Cebuano

Mga Dayag nga Makasasala

Marso 22, 2021
Lunes sa Ikalimang Semana sa Kwaresma
Mga Basahon Karong Adlawa

Bidyo

Paminaw sa Iningles

“Ang walay sala kaninyo mao ang unang mobato kaniya.” Juan 8:7

Gamhanan kining mga pulonga nga gisulti ni Jesus. Ang mga Pariseo nga mahukmanon ug hilig mokondenar nagdala ngadto kang Jesus ug usa ka babaye nga dayag nga nasakpan “sa akto gayod sa pagpanapaw.” Makasasala ba siya? Oo, makasasala gayod siya. Apan dili kaayo bahin sa pangutana kon makasasala ba siya o dili ang maong sugilanon. Mahitungod kini sa pagtagad ni Jesus sa mga makasasala kon itandi sa pagtagad sa mga Pariseo nga nagpakamatarong sa ilang kaugalingon, mahukmanon, ug hilig mokondenar.

Una sa tanan, atong tan-awon kining babayhana. Gipakaulawan siya. Nakasala siya, nasakpan, ug gidala sa atubangan sa tanan isip usa ka makasasala. Giunsa niya pag-atubang kini? Wala siya mosukol. Wala siya magpadayon sa paglimod. Wala siya masuko. Wala siya mobalos. Hinuon, nagtindog siya didto nga gipakaulawan, naghulat sa iyang silot uban sa masulob-ong kasingkasing.

Ang kaulaw tungod sa kaugalingong mga sala usa ka gamhanang kasinatian nga mahimong mosangpot sa tinuod nga paghinulsol. Kon makasugat kita ug usa ka tawo nga dayag nga nakasala ug naulaw tungod sa iyang sala, kinahanglan nato siyang tagdon uban sa kaluoy. Ngano man? Tungod kay ang dignidad sa tawo kanunayng labaw sa iyang sala. Ang matag tawo gibuhat sumala sa dagway ug pagkasama sa Diyos, ug ang matag tawo angay sa atong kaluoy. Kon ang usa ka tawo magmagahi ug dili modawat nga siya nakasala (sama sa mga Pariseo), gikinahanglan ang balaang pagbadlong aron matabangan siyang maghinulsol. Apan kon ang usa ka tawo mobati ug kasubo ug, sama niining hitaboa, makasinati usab ug kaulaw, andam na siyang modawat sa kaluoy.

Sa pag-ingon, “Ang walay sala kaninyo mao ang unang mobato kaniya,” wala gipakamatarong ni Jesus ang iyang sala. Hinuon, giklaro Niya nga walay bisan kinsa nga adunay katungod sa pagkondenar. Walay bisan kinsa. Bisan ang mga pangulo sa relihiyon. Alang sa daghan sa atong kalibotan karon, lisod kining pagtulon-ana nga isabuhay. Kasagaran nang ang mga ulohan sa balita sa midya daw dili kapugngan sa pagladlad kanato sa labing makapakurat nga mga sala sa uban. Kanunay kitang tintalon nga mapungot pag-ayo sa gibuhat niining tawhana o niadtong tawhana. Sayon ra kaayo kitang molingo-lingo, mokondenar kanila, ug motagad kanila nga daw hugaw sila. Sa pagkatinuod, daw daghang tawo karon ang nag-isip nga katungdanan nila ang paglihok isip mga “tigbantay” batok sa matag sala nga ilang makutkot bahin sa uban.

Pamalandonga karong adlawa kon kang kinsa ka mas susama: sa mga Pariseo ba o kang Hesus? Motindog ba unta ka didto uban sa panon sa katawhan, nga nagtinguha nga batohon kining babaye nga gipakaulawan? Unsa man karon? Kon makadungog ka bahin sa dayag nga mga sala sa uban, imo ba silang hukman ug kondenahon? O naglaom ba ka nga kaluy-an sila? Paningkamoti nga masundog ang maluluy-ong kasingkasing sa atong Ginoo nga Diyos; ug kon moabot na ang takna sa paghukom kanimo, ikaw usab pagakaluy-an sa madagayaon.

Akong maluluy-ong Ginoo, dili Ka mohunong sa pagtan-aw sa among sala kondili motan-aw Ka sa among kasingkasing. Ang Imong gugma walay kinutoban ug makapahingangha. Nagpasalamat ako Kanimo sa kaluoy nga Imong gipakita kanako, ug nag-ampo ako nga kanunay kong masundog kana nga kaluoy ngadto sa matag makasasala sa akong palibot. Jesus, misalig ako Kanimo.

40 ka Adlaw sa Tiilan sa Krus – Pamalandong Ika-33 – “Diyos ko, Diyos ko, nganong gibiyaan mo ako?

Mga Kapanguhaan alang sa Kwaresma

Dugang nga mga Pamalandong sa Ebanghelyo

Mga Pamalandong sa Diosnong Kalooy

Mga Pamalandong sa Balaang Kasulatan alang sa Kwaresma

Mga Santos/Kasaulogan Karong Adlawa

Mga Kapilian sa mga Basahon sa Misa

Hulagway sa ibabaw: Si Kristo ug ang Babayeng Nangalunya, obra sa sumusunod ni Lucas Cranach