Sabado, Disyembre 26, 2020
San Esteban, ang Unang Martir—Pista
Ikaduhang Adlaw sa Oktaba sa Pasko, Disyembre 26

Gipagawas nila siya sa siyudad ug gisugdan siya pagbatog bato. Gibutang sa mga saksi ang ilang mga kupo sa tiilan sa usa ka batan-ong lalaki nga ginganlag Saulo. Samtang gibato nila si Esteban, misinggit siya, “Ginoong Hesus, dawata ang akong espiritu.” Mga Buhat 7:58–59
Daw unsa ka makapakurat ang kalainan! Kagahapon, ang atong Simbahan nagsaulog sa malipayong pagkatawo sa Manluluwas sa kalibotan. Karon, atong gipasidunggan ang unang Kristohanong martir, si San Esteban. Kagahapon, ang tibuok kalibotan nagtutok sa usa ka mapainubsanon ug bililhong masuso nga naghigda sa pasungan. Karon, mga saksi kita sa dugo nga giula ni San Esteban tungod sa iyang pagsangyaw sa iyang pagtuo niining gamayng Bata.
Sa usa ka bahin, kining kapistahana nagdala dayon sa usa ka makapatandog nga hitabo sa atong pagsaulog sa Pasko. Dili unta kadto angayng mahitabo, apan gitugot kini sa Diyos samtang si San Esteban naghatag sa labing dakong pagsaksi sa iyang pagtuo niining bag-ong natawo nga Hari.
Tingali daghan ang mga hinungdan nganong gilakip sa kalendaryo sa Simbahan ang kapistahan sa unang Kristohanong martir sa ikaduhang adlaw sa Oktaba sa Pasko. Usa niini mao ang pagpahinumdom dayon kanato sa mga sangpotanan sa pagtugyan sa atong kinabuhi ngadto Kaniya nga natawo isip masuso sa Betlehem. Unsa man ang mga sangpotanan? Kinahanglan ihatag nato Kaniya ang tanan, nga walay itagana alang sa kaugalingon, bisan kon moresulta kini sa paglutos ug kamatayon.
Sa sinugdan, morag mawala tungod niini ang atong kalipay sa Pasko. Morag makapawala kini sa kasadya niining panahona sa pagsaulog. Apan kon tan-awon nato kini pinaagi sa mga mata sa pagtuo, kining kapistahana nagdugang hinuon sa mahimayaong kasolemne sa atong pagsaulog sa Pasko.
Nagpahinumdom kini kanato nga ang pagkatawo ni Kristo nangayo sa tanan gikan kanato. Kinahanglan andam ug kinabubut-on kitang motugyan sa tibuok natong kinabuhi ngadto Kaniya, nga walay itagana alang sa kaugalingon. Ang pagkatawo sa Manluluwas sa kalibotan nagpasabot nga kinahanglan usbon nato ang atong mga prayoridad sa kinabuhi ug ipasalig nato ang atong kaugalingon sa pagpili Kaniya labaw sa tanan, bisan labaw pa sa atong kaugalingong kinabuhi. Nagpasabot kini nga kinahanglan andam ug kinabubut-on kitang mosakripisyo sa tanan alang kang Jesus, nga magkinabuhi nga dili maiyaiyahon ug matinumanon sa Iyang labing balaang kabubut-on.
“Si Jesus ang hinungdan sa atong pagsaulog sa Pasko,” mao kana ang kanunay natong madungog. Tinuod kini. Siya ang hinungdan sa atong pagkinabuhi ug ang hinungdan sa pagtugyan nato sa atong kinabuhi nga walay itagana alang sa kaugalingon.
Pamalandonga karong adlawa kon unsay gipangayo kanimo tungod sa pagkatawo sa Manluluwas sa kalibotan. Sa tawhanong panglantaw, kining “gipangayo” daw labaw pa sa atong maarangan. Apan sa panglantaw sa pagtuo, nasabtan nato nga ang Iyang pagkatawo usa ka kahigayonan alang kanato sa pagsulod sa bag-ong kinabuhi. Gitawag kita sa pagsulod sa usa ka bag-ong kinabuhi sa grasya ug bug-os nga paghatag sa kaugalingon. Dawata sa kinasingkasing kining pagsaulog sa Pasko pinaagi sa pagpamalandong kon sa unsang mga paagi gitawag ka sa paghatag sa imong kaugalingon sa mas hingpit nga paagi. Ayaw kahadlok sa paghatag sa tanan ngadto sa Diyos ug sa uban. Takos kining isakripisyo, ug tungod niining bililhong Bata mahimo nato kini.
Ginoo, samtang nagpadayon kami sa mahimayaong pagsaulog sa Imong pagkatawo, tabangi ako nga masabtan kon unsay angayng ipausab sa Imong pag-anhi taliwala kanamo sa akong kinabuhi. Tabangi ako nga masabtan sa tin-aw ang Imong pagdapit nga itugyan ko sa hingpit ang akong kaugalingon ngadto sa Imong mahimayaong kabubut-on. Hinaot nga ang Imong pagkatawo mopukaw kanako sa kaandam nga matawo pag-usab ngadto sa usa ka kinabuhi sa paghatag sa kaugalingon nga walay pagkamaiyaiyahon ug puno sa pagsakripisyo. Hinaot nga makat-on ako sa pagsundog sa gugma ni San Esteban Kanimo ug sa pagkinabuhi niadtong gugma nga walay pagduhaduha o pagtipig sa kaugalingon. San Esteban, iampo ako. Jesus, misalig ako Kanimo.
Tan-awa ang among mga kapanguhaan alang sa Pasko!
Mga Pamalandong sa Balaang Kasulatan
Dugang nga mga Pamalandong sa Ebanghelyo
Mga Pamalandong sa Diosnong Kalooy
Santos sa Adlaw – San Esteban, ang Unang Martir
Mga Kapilian sa mga Basahon sa Misa
Dugang nga mga Pamalandong sa Pasko:
Paghinumdom sa Paglukso sa Kalipay
Usa ka Mapainubsanong Alagad sa Ginoo
Pagkamatinud-anon sa Tanang Butang
Mga Pamalandong sa Usa ka Inahan
Hulagway sa ibabaw: Ang Pagbato kang San Esteban, obra ni Annibale Carracci




