaiya nga nadaot sa sala mao nga ang pagkamapaubsanon usa sa labing maayong kinaiya nga atong mabatonan, ug labaw sa tanan, kini ang labing dakong tinubdan sa tinuod nga pagkabantog sa kinabuhi.

Tin-awng makita ang pagkamapaubsanon sa mga pulong ug binuhatan ni Juan Bautista sa kinutlo sa ibabaw. Nasayod siya kon kinsa si Jesus. Gitultolan niya ang iyang mga sumusunod ngadto kang Jesus aron dili na kaniya kondili sa iyang Ginoo sila magtutok. Kining pagtultol sa uban ngadto kang Kristo adunay duha ka bunga: si Kristo ang ilang gitutokan, ug si Juan nabayaw ngadto sa pagkabantog nga dili gayod makab-ot pinaagi sa garbo nga kaugalingon ray gihunahuna.

Unsa pa may mas labaw pa sa pagtultol sa uban ngadto sa Manluluwas sa Kalibotan? Unsa pa may mas labaw pa sa pagtabang sa uban nga madiskobrehan ang katuyoan sa ilang kinabuhi pinaagi sa pag-ila kang Kristo Jesus isip ilang Ginoo ug Manluluwas? Unsa pa may mas labaw pa sa pag-awhag sa uban nga magkinabuhi nga bug-os nga nagtugyan sa kaugalingon ngadto sa bugtong Diyos nga maluluy-on? Unsa pa may mas labaw pa sa pagbayaw sa Kamatuoran ibabaw sa mga bakak nga naggikan sa pagkahakog sa atong tawhanong kinaiya nga nadaot sa sala?

Pamalandonga karong adlawa ang imong tawag sa kinabuhi nga sundon ang pagkamapaubsanon ni Juan Bautista. Kon gusto nimo nga adunay tinuod nga bili ug kahulogan ang imong kinabuhi, gamita kini sa pagbayaw sa Manluluwas sa Kalibotan kutob sa imong mahimo atubangan sa mga tawo sa imong palibot. Tultoli ang uban ngadto kang Jesus, himoa siyang sentro sa imong kinabuhi, ug pagpaubos sa iyang atubangan. Pinaagi niining buhat sa pagkamapaubsanon, mapadayag ang imong tinuod nga pagkabantog ug makaplagan nimo ang pangunang katuyoan sa kinabuhi.

Mahimayaon kong Ginoo, Ikaw ug Ikaw lamang ang Manluluwas sa Kalibotan. Ikaw ug Ikaw lamang ang Diyos. Hatagi ako sa kaalam nga magmapaubsanon, aron ikapahinungod ko ang akong kinabuhi sa pagtultol sa uban nganha Kanimo ug daghan ang makaila Kanimo isip ilang tinuod nga Ginoo ug Diyos. Dili ako takos Kanimo, Ginoo ko. Apan sa Imong kaluoy, gigamit Mo gihapon ako. Nagpasalamat ako Kanimo ug gipahinungod ko ang akong kinabuhi sa pagmantalag sa Imong balaang ngalan. Jesus, misalig ako Kanimo.

Nobena sa Imakulada Concepcion
Nobyembre 29-Disyembre 7

Tan-awa ang among mga kapanguhaan alang sa Adbiyento!

Mga Pamalandong sa Balaang Kasulatan

Dugang nga mga Pamalandong sa Ebanghelyo

Mga Pamalandong sa Diosnong Kalooy

Tanang Santos/Mga Kapistahan

Santo sa Adlaw – San Nicolas, Obispo
Dili saulogon isip liturhikanhong handumanan karong tuiga kay natunong kini sa Domingo

Mga Kapilian sa mga Basahon sa Misa

Hulagway sa ibabaw: Si San Juan Bautista sa Kamadan-an, obra ni Titian


Mga Pamalandong sa Adbiyento ug Pasko

Libro nga humok og hapin & Elektronikong libro

Amazon.com – Google Play – iTunes – Barnes and Noble