February 26, 2021
Friday of the First Week of Lent
Readings for Today
Paminaw sa Iningles
“Pakighusay dayon sa imong kaatbang samtang nagpaingon pa kamo sa hukmanan. Kay kon dili, itugyan ka sa imong kaatbang ngadto sa huwes, ug itugyan ka sa huwes ngadto sa guwardiya, ug itambog ka sa bilanggoan. Amen, sultihan ko ikaw, dili ka makagawas hangtod mabayran nimo ang kataposang sentimo.” Matthew 5:26
Naghatag ba dinhi ang atong Ginoo ug legal nga tambag bahin sa usa ka kasong kriminal o sibil ug kon unsaon paglikay nga mapasakaan ug kaso? Dili gayod. Gipakita Niya kanato ang usa ka hulagway sa Iyang Kaugalingon isip matarong nga Maghuhukom. Ug giawhag Niya kita sa pagpakitag kaluoy ngadto kang bisan kinsa ug sa tanan nga mahimong isipon natong “kaatbang.”
Kinahanglanon gayod ang pagpasaylo sa uban. Dili gayod nato kini ikadumili. Apan sa pagkatinuod, dili pa gani igo ang pagpasaylo. Ang kinatas-ang tumong kinahanglan mao ang pagpasig-uli, nga labaw pa gayod niini. Sa Ebanghelyo sa ibabaw, giawhag kita ni Jesus nga “makighusay” sa atong mga kaatbang, nga nagpasabot sa pagpasig-uli. Ingon niini ang pagkasulti sa bersiyong RSV sa Bibliya: “Pakighigala dayon sa nagsumbong batok kanimo…” Ang pagpaningkamot sa pagpalambo sa usa ka “panaghigalaay” uban sa tawo nga nagsumbong batok kanimo, ilabina kon bakak ang sumbong, labaw pa gayod sa pagpasaylo lamang kaniya.
Ang pagpakig-uli sa laing tawo ug ang pagtukod pag-usab sa tinuod nga panaghigalaay nagpasabot nga dili ka lamang mopasaylo kondili mobuhat usab sa tanan nimong mahimo aron mapasig-uli ang usa ka relasyon sa gugma uban nianang tawhana. Nagpasabot kini nga kamong duha mobiya sa inyong mga kahiubos ug magsugod pag-usab. Siyempre, nagkinahanglan kini nga ang duha ka tawo magtinabangay diha sa gugma; apan, sa imong bahin, nagpasabot kini nga maningkamot ka pag-ayo aron makab-ot kining pagpasig-uli.
Hunahunaa ang usa ka tawo nga nakapasakit kanimo ug, tungod niini, nadaot ang inyong relasyon. Gipasaylo na ba nimo kanang tawhana diha sa pag-ampo atubangan sa Dios? Giampo na ba nimo siya ug gihangyo ang Dios nga pasayloon siya? Kon mao, andam ka na sa sunod nga lakang: ang pagduol kaniya uban sa gugma aron mapasig-uli ang inyong relasyon. Nagkinahanglan kini ug dakong pagpaubos, ilabina kon ang maong tawo maoy hinungdan sa kasakit ug ilabina kon wala pa siya magpahayag kanimo sa iyang pagbasol ug mangayo sa imong pasaylo. Ayaw hulata nga buhaton niya kini. Pangitag mga paagi aron ipakita nianang tawhana nga gihigugma nimo siya ug gusto nimong maayo ang samad sa kasakit. Ayaw isumbat kaniya ang iyang sala o paghambin ug kasuko. Gugma ug kaluoy lamang ang tinguhaa.
Gitapos ni Jesus kining pag-awhag pinaagi sa bug-at nga mga pulong. Sa laktod, kon dili nimo buhaton ang tanan nimong mahimo aron makig-uli ug mapasig-uli ang inyong relasyon, manubag ka niini. Bisan og sa sinugdan daw dili kini makiangayon, tin-aw nga dili gayod kini ingon niana, kay mao kini ang giladmon sa kaluoy nga gitanyag kanato sa atong Ginoo matag adlaw. Dili gayod matumbasan sa atong pagbasol ang kabug-at sa atong sala, apan bisan pa niana, gipasaylo ug gipakig-ulian kita sa Dios. Pagkadakong grasya! Apan kon dili nato itanyag kining mao rang kaluoy ngadto sa uban, sa pagkatinuod gilimitahan nato ang katakos sa Dios sa pagtanyag niini nga kaluoy kanato, ug kinahanglan natong bayran ang “kataposang sentimo” sa atong kaugalingong utang ngadto sa Dios.
Pamalandongi karon ang tawo nga mosantop sa imong hunahuna nga kinahanglan nimong hingpit nga pakig-ulian ug uban kaniya mapasiga pag-usab ang inyong relasyon sa gugma. Iampo kining grasyaha, ipasalig ang imong kaugalingon sa pagbuhat niini, ug pangitag mga kahigayonan aron matuman kini. Buhata kini nga walay pagpanuko, ug dili gayod nimo pagabasolan ang imong desisyon.
Akong labing maluloy-ong Ginoo, nagpasalamat ako Kanimo sa pagpasaylo kanako ug sa paghigugma kanako sa hingpit ug sa bug-os gayod. Salamat sa Imong pagpakig-uli kanako bisan pa sa akong dili hingpit nga pagbasol. Hatagi ako, minahal nga Ginoo, og kasingkasing nga kanunayng maninguha sa paghigugma sa makasasala nga anaa sa akong kinabuhi. Tabangi ako sa pagpakita og kalooy sa labing bug-os nga paagi, sa pagsundog sa Imong balaang kalooy. Jesus, misalig ako Kanimo.
40 Days at the Foot of the Cross – Reflection Nine – Unwelcomed by the World
Mga Kapanguhaan alang sa Kwaresma
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Kwaresma
Mga Santos/Kasaulogan Karong Adlawa
Mga Kapilian sa mga Basahon sa Misa
Featured image above: The Return of the Prodigal Son
_-_The_Return_of_the_Prodigal_Son_-_Google_Art_Project.jpg){kind=link}